રાંચી: ઝારખંડમાં વિદ્યાર્થીઓ JPSC અને JSSC ભરતી પરીક્ષાઓમાં કથિત અનિયમિતતાઓ સામે વિરોધ પ્રદર્શન કરી રહ્યા છે.  ત્યારે ઝારખંડ પબ્લિક સર્વિસ કમિશનના ત્રણ સભ્યો  અજીતા ભટ્ટાચાર્ય, અનિમા હંસદા અને જમાલ અહેમદ - એ રાજીનામું આપી દીધું છે. જેને રાજ્યપાલ સંતોષ કુમાર ગંગવારે તેમના બધા રાજીનામા સ્વીકારી લીધા છે. તેમજ સીઆઈડી સોમવારથી  તેમની પૂછપરછ શરૂ કરશે.

વિદ્યાર્થી સંગઠનોની કથિત ગેરરીતિની તપાસની માંગ 

ઝારખંડ લોકભવન દ્વારા જાહેર કરાયેલી માહિતી અનુસાર રાજ્યપાલે રાજ્ય સરકારની ભલામણના આધારે આ નિર્ણય લીધો છે.આ નિર્ણય એવા સમયે આવ્યો છે જ્યારે ઝારખંડમાં વિદ્યાર્થીઓ JPSC અને JSSC ભરતી પરીક્ષાઓમાં કથિત ગેરરીતિ અંગે વિરોધ પ્રદર્શન કરી રહ્યા છે. વિદ્યાર્થી સંગઠનો પરીક્ષા પ્રક્રિયામાં સુધારા અને કથિત ગેરરીતિની તપાસ સહિત અનેક માંગણીઓ ઉઠાવી રહ્યા છે.

સીઆઈડીની ટીમ ત્રણેય સભ્યોની તબક્કાવાર પૂછપરછ કરશે

આ ઉપરાંત મળતી માહિતી મુજબ સીઆઈડીની ટીમ ત્રણેય સભ્યોની તબક્કાવાર પૂછપરછ કરશે. જેમાં સોમવારે ડૉ. અજિતા ભટ્ટાચાર્ય, મંગળવારે ડૉ. અનિમા હંસદા અને બુધવારે ડૉ. જમાલ અહેમદની પૂછપરછ કરશે. જો જરૂરી હોય તો ત્રણેયને ફરીથી સમન્સ પાઠવવામાં આવી શકે છે. 

JPSCના ભૂતપૂર્વ અધ્યક્ષની પણ પૂછપરછ કરવામાં આવી  

આ પૂર્વે તપાસ એજન્સીએ  JPSCના ભૂતપૂર્વ અધ્યક્ષ અને ભૂતપૂર્વ મુખ્ય સચિવ એલ. ખિયાંગટેની ચાર રાઉન્ડમાં પૂછપરછ કરી ચૂકી છે. આ  દરમિયાન તેમને પરીક્ષા પ્રક્રિયા અને કમિશન દ્વારા લેવામાં આવેલા નિર્ણયો અંગે ઘણા મહત્વપૂર્ણ પ્રશ્નો પૂછવામાં આવ્યા હતા.

આગામી દિવસોમાં વધુ ધરપકડની શક્યતા 

આ ઉપરાંત 14મી  JPSC સિવિલ સર્વિસીસ પ્રિલિમિનરી પરીક્ષાની આસપાસ કથિત ગેરરીતિઓ અંગે CID એ તેની તપાસ વધુ તીવ્ર બનાવી છે. જેમાં મુખ્ય સચિવ કાર્યાલયમાં કમ્પ્યુટર ઓપરેટર ધર્મેન્દ્ર કુમાર અને કન્ડક્ટિંગ એજન્સી TSR ડેટા પ્રોસેસિંગ પ્રાઇવેટ લિમિટેડના એકાઉન્ટન્ટ રક્ષક સિંહની પૂછપરછ ચાલુ રહી છે. સૂત્રોના જણાવ્યા અનુસાર, પૂછપરછ અને તપાસ દરમિયાન મળેલા લીડ્સના આધારે આગામી દિવસોમાં વધુ ધરપકડ થઈ શકે છે.