વોશિંગ્ટન: ભારત અને અમેરિકા વચ્ચે પરમાણુ સહયોગ વધારવા માટે કરાર થયો છે. જેના લીધે  ભારતની ઉર્જા જરૂરિયાતો પૂરી કરવામાં મદદ મળશે. ભારતના વિદેશ સચિવ વિક્રમ મિશ્રીએ આ મુદ્દા પર વોશિંગ્ટનમાં યુએસ ઉર્જા સચિવ સાથે એક મહત્વપૂર્ણ બેઠક યોજી હતી. 

નવા ક્ષેત્રોમાં ઉર્જા સહયોગ વધારવા અંગે ચર્ચા કરી

ભારતના વિદેશ સચિવ વિક્રમ મિશ્રીએ યુએસ ઉર્જા સચિવ ક્રિસ રાઈટ સાથેની મુલાકાત દરમિયાન પરમાણુ ઉર્જા, કોલ ગેસિફિકેશન અને LPG નિકાસ જેવા નવા ક્ષેત્રોમાં ઉર્જા સહયોગ વધારવા અંગે ચર્ચા કરી. તેમણે ઊર્જા સુરક્ષા વધારવા, દ્વિપક્ષીય ઉર્જા વેપારને વધુ ગાઢ બનાવવા અને ભારત-યુએસ ઉર્જા ભાગીદારીને મજબૂત બનાવવા માટે નવા માર્ગો શોધવા પર ચર્ચા કરી હતી. ભારતીય દૂતાવાસે શુક્રવારે સોશિયલ મીડિયા પર આ માહિતી શેર કરી હતી. 

અમેરિકા અનેક ક્ષેત્રોમાં સહયોગ માટે તૈયાર 

આ બેઠક બાદ  ભારતમાં અમેરિકાના રાજદૂત સેરગેઈ ગોરે જણાવ્યું હતું કે અમેરિકા નાગરિક પરમાણુ સહયોગ ઉપરાંતના ક્ષેત્રોમાં ભારત સાથે સહયોગ કરવા તૈયાર છે. 

ભારતમાં નાગરિક પરમાણુ ક્ષેત્ર ખાનગી ક્ષેત્રની ભાગીદારી માટે ખુલ્લું

ઉલ્લેખનીય છે કે, ભારતના નાગરિક પરમાણુ ક્ષેત્રમાં અત્યાર સુધીના સૌથી વ્યાપક સુધારા તરીકે સસ્ટેનેબલ હાર્નેસિંગ એન્ડ એડવાન્સમેન્ટ ઓફ ન્યુક્લિયર એનર્જી એક્ટ (શાંતિ એક્ટ) ને બિરદાવવામાં આવી રહ્યો છે. આ કાયદો ગયા ડિસેમ્બરમાં અમલમાં આવ્યો હતો, જેનાથી કડક રીતે નિયંત્રિત નાગરિક પરમાણુ ક્ષેત્રને ખાનગી ક્ષેત્રની ભાગીદારી માટે ખુલ્લું મૂકવામાં આવ્યું હતું. તેણે 1962 ના પરમાણુ ઊર્જા કાયદા અને 2010 ના નાગરિક જવાબદારી માટે પરમાણુ નુકસાન (CLND) કાયદાને પણ રદ કર્યો છે.

વિદેશ સચિવ વિક્રમ મિશ્રી ત્રણ દિવસની અમેરિકાની મુલાકાતે

વિદેશ સચિવ વિક્રમ મિશ્રી મંગળવારે મોડી રાત્રે અમેરિકા પહોંચ્યા હતા અને હાલમાં તેઓ ત્રણ દિવસની મુલાકાતે છે. તેમણે સંરક્ષણ, વાણિજ્ય અને રાજ્ય વિભાગના વરિષ્ઠ અધિકારીઓ સાથે મુલાકાત કરી છે. બુધવારે તેમણે વિદેશ પ્રધાન માર્કો રુબિયો સાથે પણ મુલાકાત કરી હતી.