મુખ્ય ચૂંટણી કમિશ્નર (CEC) જ્ઞાનેશ કુમાર વિરુદ્ધ એટલે કે આવતીકાલે શનિવારે  થનારા કોકરોચ જનતા પાર્ટી (CJP)ના પ્રદર્શન પર દિલ્હી પોલીસે આકરુ વલણ અપનાવ્યું છે. આજે એટલે કે શુક્રવારે દિલ્હી પોલીસે સ્પષ્ટ કર્યું છે કે જંતર-મંતર પર CJPના પ્રસ્તાવિત પ્રદર્શનને અનુમતિ નહીં આપવામાં આવે. પોલીસે આનું કારણ વિસ્તારમાં લાગુ ભારતીય નાગરિક સુરક્ષા સંહિતા (BNSS)ની કલમ 163ને ગણાવ્યું છે. દિલ્હી પોલીસે કહ્યું કે CJPએ પ્રદર્શનની સૂચના મોડેથી આપી છે. 

દિલ્હી પોલીસના જોઇન્ટ સીપી નૂપુર પ્રસાદે કહ્યું , ‘અમને કોકરોચ જનતા પાર્ટીના સૌરવ દાસ તરફથી એક અરજી 10 ઓક્ટોબરે જંતર મંતર પર એક વિરોધ પ્રદર્શન માટેની સૂચનાના સંબંધમાં છે.  આ પ્રદર્શન સીઈસી (મુખ્ય ચૂંટણી કમિશનર) જ્ઞાનેશ કુમારની જવાબદેહી અંગે હતું… આ નોટિસ પર વિચાર કરવામાં આવ્યો, અને જાણવા મળ્યું કે નોટિસ ખૂબ જ ટૂંકા ગાળામાં આપવામાં આવી હતી, જ્યારે નિર્ધારિત માર્ગદર્શિકા મુજબ, આયોજિત પ્રદર્શનના 10 દિવસ પહેલાં નોટિસ મળી જવી જોઈતી હતી.’

‘ગઈ વખતે નિયમોનું પાલન કરવામાં આવ્યું ન હતું’

જોઇન્ટ સીપી નૂપુર પ્રસાદે આગળ કહ્યું, ‘એ ઉલ્લેખ કરવો પણ મહત્ત્વપૂર્ણ છે કે અગાઉના પ્રસંગે જ્યારે કૉકરોચ જનતા પાર્ટીને ત્યાં પ્રદર્શન યોજવાની મંજૂરી આપવામાં આવી હતી, ત્યારે તેઓએ કાનૂની નિર્દેશોનું પાલન કર્યું ન હતું અને તે સમયે આપેલી પોતાની જ ખાતરીઓનું પાલન કર્યું ન હતું… તેથી કાનૂની નિર્દેશોનું પાલન ન કરવા, પોતાની જ ખાતરીઓનું પાલન ન કરવા અને પ્રવર્તમાન કાયદો અને વ્યવસ્થાની પરિસ્થિતિને કારણે, તેમજ જાહેર સુરક્ષા, કાયદો અને વ્યવસ્થા તથા ટ્રાફિક વ્યવસ્થા જાળવી રાખવા માટે, આ વખતે મંજૂરી નકારવામાં આવી છે.’

‘પ્રદર્શનની મંજૂરી ન આપવાનો નિર્ણય’

જોઇન્ટ સીપી નૂપુર પ્રસાદે વધુમાં કહ્યું, ‘CJPના પ્રદર્શનને મંજૂરી આપવામાં આવી નથી… એ ઉલ્લેખ કરવો મહત્ત્વપૂર્ણ છે કે નવી દિલ્હી વિસ્તારમાં, BNSS (ભારતીય નાગરિક સુરક્ષા સંહિતા)ની કલમ 163 લાગુ છે, જે હેઠળ જાહેર વ્યવસ્થા અને સુરક્ષા જાળવી રાખવા માટે યોગ્ય નિવારક પ્રતિબંધો લાગુ છે… એ પણ મહત્ત્વનું છે કે જો કોઈ BNSS  કલમ 163ની જોગવાઈઓનું ઉલ્લંઘન કરશે, તો તેમની સામે યોગ્ય કાનૂની કાર્યવાહી કરવામાં આવશે.’

દિલ્હીમાં કાલે શું-શું બંધ રહેશે?

દિલ્હી મેટ્રો: 57 સ્ટેશનો પર એન્ટ્રી-એક્ઝિટ બંધ થઈ શકે છે

દિલ્હી પોલીસે DMRCને 57 મેટ્રો સ્ટેશનોના એન્ટ્રી અને એક્ઝિટ ગેટ બંધ રાખવા જણાવ્યું છે. આ પ્રતિબંધો શુક્રવારે રાત્રે 9 વાગ્યાથી લાગુ થવાના છે અને શનિવારે પરિસ્થિતિ સામાન્ય ન થાય ત્યાં સુધી ચાલુ રહી શકે છે.

રેલવે: સવારે 4 વાગ્યાથી બપોરે 2 વાગ્યા સુધી દિલ્હી પહોંચતી ટ્રેનો રદ

રેલવેએ શનિવાર એટલે કે 10 ઑક્ટોબરના રોજ સવારે 4 વાગ્યાથી બપોરે 2 વાગ્યા વચ્ચે નવી દિલ્હી અને હઝરત નિઝામુદ્દીન રેલવે સ્ટેશન પહોંચતી મેલ અને એક્સપ્રેસ ટ્રેનોને રદ કરવાનો આદેશ આપ્યો છે. આ આદેશ એવી ટ્રેનો પર લાગુ થાય છે જે શુક્રવારે બપોરે 2 વાગ્યા પછી પોતાના પ્રારંભિક સ્ટેશનથી રવાના થવાની હતી અને શનિવારે સવારે 4 વાગ્યાથી બપોરે 2 વાગ્યા વચ્ચે આ બંને સ્ટેશનો પર પહોંચતી હતી.

દારૂની દુકાનો: 9 અને 10 ઑક્ટોબરે બંધ

દિલ્હીમાં તમામ છૂટક દારૂની દુકાનો 9 અને 10 ઑક્ટોબરના રોજ બંધ રાખવાનો આદેશ આપવામાં આવ્યો છે. આબકારી વિભાગે જાહેર વ્યવસ્થા જાળવી રાખવા માટે સાવચેતીના પગલારૂપે આ નિર્ણય લીધો છે.

દિલ્હીની સરહદો પર તપાસ અને સુરક્ષા વધારાઈ

દિલ્હીના પ્રવેશ માર્ગો પર પોલીસની દેખરેખ વધારવામાં આવી છે. બહારથી આવતા લોકો અને વાહનોની તપાસ થઈ શકે છે. પોલીસે ભીડ એકઠી થવાની આશંકા ધરાવતા લોકોને રોકવા કે અટકાયતમાં લેવાની શક્યતા દર્શાવી છે. પ્રદર્શનને ધ્યાનમાં રાખીને કેન્દ્રીય સશસ્ત્ર પોલીસ દળોની 221 કંપનીઓ એટલે કે આશરે 23,000 જવાનોને 8 થી 12 ઑક્ટોબર વચ્ચે દિલ્હી પોલીસની સહાય માટે ઉપલબ્ધ કરાવવામાં આવ્યા છે.