મુંબઈઃ સેન્ટ્રલ બ્યુરો ઓફ ઇન્વેસ્ટિગેશન (CBI)એ 40.54 કરોડ રૂપિયાના રેલવે ટેન્ડર સાથે જોડાયેલા કથિત લાંચ કેસમાં મધ્ય રેલવેના ઇન્ડિયન રેલવે સર્વિસીસ ઓફ ઇલેક્ટ્રિકલ એન્જિનિયર્સ (IRSEE)ના એક વરિષ્ઠ અધિકારી અને બે ખાનગી વ્યક્તિઓની ધરપકડ કરી છે.
એજન્સીના જણાવ્યા અનુસાર સોમવારે સેન્ટ્રલ રેલવેના મુખ્ય વિદ્યુત વિતરણ ઇજનેર અને 2003 બેચના IRSEE અધિકારી રમેશ કુમાર ચૌવે અને અન્ય લોકો સામે કેસ નોંધવામાં આવ્યો હતો.
આ કેસ ખાનગી કંપનીને 40.54 કરોડ રૂપિયાના ટેન્ડર આપવામાં કથિત અનિયમિતતાઓ સાથે સંબંધિત છે. સીબીઆઈના જણાવ્યા અનુસાર, આરોપી અધિકારીએ ખાનગી કંપનીના હિસ્સેદારો પાસે ટેન્ડર પ્રક્રિયામાં કંપનીની તરફેણ કરવાના બદલામાં 40 લાખ રૂપિયાની લાંચ માંગી હતી.
એજન્સીએ છટકું ગોઠવીને ચૌવેને એક વ્યક્તિ પાસેથી લાંચના ભાગ રૂપે 10 લાખ રૂપિયા સ્વીકારતા રંગે હાથ પકડી પાડ્યો હતો. એજન્સીએ જણાવ્યું હતું કે અધિકારીના ચેમ્બરમાંથી 10 લાખ રૂપિયાની લાંચની રકમ મળી આવી હતી.
આ કેસમાં રેલવે અધિકારીની સાથે, બે વ્યક્તિઓ અંશુલ વર્મા અને કનય વર્મા ની પણ ધરપકડ કરવામાં આવી હતી. ધરપકડ બાદ, સીબીઆઈએ આરોપીઓ સાથે જોડાયેલા મુંબઈ, નવી મુંબઈ અને કર્જત સહિત પાંચ સ્થળોએ દરોડા પાડ્યા હતા.
રેલવે અધિકારીના નિવાસસ્થાને દરોડા દરમિયાન, તપાસકર્તાઓએ 90.79 લાખ રૂપિયા રોકડા, 241.30 ગ્રામ વજનના સોનાના દાગીના અને 2,577 ગ્રામ વજનના ચાંદીના દાગીના જપ્ત કર્યા હતા , જેની કુલ કિંમત આશરે 42.52 લાખ રૂપિયા થાય છે. એજન્સીએ રોકાણ સંબંધિત દસ્તાવેજો પણ જપ્ત કર્યા હતા.
વધુમાં, અધિકારીના કાર્યાલયમાંથી 3.85 લાખ રૂપિયાની રોકડ રકમ જપ્ત કરવામાં આવી હતી. આ કેસમાં કુલ જપ્તીનો અંદાજ આશરે 1.47 કરોડ રૂપિયા હોવાનો છે. તપાસ દરમિયાન એજન્સીએ અન્ય ગુનાહિત દસ્તાવેજો પણ જપ્ત કર્યા છે. આ કેસમાં વધુ તપાસ ચાલુ છે.
