ઓમાનના તટ પર પનામાના ધ્વજવાળા એક ઓઈલ ટેંકર પર હુમલા પછી તેના પર સવાર એક ભારતીય નાવિક લાપતા છે. ભારત સરકારના વિદેશ મંત્રાલયે આ હુમલાની નિંદા કરી છે અને જણાવ્યું છે કે MT El Gaia ના બાકીના 13 ભારતીય ક્રૂ સભ્યોને બચાવી લેવામાં આવ્યા છે. લાપતા ભારતીય નાગરિકની શોધખોળ અને બચાવ અભિયાન ચાલુ છે. ભારતે ભારતીય નાવિકોને બચાવવામાં મદદ કરવા બદલ ઓમાનના અધિકારીઓનો આભાર માન્યો.

મંત્રાલયે જણાવ્યું, "અમે આજે ઓમાનના તટ પર વેપારી જહાજ MT El Gaia પર થયેલા હુમલાની નિંદા કરીએ છીએ. જહાજ પર સવાર 14 ભારતીય ક્રૂ સભ્યોમાંથી 13 ભારતીયોને અત્યાર સુધી બચાવી લેવામાં આવ્યા છે. લાપતા ભારતીય નાગરિકની શોધખોળ અને બચાવ અભિયાન ચાલુ છે. ઓમાનમાં આપણું દૂતાવાસ પરિસ્થિતિ પર ઝીણવટભરી નજર રાખી રહ્યું છે અને બચાવ અભિયાનમાં ઓમાનના અધિકારીઓ સાથે સક્રિયપણે તાલમેલ બેસાડી રહ્યું છે."

વિદેશ મંત્રાલયે વધુમાં જણાવ્યું, "અમે તણાવને તુરંત ઘટાડવા અને ક્ષેત્રમાં શાંતિ લાવવા માટે વાતચીત અને કૂટનીતિ અપનાવવાની અમારી અપીલ દોહરાવીએ છીએ. આ ક્ષેત્રમાં જહાજો, નાવિકો, નાગરિકો અને માળખાકીય સુવિધાઓને નિશાન બનાવવું અસ્વીકાર્ય છે."

મહત્વનું છે કે મોટાભાગના જહાજો પર ભારતીય નાવિક હોય છે. શનિવારે બ્રિક્સ (BRICS) શિખર સંમેલનમાં ભાષણ આપતા પ્રધાનમંત્રી નરેન્દ્ર મોદીએ ક્ષેત્રીય સંઘર્ષોના કારણે સુરક્ષા જોખમોથી નાવિકોની સુરક્ષા માટે નાવિક  ઇમરજન્સી સહાયતા નેટવર્કનો પ્રસ્તાવ રાખ્યો. મહત્વનું છે કે મિડલ ઇસ્ટમાં જારી સંઘર્ષમાં અત્યાર સુધી મૃત્યુ પામેલા 16 ભારતીયોમાં 10 નાવિક સામેલ છે. જ્યારે કાળા સમુદ્રમાં જહાજો પર થયેલા હુમલામાં પાંચ અન્ય ભારતીય નાવિકોના મોત થયા છે.