Surat: એન્ટી કરપ્શન બ્યુરો (ACB)એ સુરતમાં 19 વર્ષના એક કોલેજ વિદ્યાર્થીની ધરપકડ કરી છે. સ્ટુડન્ટ સુરત જિલ્લા પંચાયતના કૃષિ વિભાગમાં સિનિયર એકાઉન્ટન્ટ તરીકે ફરજ બજાવતા તેમના માતા વતી કથિત રીતે ₹30,000ની લાંચ લેતા ઝડપાયો હતો. 

આ કાર્યવાહી એક ફરિયાદના આધારે કરવામાં આવી હતી, જેમાં એવો આક્ષેપ કરાયો હતો કે વર્ષ 2022 અને 2024 વચ્ચેના સમયગાળા માટે કર્મચારીઓના બાકી રહેલા ટ્રાન્સપોર્ટ એલાઉન્સ (TA - મુસાફરી ભથ્થું) અને લીવ ટ્રાવેલ કન્સેશન (LTC) ના ક્લેમ પાસ કરવા માટે ગેરકાયદેસર નાણાં (લાંચ) માંગવામાં આવી રહ્યા હતા.

એસીબી (ACB) ના અધિકારીઓના જણાવ્યા અનુસાર, વર્ગ-3 ના અધિકારી રૂપલ ટેલરે કથિત રીતે 33 કર્મચારીઓ પાસેથી TA બિલ પાસ કરવા માટે વ્યક્તિ દીઠ ₹1,500 અને 13 કર્મચારીઓ પાસેથી એલટીસી (LTC) ના ક્લેમ આગળ વધારવા માટે વ્યક્તિ દીઠ ₹1,000 એમ કુલ મળીને  ₹62,500ની લાંચ માંગી હતી.

ફરિયાદના આધારે કાર્યવાહી કરતા, એસીબી (ACB) એ ત્યારે છટકું ગોઠવ્યું જ્યારે ફરિયાદીએ રૂપલ ટેલરને જાણ કરી કે ₹30,000 ની વ્યવસ્થા થઈ ગઈ છે. ફરિયાદીને કથિત રીતે જહાંગીરાબાદમાં ઉગત-ભેસાણ રોડ પર આવેલા ઓમકાર હાઇટ્સ નજીક એક સ્થળે પહોંચવા માટે કહેવામાં આવ્યું.

ACB જણાવ્યું કે, રૂપલ ટેલરે કથિત રીતે તેમના પુત્ર જીલ ટેલર (જે BCA નો વિદ્યાર્થી છે) ને પૈસા લેવા માટે મોકલ્યો હતો, જ્યારે તે પોતે નજીકના એક મકાનમાં રોકાઇ હતી. એસીબી (ACB) ના અધિકારીઓએ જાહેર માર્ગ પર જ જીલને કથિત રીતે લાંચની રકમ સ્વીકારતા ઝડપી પાડ્યો હતો. 

ત્યારબાદ, એસીબીની ટીમો રૂપલ ટેલરના નિવાસસ્થાને પહોંચી હતી, જ્યાં તે મળી આવી હતી અને આગળની કાનૂની કાર્યવાહી માટે તેને કસ્ટડીમાં લીધી હતી. અધિકારીઓએ જણાવ્યું કે, ઔપચારિકતાઓ પૂર્ણ થયા બાદ તેમની સત્તાવાર રીતે ધરપકડ કરવામાં આવશે.

આ ટ્રેપ ઓપરેશન એસીબી સુરતના આસિસ્ટન્ટ ડાયરેક્ટર આર. આર. ચૌધરીના માર્ગદર્શન હેઠળ પોલીસ ઇન્સ્પેક્ટર કે. જે. ધાધુક દ્વારા હાથ ધરવામાં આવ્યું હતું.