મીરા-ભાયંદરથી વિરારની સફર થશે સુગમ, ₹ 17,725 કરોડના ખર્ચે 5 વર્ષમાં પ્રોજેક્ટ પૂર્ણ કરવાનો લક્ષ્યાંક

(અમારા પ્રતિનિધિ તરફથી)

મુંબઈ: એમએમઆર (MMR) ક્ષેત્રમાં ટ્રાફિકની સમસ્યા હળવી કરવા અને જાહેર પરિવહન વ્યવસ્થાને વધુ મજબૂત બનાવવા માટે રાજ્ય સરકારે ‘મેટ્રો લાઇન 13’ના મહત્વાકાંક્ષી પ્રોજેક્ટને મંજૂરી આપી છે. મુંબઈ મેટ્રોપોલિટન રિજન (એમએમઆર)માં જાહેર પરિવહન વ્યવસ્થાને વધુ મજબૂત બનાવવા માટે રાજ્ય સરકારે મેટ્રો લાઇન 13ના મહત્વાકાંક્ષી પ્રોજેક્ટને મંજૂરી આપી છે. આ લાઇન મીરા-ભાયંદરને વસઈ-વિરાર સાથે જોડશે, જેનાથી વસઈ-વિરારના રહેવાસીઓને જાહેર પરિવહનમાં રાહત થશે. આ કોરિડોર ટ્રાફિકને ઘટાડવાની સાથે સાથે રસ્તાઓના ઝડપી વિકલ્પ તરીકે કામ કરશે અને પશ્ચિમ ઉપનગરોમાં કનેક્ટિવિટી સુધારશે.

આ નિર્ણય મુખ્ય પ્રધાન દેવેન્દ્ર ફડણવીસની અધ્યક્ષતામાં મળેલી કેબિનેટ ઇન્ફ્રાસ્ટ્રક્ચર કમિટીની બેઠકમાં લેવામાં આવ્યો હતો. કમિટીએ પુણેના સોરાટાપવાડીથી વરવે-શિવરે રિંગ રોડ પ્રોજેક્ટને પણ મંજૂરી આપી હતી.

નવી મેટ્રો મીરા રોડ, નાયગાંવ, વસઈ, નાલાસોપારાને જોડશે

25.03 કિમી લાંબી મેટ્રો લાઇન 13 માટે અંદાજિત 17,724.99 કરોડ રૂપિયાનો ખર્ચ થશે. કુલ કોરિડોરમાંથી 21.78 કિમી એલિવેટેડ હશે, જ્યારે 3.25 કિમી ભૂગર્ભ હશે. આ નવી મેટ્રો લાઇન મીરા રોડ, નાયગાંવ, વસઈ, નાલાસોપારા અને વિરાર જેવા મહત્વપૂર્ણ વિસ્તારોને જોડશે. તે ઝડપથી વિકસતા એમએમઆર વિસ્તારમાં સીધી જાહેર પરિવહન સુવિધા પૂરી પાડશે.

વસઈ ખાડી પર છ લેનનો રોડ-મેટ્રો બ્રિજ બનાવવામાં આવશે

પ્રોજેક્ટની એક મહત્વપૂર્ણ વિશેષતા વસઈ ખાડી પર 4.92 કિમી લાંબો છ-લેનનો રોડ-કમ-મેટ્રો બ્રિજ હશે. આ બ્રિજ પાંજુ આઇલેન્ડને જોડશે. મેટ્રો સંચાલન માટે ચીખલ ડોંગરી ખાતે મેટ્રો ડેપો પણ બનાવવાની દરખાસ્ત છે. મેટ્રો લાઇન 13 નાયગાંવ, નાલાસોપારા અને વિરાર રેલવે સ્ટેશનોને સીધી કનેક્ટિવિટી આપશે. 

નેતાજી સુભાષચંદ્ર બોઝ સ્ટેડિયમ ખાતે આ લાઇન મેટ્રો લાઇન 9 સાથે જોડાશે, જેના કારણે હાલની અને આગામી મેટ્રો સેવાઓ સાથે ઇન્ટરચેન્જની સુવિધા મળશે. છેલ્લા તબક્કાની કનેક્ટિવિટી વધુ સારી બનાવવા માટે તમામ 16 મેટ્રો સ્ટેશનો પર બસ સેવા પણ ઉપલબ્ધ કરાવવાની યોજના છે.

સરકારનો પાંચ વર્ષમાં પૂર્ણ કરવાનો લક્ષ્યાંક

આ પ્રોજેક્ટ માટે આશરે 24.84 હેક્ટર જમીનની જરૂર પડશે. મુખ્ય પ્રધાન ફડણવીસે અધિકારીઓને આગામી છ મહિનામાં જમીન સંપાદન અને એપ્રોચ રોડનું કામ પૂર્ણ કરવા સૂચના આપી છે. સરકારે મંજૂરી મળ્યાની તારીખથી પાંચ વર્ષમાં મેટ્રો લાઇન 13 પૂર્ણ કરવાનો લક્ષ્યાંક નક્કી કર્યો છે. 
અધિકારીઓના અંદાજ મુજબ 2031 સુધીમાં દરરોજ આશરે 4.49 લાખ મુસાફરો આ મેટ્રોનો ઉપયોગ કરશે. પ્રોજેક્ટથી માર્ગ મુસાફરીનો સમય લગભગ 50 ટકા ઘટવાની શક્યતા છે, જેના કારણે મીરા-ભાયંદર અને વસઈ-વિરાર વચ્ચે મુસાફરી કરતા લોકોને મોટી રાહત મળશે.

જાહેર પરિવહન તરફ લોકોનો ઝુકાવ વધવાથી ખાનગી વાહનો પરની નિર્ભરતા ઘટશે, નેશનલ હાઇવે પરનો ટ્રાફિકનો ભાર ઓછો થશે અને કાર્બન ઉત્સર્જનમાં પણ ઘટાડો થવાની અપેક્ષા છે.સુધારેલી કનેક્ટિવિટીના કારણે આ વિસ્તારના ઔદ્યોગિક અને લોજિસ્ટિક્સ હબ્સને પણ લાભ મળી શકે છે, કારણ કે વિવિધ વ્યાવસાયિક કેન્દ્રો વચ્ચે અવરજવર વધુ ઝડપી અને કાર્યક્ષમ બનશે.