મુંબઈ: દક્ષિણ મુંબઈના વાલકેશ્વરમાં આવેલા ઐતિહાસિક બાણગંગા તળાવમાં સેંકડો મૃત માછલીઓ પાણી પર તરતી મળી આવી છે. ચાલુ પિતૃપક્ષ દરમિયાન તળાવમાં ધાર્મિક અર્પણો અને નિર્માલ્ય પધરાવવામાં આવ્યા બાદ આ સ્થિતિ સર્જાઈ હોવાની શક્યતા વર્તાવાઈ રહી છે. બીએમસીના ડી વોર્ડે પાણીમાંથી નિર્માલ્ય અને અર્પણો દૂર કરવાની કામગીરી શરૂ કરી છે.

માછલીઓના મોત બાદ બીએમસીએ તળાવમાં બાકી રહેલી જળચર સૃષ્ટિના રક્ષણ માટે પગલાં લીધાં છે. બાણગંગામાં પાણીની તપાસ અને તેમાં ઓક્સિજનનું પ્રમાણ વધારવા માટે નિષ્ણાતની મદદ લેવામાં આવી રહી છે. અત્રે ઉલ્લેખનીય છે કે પિતૃપક્ષ દરમિયાન માછલીઓના મોતની સમસ્યા અગાઉના વર્ષોમાં પણ સામે આવી ચૂકી છે.

આ વર્ષે પિતૃપક્ષ 26 સપ્ટેમ્બરથી 10 ઓક્ટોબર સુધી ચાલી રહ્યો છે. વાલકેશ્વરનું બાણગંગા તળાવ ઐતિહાસિક બાણગંગા કોમ્પ્લેક્સનો ભાગ છે અને સંરક્ષિત ઐતિહાસિક સ્થળ છે. ધાર્મિક માન્યતા મુજબ ભગવાન રામે અહીં પિતૃઓ માટે પિંડદાન કર્યું હતું. ‘વાલકેશ્વર’ નામ સંસ્કૃતના ‘વાલુકા’ એટલે રેતી અને ‘ઈશ્વર’ એટલે ભગવાન શબ્દો સાથે જોડાયેલું છે.

પિતૃપક્ષ દરમિયાન ધાર્મિક વિધિઓને કારણે તળાવમાં અર્પણો પધરાવવામાં આવતાં માછલીઓના મોતની સમસ્યા દર વર્ષે ચિંતાનો વિષય બની ગઈ છે. હાલ પાલિકાનું ધ્યાન તળાવમાંથી નિર્માલ્ય દૂર કરવા સાથે પાણીની ગુણવત્તા અને ઓક્સિજનનું પ્રમાણ સુધારીને બાકી રહેલી માછલીઓને બચાવવા પર પણ છે.