મુંબઈ/થાણે: ગણેશ ચતુર્થીને હવે ગણતરીના દિવસો બાકી રહ્યા છે ત્યારે મુંબઈ, થાણે અને પાલઘરમાં વસતા કોંકણવાસીઓમાં પોતાના વતન જવાની ઉત્સુકતા વધી છે. આ વર્ષે ગણેશ ચતુર્થીનો મુખ્ય તહેવાર સોમવાર 14 સપ્ટેમ્બરે ઉજવાશે. જેના પગલે ગણેશોત્સવ માટે પોતાના ગામ જવા ઈચ્છતા હજારો ગણેશભક્તોએ બસ અને અન્ય પરિવહનના વિકલ્પો અગાઉથી બુક કરાવવાનું શરૂ કરી દીધું છે.

બસમાં બુકિંગનો ધસારો વધશે
તહેવાર દરમિયાન કોંકણ તરફ મોટા પ્રમાણમાં પ્રવાસીઓ જતા હોવાથી થાણે અને આસપાસના વિસ્તારોમાં બસોની માંગમાં નોંધપાત્ર વધારો થયો છે. નોકરી કરતા લોકો માટે શુક્રવાર બપોર બાદ લાંબો વીકએન્ડ મળવાનો હોવાથી કોંકણ તરફ જતી બસો માટે બુકિંગનો ધસારો વધુ વધવાની શક્યતા છે.

684 બસનું રિઝર્વેશન થઈ ચૂક્યું 
મહારાષ્ટ્ર સ્ટેટ રોડ ટ્રાન્સપોર્ટ કોર્પોરેશન (એમએસઆરટીસી)એ ગણેશોત્સવ દરમિયાન પ્રવાસીઓની વધતી સંખ્યાને ધ્યાનમાં રાખીને વધારાની બસ વ્યવસ્થા કરી છે. ગણેશભક્તો માટે ગ્રુપ બુકિંગની સુવિધા લગભગ દોઢ મહિના અગાઉ શરૂ કરવામાં આવી હતી, જ્યારે વ્યક્તિગત ઓનલાઈન અને ઓફલાઈન બુકિંગ લગભગ બે મહિના અગાઉથી શરૂ કરવામાં આવ્યું હતું. 
થાણે જિલ્લાના આઠ મહત્વના ડેપોમાં અત્યાર સુધીમાં કુલ 684 બસોનું આરક્ષણ થઈ ચૂક્યું છે. તેમાં 370 ગ્રુપ બુકિંગ અને 314 સંપૂર્ણપણે આરક્ષિત બસોનો સમાવેશ થાય છે. થાણે સેન્ટ્રલ, થાણે -1 અને ભિવંડી સહિતના ડેપોમાં કોંકણ જવા માટે હજારોની સંખ્યામાં મુસાફરો બુકિંગ કરાવી રહ્યા છે.

2,302 ગ્રુપ બુકિંગ અને 369 વ્યક્તિગત ઓનલાઈન બુકિંગ
આ પ્રકરણે માહિતી આપતા એમએસઆરટીસીના અધિકારીઓએ જણાવ્યું હતું કે, ગણેશોત્સવને હવે માત્ર એક અઠવાડિયું બાકી હોવાથી આગામી દિવસોમાં ગ્રુપ બુકિંગની સંખ્યા હજુ વધવાની શક્યતા છે. જોકે, ગયા વર્ષની સરખામણીમાં અત્યાર સુધીનું બુકિંગ ઓછું છે. ગયા વર્ષે થાણેથી કુલ 2,302 ગ્રુપ બુકિંગ અને 369 વ્યક્તિગત ઓનલાઈન બુકિંગ નોંધાયા હતા. તેમ છતાં, અધિકારીઓને આશા છે કે તહેવાર નજીક આવતાં બુકિંગમાં ઝડપથી વધારો થશે.

એમએસઆરટીસી ઉપરાંત ખાનગી લક્ઝરી બસ ઓપરેટરો પાસે પણ કોંકણ જવા માટે ભારે માંગ જોવા મળી રહી છે. ખાસ કરીને એર કન્ડિશન્ડ સ્લીપર બસો માટે મુસાફરો બે મહિના અગાઉથી જ બુકિંગ કરાવી રહ્યા છે. ખાનગી લક્ઝરી બસોમાં કોંકણના વિવિધ સ્થળો માટે ભાડું રૂ. 2,000થી રૂ. 2,500 સુધી હોવાનું જાણવા મળે છે. આરામદાયક મુસાફરી અને સ્લીપર સુવિધાને કારણે આ બસોની માંગ પણ સતત વધી રહી છે.

ગણેશોત્સવ દરમિયાન મુસાફરોની સંખ્યા વધતાં પરિવહન ક્ષેત્રે સુરક્ષાને લઈને પણ ચિંતા ઊભી થઈ છે. થાણેના વંદના અને ખોપટ જેવા મુખ્ય પિકઅપ પોઈન્ટની બહાર કેટલાક અસંગઠિત ઓપરેટરો દ્વારા સ્કૂલ બસો જેવી અનધિકૃત અથવા અયોગ્ય વાહનોમાં મુસાફરોને કોંકણ લઈ જવામાં આવતા હોવાની ફરિયાદો સામે આવી છે. ભીડનો લાભ લઈને કેટલાક ઓપરેટરો ઓછા સલામત અને ભીડભાડવાળા વાહનોમાં મુસાફરોને લઈ જતા હોવાની શક્યતા હોવાથી મુસાફરોને સાવચેત રહેવા અપીલ કરવામાં આવી છે. અધિકારીઓ અને બસ ઓપરેટરોનું કહેવું છે કે માત્ર અધિકૃત અને યોગ્ય રીતે સંચાલિત બસોમાં જ મુસાફરી કરવી જોઈએ.

ગણેશ ચતુર્થી પહેલાં હવે માત્ર થોડા દિવસો બાકી હોવાથી થાણે, મુંબઈ અને પાલઘરમાંથી કોંકણ તરફ જતી બસો માટે બુકિંગનો ધસારો આગામી દિવસોમાં વધુ વધે તેવી શક્યતા છે. એમએસઆરટીસી દ્વારા વધારાની બસોની વ્યવસ્થા કરવામાં આવી રહી છે, જ્યારે ખાનગી લક્ઝરી બસોમાં પણ મોટા ભાગની સીટો અગાઉથી બુક થઈ ગઈ છે. 

કોંકણવાસીઓ માટે ગણેશોત્સવ માત્ર ધાર્મિક તહેવાર નથી, પરંતુ પરિવાર અને વતન સાથે જોડાવાનો મહત્વનો અવસર પણ છે. તેથી દર વર્ષની જેમ આ વર્ષે પણ ગણેશોત્સવ દરમિયાન મુંબઈ મેટ્રોપોલિટન વિસ્તારથી કોંકણ તરફ મોટાપાયે મુસાફરી થવાની શક્યતા છે.