* મુખ્ય પ્રધાન દેવેન્દ્ર ફડણવીસે ઉચ્ચ સ્તરીય બેઠકમાં નિર્ણય લીધો, પ્રધાનો અને અધિકારીઓના વિદેશ પ્રવાસ રદ
* વીડિયો કોન્ફરન્સિંગ દ્વારા મોટાભાગની બેઠકો યોજવા સૂચનાઓ
* પ્રધાનો અને અધિકારીઓને ઓછામાં ઓછા એક દિવસ જાહેર પરિવહનનો ઉપયોગ કરવાની સૂચના
(અમારા પ્રતિનિધિ તરફથી)
મુંબઈ: ઇંધણ અને વિદેશી હૂંડિયામણ બચાવવા માટે વડા પ્રધાન નરેન્દ્ર મોદી દ્વારા કરવામાં આવેલી અપીલનો પ્રતિસાદ આપતાં મુખ્ય પ્રધાન દેવેન્દ્ર ફડણવીસે બે ઉચ્ચ સ્તરીય બેઠકોમાં વિવિધ પગલાંઓની સમીક્ષા કરી અને તે મુજબ મુખ્ય પ્રધાન સહિત તમામ પ્રધાનોના કાફલામાં વાહનોની સંખ્યા અડધી કરવાની સૂચનાઓ આપવામાં આવી હતી.
આ પ્રસંગે મુખ્ય સચિવ, પોલીસ ડીજી અને અન્ય વરિષ્ઠ અધિકારીઓ હાજર રહ્યા હતા. મુખ્ય પ્રધાન સહિત તમામ પ્રધાનોના કાફલામાં વાહનોની સંખ્યા તાત્કાલિક અસરથી અડધી કરવાનો આદેશ અપાયો હતો. સંબંધિત પોલીસ કમિશનર અથવા પોલીસ સુપરિન્ટેન્ડેન્ટ પ્રવાસ દરમિયાન કાફલામાં વાહનોની સંખ્યા નિર્ધારિત સંખ્યા કરતાં વધુ ન થાય તેની સુનિશ્ર્ચિત કરવા માટે જવાબદાર રહેશે.
પ્રધાનો અને અધિકારીઓએ કોઈપણ વિદેશ પ્રવાસ ન કરવો. જ્યાં સુધી ખુબ જ જરૂરી ન હોય ત્યાં સુધી પ્રધાનોએ સરકારી વિમાનો અને હેલિકોપ્ટરનો ઉપયોગ ન કરવો, પરંતુ નિયમિત હવાઈ સેવાઓનો ઉપયોગ કરવો. પ્રધાનો અને અધિકારીઓએ મેટ્રો જેવા જાહેર પરિવહનનો ઉપયોગ વધારવો. આ પ્રયોગ પ્રથમ તબક્કામાં ઓછામાં ઓછો એક દિવસ માટે કરવો જોઈએ. અધિકારીઓને મીટિંગમાં બોલાવવાને બદલે, વિડિઓ કોન્ફરન્સિંગ દ્વારા મીટિંગો યોજવી. સરકારને વિતરિત વાહનોની વિગતવાર સમીક્ષા કરવી, એવા આદેશ આ બેઠકમાં મુખ્ય પ્રધાને આપ્યા હતા.
મુખ્ય પ્રધાન દેવેન્દ્ર ફડણવીસે આ મીટિંગમાં એવો પણ નિર્દેશ આપ્યો છે કે ઉર્જા સંરક્ષણ માટે બિનજરૂરી હોર્ડિંગ્સ/ફ્લેક્સ સામે કાર્યવાહી કરવામાં આવે અને ત્યાં સુશોભન લાઇટિંગનો ઉપયોગ ન થાય તેની કાળજી લેવામાં આવે.
