મુંબઈઃ મહારાષ્ટ્રના ભિવંડીમાં પાણી ભરાયેલા રસ્તાઓ પર ખાડાઓ ઓળંગવામાં લોકોને મદદ કરી રહેલા 'સ્પાઈડરમેન'ના પોશાકવાળા એક વ્યક્તિનો વીડિયો સોશિયલ મીડિયા પર વાયરલ થયો છે.
સોમવારે થાણે જિલ્લામાં ભારે વરસાદને કારણે ભિવંડી અને આસપાસના વિસ્તારોમાં પાણી ભરાઈ ગયા હતા. આ દરમિયાન શાદાબ મોમીન નામના એક કન્ટેન્ટ ક્રિએટરે સ્પાઈડરમેનનો પોશાક પહેરીને લોકોને મદદ કરવાનું શરૂ કર્યું હતું.
વીડિયોમાં શાદાબ બે બાળકોને પોતાના ખભા પર બેસાડીને પાણી ભરાયેલા રસ્તા પરથી સુરક્ષિત રીતે બહાર કાઢતો જોવા મળે છે. તે પૂર જેવા ભરાયેલા પાણીમાંથી વાહનોને આગળ વધારવામાં મદદ કરતો પણ દેખાય છે.
મોમીને જણાવ્યું કે તેનો હેતુ માત્ર મદદ કરવાનો જ નથી, પણ રોડ મરામત અને ગટર સફાઈ પાછળ દર વર્ષે કરોડો રૂપિયા ખર્ચાતા હોવા છતાં દર ચોમાસે ભરાતા પાણીની નાગરિક સમસ્યા તરફ તંત્રનું ધ્યાન દોરવાનો પણ છે.
