(અમારા પ્રતિનિધિ તરફથી)
અમદાવાદ: અમદાવાદ મ્યુનિસિપલ કોર્પોરેશન (એએમસી) દ્વારા આગામી સપ્તાહથી શહેરભરમાં રખડતા શ્વાનોની ગણતરી હાથ ધરવામાં આવશે. સુપ્રીમ કોર્ટના નિર્દેશોનું પાલન કરતા, આ સર્વેની શરૂઆત પાલડી વોર્ડથી કરવામાં આવશે અને ત્યારબાદ તબક્કાવાર રીતે તમામ 48 વોર્ડ આવરી લેવાશે. નવ મહિના સુધી ચાલનારી આ કવાયત માટે ત્રણ સ્વયંસેવકોની બનેલી ખાસ ટીમો તૈનાત કરવામાં આવી છે, જે અંદાજિત 2.10 લાખ રખડતા શ્વાનોની ગણતરી હાથ ધરશે તેમ સૂત્રોએ જણાવ્યું હતું.
મળતી વિગતો અનુસાર, આ ગણતરી માટે ટેકનોલોજીનો ઉપયોગ કરવામાં આવશે, જેમાં એક મોબાઈલ એપ્લિકેશન દ્વારા રીઅલ-ટાઇમ ડેટા એકત્ર કરવામાં આવશે. દરેક રખડતા શ્વાનનું જીઓ-ટેગિંગ કરવામાં આવશે અને તેનો ફોટોગ્રાફ પાડવામાં આવશે. આ સાથે જ તેની ઉંમર, લિંગ, સ્વાસ્થ્યની સ્થિતિ અને નસબંધી થઈ છે કે નહીં તેની વિગતો નોંધવામાં આવશે. ખાસ કરીને છ મહિનાથી ઓછી ઉંમરના ગલુડિયાઓની અલગ શ્રેણી બનાવવામાં આવશે, જેથી એનિમલ બર્થ કંટ્રોલ કાર્યક્રમને વધુ અસરકારક બનાવી શકાય.
અત્રે ઉલ્લેખનીય છે કે શહેરમાં શ્વાન કરડવાની વધતી જતી ઘટનાઓ, જેનો આંકડો દર મહિને આશરે 5,000 સુધી પહોંચ્યો છે, તેને જોતા આ કામગીરી અત્યંત મહત્વની બની છે. મનપાના અંદાજ મુજબ 1.90 લાખ શ્વાનોની નસબંધી થઈ ચૂકી છે, પરંતુ આવાસની સુવિધા હજુ પણ અપૂરતી છે. હાલમાં શહેરના આશરે 8,000 થી 10,000 શ્વાનોની ક્ષમતા ધરાવતા 6-8 શેલ્ટર્સ છે, પરંતુ કોર્ટના આદેશ મુજબ રખડતા શ્વાનોને શેલ્ટરમાં ખસેડવા માટે વધુ 10-12 નવા શેલ્ટર્સ અને નસબંધી કેન્દ્રોના વિસ્તરણની તાતી જરૂરિયાત ઊભી થઈ છે.
