નવી દિલ્હીઃ મેસેજિંગ એપ ટેલિગ્રામની ભારતમાં વાપસી થઈ છે. એક અઠવાડિયાનો સરકારી કામચલાઉ પ્રતિબંધ સમાપ્ત થતા સર્વિસ ફરી શરૂ થઈ હતી. આ એપ ફરીથી ગૂગલ પ્લે સ્ટોર પર ઉપલબ્ધ થઈ હતી. 
જોકે તે થોડા કલાકો સુધી એપલ એપ સ્ટોર પર ઉપલબ્ધ નહોતી. મંગળવારે સવારે કેટલાક હાલના યુઝર્સ માટે એપ ફરીથી રિસ્ટોર કરવામાં આવી હતી પરંતુ લગભગ 12 વાગ્યા સુધીમાં તે એપલ એપ સ્ટોરમાં ઉપલબ્ધ નહોતી. આ મામલે એપલે તાત્કાલિક કોઈ ટિપ્પણી કરી ન હતી.

જોકે, હાલના એપલ આઇફોન યુઝર્સ મેસેજિંગ સેવાનો ઉપયોગ કરી શકે છે. સરકારે નેશનલ એલિજિબિલિટી કમ એન્ટ્રન્સ ટેસ્ટ (નીટ-યુજી ) પુનઃપરીક્ષા પ્રશ્નપત્ર લીક થવાથી રોકવા માટે 22 જૂન સુધીમાં તેમના એપ સ્ટોર્સમાંથી ટેલિગ્રામ એપ દૂર કરવા માટે ગૂગલ અને એપલને નિર્દેશ આપ્યો હતો.

ટેલિગ્રામે આ કામચલાઉ પ્રતિબંધને દિલ્હી હાઈ કોર્ટમાં પડકાર્યો હતો. જો કે, શુક્રવારે કોર્ટે ચુકાદો આપ્યો હતો કે આ પ્રતિબંધ કાયદેસર, સંતુલિત અને પરીક્ષાની ન્યાયીતા જાળવવા માટે જરૂરી હતો. કોર્ટે એ દલીલ ફગાવી દીધી હતી કે સરકારે મનસ્વી રીતે કાર્યવાહી કરી છે. સૂત્રોના જણાવ્યા અનુસાર, સરકારી આદેશમાં કોઈ વિસ્તરણ અથવા સંશોધન કરવામાં આવ્યો નહોતો.

આ પરીક્ષા દેશભરની અંડરગ્રેજ્યુએટ મેડિકલ સંસ્થાઓમાં પ્રવેશ માટે નેશનલ ટેસ્ટિંગ એજન્સી (એનટીએ) દ્વારા લેવામાં આવે છે. પ્રશ્નપત્ર લીકના આરોપોને પગલે એજન્સીએ 3 મેના રોજ યોજાયેલી છેલ્લી પરીક્ષા રદ કરી હતી. 

વધુમાં એક અલગ નિર્દેશમાં ટેલિગ્રામને પ્રશ્નપત્ર લીક સંબંધિત કેસોમાં પુરાવાના દુરુપયોગને રોકવા માટે 30 જૂન સુધીમાં ભારતમાં પહેલાથી મોકલવામાં આવેલા મેસેજને એડિટ કરવાની સુવિધાને બંધ કરવાનું કહેવામાં આવ્યું છે. 

પ્રતિબંધ લાદવામાં આવે તે પહેલાં સરકારી અધિકારીઓ 3 જૂને ટેલિગ્રામના પ્રતિનિધિઓ સાથે મળ્યા હતા અને તેમની સમક્ષ આ ચિંતાઓ ઉઠાવવામાં આવી હતી.