મુંબઈઃ નાગરાજ મંજુલેની હ્રદયસ્પર્શી વાસ્તવિક પ્રેમકથા પર આધારિત 'સૈરાટ' 2016માં થિયેટરમાં રિલીઝ થઇ હતી. આ મરાઠી રોમેન્ટિક ડ્રામા ફિલ્મમાં રિંકુ રાજગુરુ અને આકાશ થોસરે શ્રેષ્ઠ અભિનય કર્યો હતો. જાતિગત ભેદભાવની પૃષ્ઠભૂમિ પર બનેલી આ ફિલ્મને દર્શકો તરફથી જબરદસ્ત પ્રતિસાદ મળ્યો અને તે બોક્સ ઓફિસ પર બ્લોકબસ્ટર સાબિત થઇ હતી. વધુમાં, તે ભારતની અત્યાર સુધીની સૌથી વધુ કમાણી કરનારી મરાઠી ફિલ્મ પણ બની હતી.

રિલીઝ થયા પછી સૈરાટે તેના નરેશન, દિગ્દર્શન, સંગીત, ઈમોશનલ વાર્તા અને શાનદાર અભિનયથી દર્શકો અને વિવેચકો બંનેના દિલ જીતી લીધા હતા. રસપ્રદ વાત એ છે કે, આ ફિલ્મમાં કોઈ જાણીતા કલાકારો નહોતા કે તેનું પ્રેમોશન પણ કરવામાં આવ્યું નહોતું. તેમ છતાં, આ ફિલ્મને દર્શકો તરફથી સારો પ્રતિસાદ મળ્યો અને તેણે બોક્સ ઓફિસ પર કમાણીના તમામ રેકોર્ડ તોડી નાખ્યા હતા.આ ફિલ્મ બ્લોકબસ્ટર સાબિત થઈ અને માત્ર 4 કરોડ રૂપિયાના બજેટમાં બનેલી આ ફિલ્મે વિશ્વભરમાં 110 કરોડ રૂપિયાની કમાણી કરી અને આજે પણ તે અત્યાર સુધીની સૌથી વધુ કમાણી કરનારી મરાઠી ફિલ્મ છે.  આ ફિલ્મે 2650 ટકાનો નફો મેળવ્યો, એટલે કે તેણે તેના ખર્ચ કરતાં 27 ગણી કમાણી કરી.

દર્શકોને માત્ર ફિલ્મની વાર્તા જ નહીં, પરંતુ "સૈરાટ" ના ગીતો પણ ખૂબ જ પસંદ આવ્યા હતા. ખાસ કરીને, અજય અને અતુલ દ્વારા ગવાયેલ અને લખાયેલ "ઝિંગાટ" એ આખા દેશમાં  સનસનાટી મચાવી હતી. આજે પણ, આ ગીત નાનામોટા સૌને પ્રિય છે, અને જ્યારે પણ તે વાગે છે, ત્યારે લોકો નાચ્યા વગર રહી શકતા નથી.

સૈરાટની સ્ટોરી જાણો?
નાગરાજ મંજુલે દ્વારા દિગ્દર્શિત, "સૈરાટ" માં રિંકુ રાજગુરુ અને આકાશ થોસર અર્ચના આર્ચી પાટિલ અને પ્રશાંત પર્શ્ય કાલે તરીકે ડેબ્યૂ કરે છે. ફિલ્મમાં આર્ચી અને પર્શ્યના પ્રેમમાં પડે છે, પરંતુ તેમના પ્રેમમાં તેમની અલગ જાતિઓ અવરોધરૂપ બને છે. આર્ચીનો પરિવાર તેમની પુત્રીના નીચલી જાતિના યુવક સાથેના સંબંધનો વિરોધ કરે છે. પછી બંને બીજા શહેરમાં ભાગી જાય છે અને લગ્ન કરે છે. તેઓ એક પુત્ર, આકાશના માતાપિતા બને છે, પરંતુ થોડા વર્ષો પછી, આર્ચીનો નાનો ભાઈ, પ્રિન્સ, તેમને શોધી કાઢે છે અને તેમની હત્યા કરે છે. આઘાતજનક ક્લાઈમેક્સમાં આકાશને તેમના મૃતદેહ મળે છે.

સૈરાટએ નવ વર્ષ સુધી સૌથી વધુ કમાણી કરનાર મરાઠી ફિલ્મનો રેકોર્ડ પોતાના નામે રાખ્યો હતો. પરંતુ હવે, રિતેશ દેશમુખની ઐતિહાસિક ડ્રામા ફિલ્મ "રાજા શિવાજી" આ રેકોર્ડ તોડવાની તૈયારીમાં છે. 

સૈરાટએ ભારતમાં ₹ 90 કરોડનું કલેક્શન કર્યું હતું. દરમિયાન, રિતેશની 'રાજા શિવાજી' ફિલ્મે 17 દિવસમાં ₹ 85 કરોડની કમાણી કરી લીધી છે. ફક્ત ₹ 5 કરોડ વધુ કમાણી સાથે, 'રાજા શિવાજી' સૈરાટને પાછળ છોડી દેશે. એવી અપેક્ષા છે કે રિતેશ દેશમુખ અભિનીત આ ફિલ્મ એક કે બે દિવસમાં આ રેકોર્ડ તોડી નાખશે અને સૌથી વધુ કમાણી કરનારી મરાઠી ફિલ્મ બનશે.