જયપુર: રાજસ્થાનના હવામાનમાં આજે બપોર પછી અચાનક મોટો પલટો જોવા મળ્યો છે. ચુરુ, બીકાનેર અને સાદુલપુર સહિતના આસપાસના વિસ્તારોમાં જોતજોતામાં ભારે ગતિએ ધૂળનું વાવાઝોડું (Dust Storm) ત્રાટક્યું છે. આ રેતીના તોફાને સમગ્ર વિસ્તારમાં ભારે અફરાતફરીનો માહોલ સર્જ્યો હતો. વાવાઝોડું એટલું ભયાનક છે કે આકાશમાં ધૂળના ગોટેગોટા ઉડવા લાગ્યા હતા, જેના કારણે દિવસના સમયે જ રાત જેવો નજારો જોવા મળ્યો હતો અને આખું આકાશ લાલચોળ દેખાવા લાગ્યું હતું.
ભયાનક બવંડરથી જનજીવન પ્રભાવિત
સ્થાનિક લોકોના જણાવ્યા અનુસાર, માત્ર થોડી જ મિનિટોમાં હવામાનનો મિજાજ સંપૂર્ણપણે બદલાઈ ગયો હતો. અચાનક આવેલા આ પ્રચંડ બવંડરને કારણે રસ્તા પર જઈ રહેલા વાહનચાલકો ભારે મુશ્કેલીમાં મુકાયા હતા. વિઝિબિલિટી (દ્રશ્યતા) શૂન્ય સમાન થઈ જતાં વાહનો થંભી ગયા હતા અને લોકોએ બચવા માટે સુરક્ષિત સ્થળોએ આશરો લેવો પડ્યો હતો.
pic.twitter.com/ToIEbKO1a4 રાજસ્થાનમાં સીકર સાથે ચુરુ અને બિકાનેરમાં પણ ધૂળની આંધી, લોકો ભયભીત#RajasthanUpdates #Churu #Bikaner
— MG Vimal - વિમલ પ્રજાપતિ (@mgvimal_12) May 30, 2026
રેતના વાવાઝોડાની મુખ્ય અસરોની વાત કરવામાં આવે તો, ચુરુ, બીકાનેર, સાદુલપુર અને આસપાસના ગ્રામીણ વિસ્તારોમાં તેની અસર વધારે થઈ છે. તેજ પવનના કારણે બજારોમાં પણ લોકોની અવરજવર બંધ થઈ ગઈ હતી. દુકાનદારોએ સાવચેતીના ભાગરૂપે પોતાની દુકાનોની બહાર રાખેલો સામાન અંદર ખસેડી લીધો હતો. ગ્રામીણ વિસ્તારોમાં પણ આ તીવ્ર પવનને કારણે ખેડૂતો અને પશુપાલકોને ભારે હાલાકી ભોગવવી પડી હતી.
pic.twitter.com/1dj5tzx9EY રાજસ્થાનના સીકરમાં ધૂળની તોફાની આંધી
— MG Vimal - વિમલ પ્રજાપતિ (@mgvimal_12) May 30, 2026
બિનજરૂરી રીતે ઘરોની બહાર ન નીકળવા અપીલ
જો કે, અત્યાર સુધી કોઈ મોટી જાનહાનિના અહેવાલ મળ્યા નથી, પરંતુ જુદા જુદા વિસ્તારોમાંથી માલસામાનના નુકસાનના અહેવાલો સતત સામે આવી રહ્યા છે. આ અચાનક આવેલા હવામાન પલટાને કારણે લોકોને છેલ્લા ઘણા સમયથી પડી રહેલી અસહ્ય અને કાળઝાળ ગરમીથી ચોક્કસપણે થોડી રાહત મળી છે અને તાપમાનમાં ઘટાડો નોંધાયો છે. સ્થાનિક વહીવટીતંત્ર અને સંબંધિત વિભાગો દ્વારા સમગ્ર પરિસ્થિતિ પર ઝીણવટભરી નજર રાખવામાં આવી રહી છે. તંત્ર દ્વારા નાગરિકોને ખરાબ હવામાન દરમિયાન સંપૂર્ણ સાવચેતી રાખવા અને બિનજરૂરી રીતે ઘરોની બહાર ન નીકળવાની કડક સલાહ આપવામાં આવી છે.
