મુંબઈ: બોલીવુડની ડાન્સિંગ ક્વીન નોરા ફતેહી તેના ડાન્સ મૂવ્સ માટે જાણીતી છે, પરંતુ આ વખતે તેની આગામી ફિલ્મ 'કેડી: ધ ડેવિલ'નું નવું ગીત 'સરકે ચુનર તેરી સરકે' વિવાદોનું કેન્દ્ર બન્યું છે. રવિવારે રિલીઝ થયેલા આ ગીતને લઈને પ્રેક્ષકોમાં ભારે રોષ જોવા મળી રહ્યો છે. ગીતના શબ્દો અને ડાન્સ સ્ટેપ્સને લઈને સોશિયલ મીડિયા પર તીખી પ્રતિક્રિયાઓ આવી રહી છે. ઘણા યુઝર્સનું માનવું છે કે મનોરંજનના નામે પીરસવામાં આવતી સામગ્રીમાં હવે મર્યાદાઓ ઓળંગાઈ રહી છે, જેના કારણે આ ગીત અત્યારે ઓનલાઇન બેકલેશનો સામનો કરી રહ્યું છે.

'સરકે ચુનર તેરી સરકે' ગીતના લિરિક્સ સામે લોકોએ સૌથી વધુ વાંધો ઉઠાવ્યો છે. ગીતની સેટિંગ એક ડાન્સ બાર જેવી રાખવામાં આવી છે, જ્યાં નોરા ફતેહી સંજય દત્ત સાથે જોવા મળે છે. ગીતના લિરિકલ વીડિયોમાં વપરાયેલા શબ્દોને યુઝર્સે 'ચીપ' અને 'અશ્લીલ' ગણાવ્યા છે. નેટીઝન્સ પ્રશ્ન ઉઠાવી રહ્યા છે કે 2026ના યુગમાં પણ આ પ્રકારની ફિલ્મી સામગ્રી કેવી રીતે બની શકે? કેટલાક યુઝર્સ તો આ ગીત પર પ્રતિબંધ મૂકવાની પણ માંગ કરી રહ્યા છે, કારણ કે તેમાં વપરાયેલા શબ્દો અને એક્ટિંગ અસહ્ય હોવાનો દાવો કરવામાં આવ્યો છે.

I am genuinely at a loss of words. Wish I could unhear it 🙉 https://t.co/HpXAplbGIn

— ARMAAN ✦ (@ArmaanMalik22) March 16, 2026

આ વિવાદમાં બોલીવુડના જાણીતા સિંગર અરમાન મલિકે પણ ઝંપલાવ્યું છે. તેણે 'X' (અગાઉ ટ્વિટર) પર પોતાની નિરાશા વ્યક્ત કરતા લખ્યું કે, કમર્શિયલ ગીતો લખવાનું સ્તર આટલું નીચું આવી ગયું છે તે જોઈને દુઃખ થાય છે. અરમાને એમ પણ કહ્યું કે તે ઈચ્છે છે કે તેણે આ ગીત સાંભળ્યું જ ન હોત. ગીતકાર રકીબ આલમ અને સંગીતકાર અર્જુન જન્યાને પણ આ કનિષ્ઠ કક્ષાના લખાણ માટે લોકોની ટીકાઓનો સામનો કરવો પડી રહ્યો છે. સિંગર મંગલીના અવાજમાં ગવાયેલા આ ગીતે સંગીત જગતમાં નવી ચર્ચા છેડી દીધી છે.

This showed up on my timeline and I had to replay it just to make sure I heard it right. Sad to see commercial songwriting hit a new low.. https://t.co/BMMABqblnW

— ARMAAN ✦ (@ArmaanMalik22) March 16, 2026

માત્ર નોરા જ નહીં, પરંતુ આ ગીતમાં સંજય દત્તની હાજરી જોઈને પણ ફેન્સ નિરાશ થયા છે. સોશિયલ મીડિયા પર ચાહકો કહી રહ્યા છે કે સંજય દત્ત જેવા દિગ્ગજ અભિનેતા પાસેથી આવી અપેક્ષા નહોતી. કેવીએન પ્રોડક્શનના બેનર હેઠળ બનેલી અને પ્રેમ દ્વારા નિર્દેશિત આ ફિલ્મ 'કેડી: ધ ડેવિલ' ૩૦ એપ્રિલે સિનેમાઘરોમાં રિલીઝ થવાની છે. આ ફિલ્મમાં ધ્રુવ સરજા લીડ રોલમાં છે, જ્યારે શિલ્પા શેટ્ટી પણ મહત્વની ભૂમિકામાં જોવા મળશે. જોકે, રિલીઝ પહેલા જ આ ગીતે ફિલ્મ માટે મુશ્કેલીઓ ઊભી કરી દીધી હોય તેમ જણાય છે.