ગરમી અને પાણીની અછતને કારણે પાકને નુકસાન, શાકભાજીની આવક ઘટતા ગૃહિણીઓનું બજેટ ખોરવાયું
મુંબઈઃ હાલમાં ફુગાવો રેકોર્ડ સ્તરે પહોંચી ગયો છે. એલપીજી ગેસ, દૂધ, સોનું અને ચાંદી પછી હવે પેટ્રોલ અને ડીઝલમાં વધારો કરવામાં આવ્યો છે. આ પછી મહારાષ્ટ્રમાં મુંબઈ, નવી મુંબઈ અને સમગ્ર મુંબઈ મેટ્રોપોલિટન રિજનમાં ભીષણ ગરમીની સીધી અસર સામાન્ય માણસના પોકેટ પર પડવા લાગી છે, જેમાં હવે શાકભાજીના ભાવ આસમાને પહોંચ્યા
મુંબઈ અને એમએમઆર વિસ્તારોમાં શાકભાજીના ભાવમાં 50 ટકાનો વધારો થયો છે. ભીષણ ગરમી, પાણીની અછત અને ઘટેલી આવકને કારણે શાકભાજીના ભાવમાં વધારો થયો છે. વાશીમાં કૃષિ ઉત્પાદન બજાર સમિતિ (એપીએમસી) ખાતે શાકભાજીના આવકમાં 20 થી 30 ટકાનો ઘટાડો થતાં છૂટક બજારમાં ભાવ આસમાને પહોંચ્યા છે.
રાજ્યના પુણે, સતારા, સોલાપુર અને નાસિક જેવા મુખ્ય કૃષિ પટ્ટામાં તાપમાનમાં વધારો થયો છે. જેના કારણે પાકને ભારે નુકસાન થઈ રહ્યું છે. ઉપરાંત, હાલમાં ઘણા વિસ્તારોમાં પાણીની અછત છે. આનાથી ઉત્પાદન પર પણ વિપરીત અસર પડી છે. આ ઉપરાંત, લાંબા અંતરથી આવતા શાકભાજી ગરમીને કારણે પરિવહન દરમિયાન ઝડપથી બગડી રહ્યા છે. જેના કારણે વેપારીઓની ચિંતામાં વધારો થયો છે.
બજારના નિષ્ણાતોના મતે ચોમાસાના આગમન અને નવો પાક આવવાનું શરૂ ન થાય ત્યાં સુધી શાકભાજીના ભાવ ઊંચા રહેવાની શક્યતા છે. વધતી જતી મોંઘવારીએ સામાન્ય માણસના ખિસ્સા પર ભારે અસર કરી છે અને મે મહિનાના અંત સુધીમાં પરિસ્થિતિ વધુ ખરાબ થવાની શક્યતા છે.
મુંબઈના દાદર, અંધેરી અને બોરીવલી જેવા મુખ્ય બજારોમાં શાકભાજીના ભાવ આસમાને પહોંચી ગયા છે. આના કારણે ગૃહિણીઓનું બજેટ ખોરવાઈ ગયું છે. એક તરફ, કાળઝાળ ગરમી અને બીજી તરફ, શાકભાજીના ભાવમાં વધારાને કારણે થાળીમાંથી પાંદડાવાળા શાકભાજી ગાયબ થઈ ગયા છે અને હવે લોકોએ કઠોળ પર આધાર રાખવો પડી રહ્યો છે, ઘણા ગ્રાહકોએ પોતાની પ્રતિક્રિયા વ્યક્ત કરી છે. આ ઉપરાંત, હોટેલ માલિકોએ પણ કાચા માલની વધતી કિંમતને કારણે ખાદ્ય પદાર્થોના ભાવમાં વધારો કરવાનો સંકેત આપ્યો છે.
