નવી દિલ્હી: હૉકી ઇન્ડિયાએ ઓસ્ટ્રેલિયા પ્રવાસ માટે ભારતીય મહિલા હૉકી ટીમની જાહેરાત કરી છે. અનુભવી મિડફિલ્ડર સલીમા ટેટેની કેપ્ટનશીપમાં સોમવારે ઓસ્ટ્રેલિયા પ્રવાસ માટે પસંદ કરાયેલી ભારતીય મહિલા ટીમમાં ફોરવર્ડ ખેલાડી લલથાંતલુઆંગીને તક મળી છે. 

26થી 30 મે દરમિયાન પર્થમાં યોજાનાર આ પ્રવાસને પંદરથી 21 જૂન દરમિયાન ઓકલેન્ડમાં યોજાનાર એફઆઈએચ મહિલા હૉકી નેશન્સ કપ 2025-26 ની તૈયારીઓનો એક મહત્વપૂર્ણ ભાગ માનવામાં આવે છે.

ભારતીય ટીમ સંપૂર્ણ આત્મવિશ્વાસ સાથે આ પ્રવાસમાં ઉતરશે. આ વર્ષની શરૂઆતમાં આર્જેન્ટિનાના પ્રવાસ દરમિયાન ટીમે શાનદાર પ્રદર્શન કર્યું હતું, ચાર મેચની શ્રેણીમાં બે મેચ જીતી હતી. સલીમા ટેટેની કેપ્ટનશીપમાં ટીમમાં અનુભવ અને યુવા ઉત્સાહનું સંતુલિત મિશ્રણ હશે. 

2022 કોમનવેલ્થ ગેમ્સ અને એશિયન ગેમ્સની બ્રોન્ઝ મેડલ વિજેતા સલીમા સાથે સવિતા, સુશીલા ચાનુ પુખરામબામ, લાલરેમસિયામી અને નવનીત કૌર જેવી અનુભવી ખેલાડીઓ જોડાશે. સોનમ, હીના બાનો અને લાલથાંતલુઆંગી જેવા યુવા ચહેરાઓ પણ તેમની પ્રતિભા દર્શાવવા માટે તૈયાર છે.

ગોલકીપિંગમાં સવિતા અને બિચુ દેવી ખારીબામ ટીમનો મજબૂત આધારસ્તંભ હશે. ડિફેન્સમાં નિક્કી પ્રધાન, ઇશિકા ચૌધરી, સુશીલા ચાનુ પુખરામબામ, લલથાંતલુઆંગી અને જ્યોતિની સાથે શિલ્પી ડબાસ પણ હશે, જેમને પહેલી વાર સિનિયર ટીમમાં પસંદ કરવામાં આવ્યા છે.