નવી દિલ્હીઃ એક ડેટા અનુસાર, વર્ષ 2026ના બીજા ત્રિમાસિક ગાળા (Q2) દરમિયાન ભારતના રહેણાંક રિયલ એસ્ટેટ માર્કેટમાં માંગમાં ઘટાડો જોવા મળ્યો છે, જેમાં ટોચના સાત શહેરોમાં ઘરના વેચાણમાં વાર્ષિક ધોરણે (y-o-y) 6 ટકાનો ઘટાડો નોંધાયો છે. ગયા વર્ષે સમાન ગાળામાં 96,285ની સરખામણીએ Q2 2026માં આશરે 90,715 હાઉસિંગ યુનિટ્સ વેચાયા હતા. ત્રિમાસિક ધોરણે પણ વેચાણમાં 11 ટકાનો ઘટાડો થયો છે; જે વૈશ્વિક ભૌગોલિક રાજકીય (જીઓપોલિટિકલ) અનિશ્ચિતતાઓ વચ્ચે ઘર ખરીદનારાઓમાં સાવચેતીભર્યું વલણ દર્શાવે છે.
એક રિપોર્ટ અનુસાર, પશ્ચિમ એશિયાના યુદ્ધના કારણે ઊભી થયેલી સતત અનિશ્ચિતતા અને તેના પરિણામે સપ્લાય ચેઈનમાં આવેલા અવરોધોએ આ ત્રિમાસિક ગાળા દરમિયાન ખરીદદારોના આત્મવિશ્વાસને અસર કરી હતી. વેચાણમાં ઘટાડો થવા છતાં, નવા હાઉસિંગ સપ્લાયનું લોન્ચિંગ મજબૂત રહ્યું છે. ડેવલપર્સે Q2 2026માં ટોચના સાત શહેરોમાં આશરે 1,06,000 રહેણાંક યુનિટ્સ લોન્ચ કર્યા હતા, જે Q2 2025 દરમિયાન લોન્ચ કરાયેલા અંદાજે 98,625 યુનિટ્સની સરખામણીએ 7 ટકાનો વાર્ષિક વધારો દર્શાવે છે. જો કે, ત્રિમાસિક ધોરણે (q-o-q) નવા લોન્ચિંગમાં 16 ટકાનો ઘટાડો થયો છે, જે દર્શાવે છે કે બજારના નબળા સેન્ટિમેન્ટ (વલણ) વચ્ચે ડેવલપર્સે પણ વધુ સાવચેતીભર્યો અભિગમ અપનાવ્યો છે.
મુંબઈ મેટ્રોપોલિટન રીજન (MMR) અને બેંગલુરુએ હાઉસિંગ માર્કેટમાં વર્ચસ્વ જાળવી રાખ્યું હતું. આ બંને શહેરોએ સંયુક્ત રીતે ત્રિમાસિક ગાળા દરમિયાન કુલ હાઉસિંગ વેચાણમાં આશરે 48 ટકા અને તમામ નવા લોન્ચિંગમાં 53 ટકા હિસ્સો નોંધાવ્યો હતો. MMRમાં અંદાજે 28,710 હાઉસિંગ વેચાણ અને 34,555 નવા લોન્ચિંગ નોંધાયા હતા, જ્યારે બેંગલુરુમાં આશરે 15,285 વેચાણ અને 21,670 નવા લોન્ચિંગ નોંધાયા હતા.
સાત અગ્રણી શહેરોમાંથી માત્ર કોલકાતા, હૈદરાબાદ અને બેંગલુરુમાં જ ઘરના વેચાણમાં વાર્ષિક વૃદ્ધિ જોવા મળી હતી. કોલકાતા વેચાણમાં 10 ટકાના વધારા સાથે મોખરે રહ્યું હતું, ત્યારબાદ હૈદરાબાદ 2 ટકા અને બેંગલુરુ માત્ર 1 ટકાની વૃદ્ધિ સાથે બીજા અને ત્રીજા ક્રમે હતા. પુણેમાં વેચાણમાં સૌથી તીવ્ર ઘટાડો જોવા મળ્યો હતો, જ્યાં વાર્ષિક ધોરણે 15 ટકાનો ઘટાડો નોંધાયો હતો, જ્યારે MMR અને દિલ્હી-રાષ્ટ્રીય રાજધાની ક્ષેત્ર (Delhi-NCR) માં અનુક્રમે 8 ટકા અને 6 ટકાનો ઘટાડો નોંધાયો હતો. ચેન્નાઈમાં પણ વેચાણમાં 9 ટકાનો ઘટાડો જોવા મળ્યો હતો.
નવા પુરવઠા (લોન્ચિંગ) ની દ્રષ્ટિએ, હૈદરાબાદ નવા લોન્ચિંગમાં 53 ટકાના નોંધપાત્ર વાર્ષિક વધારા સાથે સૌથી ઝડપથી વિકસતા બજાર તરીકે ઉભરી આવ્યું છે. બેંગલુરુ 41 ટકાના વધારા સાથે બીજા ક્રમે રહ્યું હતું, જ્યારે MMR માં 23 ટકાનો વધારો નોંધાયો હતો. આનાથી વિપરીત, દિલ્હી-NCR માં નવા લોન્ચિંગમાં 40 ટકાનો તીવ્ર ઘટાડો જોવા મળ્યો હતો, અને ચેન્નાઈમાં નવો પુરવઠો Q2 2025 ની સરખામણીએ 38 ટકા જેટલો ઘટ્યો હતો.
નવા હાઉસિંગ પ્રીમિયમ હાઉસિંગ તરફ સતત વધી રહેલો ઝુકાવ દર્શાવે છે. ₹80 લાખથી ₹1.50 કરોડની કિંમતના ઘરો 27 ટકા હિસ્સા સાથે નવા લોન્ચિંગમાં સૌથી મોટો હિસ્સો ધરાવે છે, ત્યારબાદ ₹1.50 કરોડથી ₹2.50 કરોડની કિંમતની પ્રોપર્ટી 25 ટકા હિસ્સા સાથે બીજા ક્રમે છે. ₹2.50 કરોડથી વધુ કિંમતના લક્ઝરી હાઉસિંગનું કુલ લોન્ચિંગમાં 22 ટકા યોગદાન હતું, જ્યારે મિડ-સેગમેન્ટ (₹40 લાખ - 80 લાખ) નો હિસ્સો 19 ટકા રહ્યો હતો.
