લંડનઃ ઓલિમ્પિક ચેમ્પિયન નેધરલેન્ડ્સ પર રોમાંચક જીતથી ઉત્સાહિત ભારતીય પુરુષ હૉકી ટીમ આવતીકાલે મંગળવારે એફઆઈએચ પ્રો લીગના લંડન તબક્કાની શરૂઆતની મેચમાં કટ્ટર હરીફ પાકિસ્તાન સામે તે જ લય જાળવી રાખવાનો પ્રયાસ કરશે.

ભારત અને પાકિસ્તાન 2024માં ચીનના હુલુનબુઇરમાં એશિયન ચેમ્પિયન્સ ટ્રોફી પછી પહેલી વાર એકબીજાનો સામનો કરશે. કેપ્ટન હરમનપ્રીત સિંહના બે ગોલથી ભારતે તે મેચમાં 2-1થી વિજય મેળવ્યો હતો. 

ભારતે રોટરડેમમાં તેની ચાર મેચમાંથી બે મેચ જીતી છે. રવિવારે રોટરડેમ લેગની અંતિમ મેચમાં તેઓએ યજમાન અને વિશ્વ નંબર 2 નેધરલેન્ડ્સને 3-2થી હરાવ્યું હતું. ભારતે બીજો વિજય (3-1) વર્તમાન વિશ્વ ચેમ્પિયન અને વિશ્વ નંબર 5 જર્મની સામે મેળવ્યો હતો. અન્ય બે મેચમાં ભારત નેધરલેન્ડ્સ સામે 2-3 અને જર્મની સામે 1-2થી હારી ગયું હતું.

નેધરલેન્ડ્સ ચરણનો અનુભવ ભારતીય ટીમ માટે અમૂલ્ય રહ્યો છે. ટીમ આ ટુર્નામેન્ટનો ઉપયોગ આ વર્ષે બે મુખ્ય સ્પર્ધાઓ એફઆઈએચ વર્લ્ડ કપ અને એશિયન ગેમ્સ (જે ઓલિમ્પિક ક્વોલિફાયર પણ છે) પહેલા તેની ખામીઓને સુધારવા માટે કરી રહી છે. ભારત હાલમાં નવ ટીમોના પ્રો લીગ સ્ટેન્ડિંગમાં આઠમા ક્રમે છે. તેઓ તેમના આગામી પ્રતિસ્પર્ધી પાકિસ્તાનથી આગળ છે, જેણે હજુ સુધી ટુર્નામેન્ટમાં એક પણ પોઈન્ટ મેળવ્યો નથી.

ભારત આગામી ગુરુવારે ઈંગ્લેન્ડનો સામનો કરશે અને પછી શુક્રવારે બીજા તબક્કામાં પાકિસ્તાનનો સામનો કરશે. બે જીત અને બે હાર સાથે ભારતીય ટીમે ટુર્નામેન્ટના યુરોપિયન લેગમાં અત્યાર સુધી હોમ લેગ કરતાં ઘણું સારું પ્રદર્શન કર્યું છે. ભારત ઘરેલુ ચાર મેચમાં એક પણ મેચ જીતી શક્યું નથી. હોમ લેગ દરમિયાન ભારતે 19 ગોલ ગુમાવ્યા અને ચાર મેચમાં ફક્ત પાંચ ગોલ કર્યા હતા.

ભારતના મુખ્ય કોચ ક્રેગ ફુલ્ટન યુરોપિયન લેગમાં તેમની ટીમના પ્રદર્શનથી ખૂબ સંતુષ્ટ હશે જ્યાં તેઓએ ટોચની ટીમોને સખત લડત આપી હતી. ભારત-પાકિસ્તાનની કોઈ પણ મેચ ખૂબ જ તણાવપૂર્ણ હોય છે અને બંને દેશો વચ્ચે ચાલી રહેલા રાજકીય તણાવને ધ્યાનમાં રાખીને બંને દેશોની પ્રતિષ્ઠા દાવ પર લાગેલી હોય છે.

હરમનપ્રીત, જુગરાજ સિંહ અને રાજિન્દર સિંહ જેવા ખેલાડીઓ સાથે પેનલ્ટી કોર્નરને ગોલમાં ફેરવવા ભારતની તાકાત રહી છે, પરંતુ ફુલ્ટન તેની ફોરવર્ડ લાઇન પાસેથી વધુ ફિલ્ડ ગોલની અપેક્ષા રાખશે, જેમાં મનદીપ સિંહ અને દિલપ્રીત સિંહ જેવા વરિષ્ઠ ખેલાડીઓનો સમાવેશ થાય છે. મનપ્રીત સિંહ, વાઈસ કેપ્ટન હાર્દિક સિંહ અને વિવેક સાગર પ્રસાદે મિડફિલ્ડમાં સારુ પ્રદર્શન કર્યું છે પરંતુ ડિફેન્સમાં સુધારો કરવાની જરૂર છે.

બીજી તરફ, પાકિસ્તાનની પ્રો લીગ સીઝન ખૂબ જ ખરાબ રહી છે. તેઓ જર્મની, નેધરલેન્ડ્સ, બેલ્જિયમ અને સ્પેન સામેની બધી 11 મેચ હારી ગયા છે અને હવે સ્પર્ધાના ટોચના સ્તરમાંથી બહાર થવાના ભયમાં છે. 

નબળા પ્રદર્શનથી પીડાતી પાકિસ્તાની ટીમ માટે વિઝાના મુદ્દાઓએ ઇંગ્લેન્ડમાં ટુર્નામેન્ટના અંતિમ તબક્કામાં નિયમિત કેપ્ટન અમ્માદ શકીલ બટ અને સંભવતઃ મુખ્ય કોચ મંજૂર-ઉલ-હસનની હાજરી અંગે અનિશ્ચિતતા ફેલાઈ છે.