મુંબઈ: છત્રપતિ શિવાજી મહારાજ ટર્મિનસ (CSMT)ની હેરિટેજ ઇમારતના ડોમમાં પાણીના લીકેજ અંગેની ચિંતાઓ વચ્ચે રેલ લેન્ડ ડેવલપમેન્ટ ઓથોરિટીએ જણાવ્યું હતું કે આ સમસ્યાનું સમાધાન મળી ચૂક્યું છે અને સમારકામની કામગીરી હાલ ચાલુ છે, જે ૩૧ ઓગસ્ટ સુધીમાં પૂર્ણ થઈ જશે.
લીકેજ થવા પાછળ બે કારણો હોવાનું જણાયું હતું, જેમાં પહેલું કારણ પથ્થરના ચણતરના સાંધાઓમાંથી થતું લીકેજ અને પથ્થરોની છિદ્રાળુ પ્રકૃતિને કારણે થતું લીકેજ. રિપોર્ટમાં જણાવ્યા અનુસાર લીકેજ સુધારવાની કામગીરી 'રેલ લેન્ડ ડેવલપમેન્ટ ઓથોરિટી' (RLDA) ને સોંપવામાં આવી છે.
સંબંધિત લીકેજ અંગે વાત કરતા અધિકારીઓએ જણાવ્યું હતું કે ગુરુત્વાકર્ષણ ગ્રાઉટિંગ ટેક્નિક દ્વારા ચુનો અને ગોળ આધારિત ગ્રાઉટનો ઉપયોગ કરીને ગ્રાઉટિંગનું કામ પહેલાથી જ હાથ ધરવામાં આવ્યું હતું. તેમણે સ્પષ્ટ કર્યું હતું કે આ પદ્ધતિ મુંબઈ હેરિટેજ કન્ઝર્વેશન કમિટી (MHCC)ની ભલામણ પર અપનાવવામાં આવી હતી, જેથી હેરિટેજ સંરક્ષણ ધોરણો સાથે સુસંગત રહી શકે.
છિદ્રાળુ પથ્થરો દ્વારા લીકેજ થવાના વધુ જટિલ મુદ્દા પર અધિકારીઓએ જણાવ્યું હતું કે વીરમાતા જીજાબાઈ ટેકનોલોજીકલ ઇન્સ્ટિટ્યૂટ (VJTI)ના માળખાકીય સલાહકાર, ઉદ્યોગ નિષ્ણાતો અને MHCC સાથે સંકળાયેલા સંરક્ષણવાદીઓ સાથે આ બાબતે પરામર્શ કરવામાં આવ્યો હતો.
આ નિષ્ણાતોને વધુ સારવાર લાગુ કરતા પહેલા પદ્ધતિ નિવેદનો સબમિટ કરવા અને હેરિટેજની જરૂરિયાતોને અનુરૂપ સામગ્રીનો ઉલ્લેખ કરવા માટે કહેવામાં આવ્યું હતું. અધિકારીઓએ વધુમાં સ્પષ્ટતા કરી હતી કે સમારકામ 31 ઓગસ્ટ સુધીમાં પૂર્ણ થવાની અપેક્ષા છે.
