અમેરિકા અને ઈરાન વચ્ચે ગયા અઠવાડિયે થયેલા વચગાળાના શાંતિ કરાર બાદ, હવે બંને દેશો વચ્ચે વાતચીતનો પહેલો મોટો તબક્કો શરૂ થવા જઈ રહ્યો છે. અમેરિકાના ઉપરાષ્ટ્રપતિ જેડી વેન્સ સ્વિટ્ઝર્લેન્ડ પહોંચી રહ્યા છે, જ્યાં રવિવારે યોજાનારી બેઠકમાં પરમાણુ કાર્યક્રમ, પ્રતિબંધોને કારણે અટકેલા ઈરાનના નાણાં અને પ્રાદેશિક તણાવ જેવા મુદ્દાઓ પર ચર્ચા થશે. અહેવાલો અનુસાર, અમેરિકા ઈચ્છે છે કે વાતચીતની શરૂઆત ઈરાનના પરમાણુ મથકોની તપાસ સાથે થાય, જ્યારે તેના બદલામાં તે ઈરાનને તેના કેટલાક ફ્રીઝ (જપ્ત) થયેલા ફંડનો ઉપયોગ કરવાની મંજૂરી આપવા તૈયાર છે.
પરમાણુ મથકોની તપાસ ઈચ્છે છે અમેરિકા
અહેવાલ મુજબ, અમેરિકાનો પ્રયાસ એવો છે કે વાતચીતના આ પહેલા તબક્કાનું પરિણામ એ આવે કે ઈરાન સંયુક્ત રાષ્ટ્ર (UN) ના નિરીક્ષકોને પોતાના પરમાણુ મથકોની મુલાકાત લેવાની મંજૂરી આપે. આ એ જ સાઇટ્સ (સ્થળો) છે જેના પર પહેલા અમેરિકા અને ઈઝરાયેલ દ્વારા હુમલા કરવામાં આવ્યા છે. અમેરિકાના અધિકારીઓનું માનવું છે કે આ તપાસથી એ સ્પષ્ટ થઈ શકશે કે ઈરાનનો પરમાણુ કાર્યક્રમ કઈ સ્થિતિમાં છે અને ભવિષ્યની વાતચીત માટે વિશ્વાસનું વાતાવરણ ઊભું થશે.
બદલામાં 6 અબજ ડોલર મુક્ત કરવા વોશિંગ્ટન તૈયાર
આ પગલાના બદલામાં અમેરિકા ઈરાનને તેના ફ્રીઝ (જપ્ત) થયેલા ફંડનો થોડો ભાગ આપવા પર વિચાર કરી રહ્યું છે. તેની શરૂઆત કતારમાં રાખવામાં આવેલા આશરે 6 અબજ ડોલરના ખાતાથી થઈ શકે છે. અહેવાલ મુજબ, આ રકમનો ઉપયોગ માનવતાવાદી જરૂરિયાતો સાથે જોડાયેલી વસ્તુઓ, જેમ કે ખાદ્ય સામગ્રી (અનાજ) અને અન્ય જરૂરી ચીજવસ્તુઓની ખરીદી માટે કરવામાં આવશે.
60 દિવસનો છે સમય
અમેરિકી રાષ્ટ્રપતિ ડોનાલ્ડ ટ્રમ્પ અને ઈરાનના રાષ્ટ્રપતિ મસૂદ પેઝેશકિયાન વચ્ચે થયેલા વચગાળાના શાંતિ કરાર હેઠળ બંને દેશોને 60 દિવસનો સમય મળ્યો છે, જેમાં કાયમી ઉકેલ લાવવા માટે વાતચીત કરવામાં આવશે. જો કે આ માત્ર એક શરૂઆત છે અને દાયકાઓ જૂના તણાવને ખતમ કરવાનો રસ્તો હજી ઘણો લાંબો માનવામાં આવી રહ્યો છે.
