વોશિંગ્ટનઃ અમેરિકાના રાષ્ટ્રપ્રમુખ ડોનાલ્ડ ટ્રમ્પે ફરી એકવાર ઈરાન પરથી નૌકાદળની નાકાબંધી હટાવવાના સંકેત આપ્યા છે. તેમણે જણાવ્યું કે તેઓ ઈરાન સાથેના એક કરાર પર આખરી નિર્ણય લેવા જઈ રહ્યા છે અને આ માટે 'સિચ્યુએશન રૂમ'માં તેમની એક બેઠક પણ છે. આ કરાર હેઠળ યુદ્ધવિરામને આગળ વધારવામાં આવશે, જેમાં હોર્મુઝની સામુદ્રધુની (સ્ટ્રેટ ઓફ હોર્મુઝ) ખુલ્લી મૂકવી અને તેહરાનની (ઈરાનની રાજધાની) પરમાણુ હથિયાર બનાવવાની ક્ષમતાને ખતમ કરવાનો સમાવેશ થાય છે.

ટ્રમ્પે એવું પણ કહ્યું કે ઈરાન પાસે રહેલા યુરેનિયમને અમેરિકા ખોદીને બહાર કાઢશે. જોકે, ટ્રમ્પના આ દાવાને ઈરાને અડધું સત્ય અને અડધું જૂઠ ગણાવ્યું છે. ટ્રમ્પે પોતાના સોશિયલ મીડિયા પ્લેટફોર્મ 'ટ્રુથ સોશિયલ' પર લખ્યું છે કે, ઈરાને એ વાત પર સહમત થવું જ પડશે કે તેઓ ક્યારેય કોઈ પણ પ્રકારનું પરમાણુ હથિયાર કે બોમ્બ બનાવશે કે રાખશે નહીં.

રાષ્ટ્રપ્રમુખે હોર્મુઝની સામુદ્રધુની (સ્ટ્રેટ ઓફ હોર્મુઝ) નો ઉલ્લેખ કરતા જણાવ્યું કે, તેને તરત જ ખુલ્લી મૂકવી જોઈએ અને ત્યાં કોઈ પણ પ્રકારની ટોલ વસૂલાત (ટેક્સ) થવી જોઈએ નહીં. તેમણે દાવો કર્યો કે પાણીમાં બિછાવવામાં આવેલી તમામ દરિયાઈ સુરંગો હટાવી દેવામાં આવશે. જોકે, તેમણે એમ પણ કહ્યું કે અમે અમારા શ્રેષ્ઠ 'અંડરવોટર માઇન સ્વીપર્સ' (પાણીની અંદર સુરંગ હટાવતા જહાજો) ની મદદથી બ્લાસ્ટ કરીને આવી ઘણી સુરંગોને પહેલેથી જ હટાવી દીધી છે. હવે ઈરાન બાકી રહેલી તમામ સુરંગોને તરત જ હટાવવાનું અથવા વિસ્ફોટ કરીને તેને નષ્ટ કરવાનું કામ પૂરું કરશે. રાષ્ટ્રપ્રમુખ ટ્રમ્પે સંકેત આપ્યો કે અમેરિકા તરફથી ઈરાનની નૌકાદળની નાકાબંધી હટાવી લેવામાં આવશે.

તેમણે કહ્યું, "અમારી જોરદાર અને અભૂતપૂર્વ નૌકાદળની નાકાબંધીને કારણે જે જહાજો આ સામુદ્રધુનીમાં ફસાઈ ગયા હતા, તેઓ હવે પોતાના ઘર તરફ પાછા ફરવાની પ્રક્રિયા શરૂ કરી શકે છે, કારણ કે આ નાકાબંધી હટાવી લેવામાં આવશે."

અમેરિકા ન્યૂક્લિયર ડસ્ટનું ખોદકામ કરશે

ઈરાનના સંવર્ધિત યુરેનિયમ (Enriched Uranium) નો ઉલ્લેખ કરતા તેમણે જણાવ્યું કે, જે 'ન્યૂક્લિયર ડસ્ટ' જમીનની ઘણી ઊંડે દબાયેલી છે, તેને યુનાઇટેડ સ્ટેટ્સ (અમેરિકા) દ્વારા ખોદીને બહાર કાઢવામાં આવશે. આ કામ ઈરાન અને આંતરરાષ્ટ્રીય પરમાણુ ઊર્જા એજન્સી (IAEA) સાથેના ગાઢ તાલમેલ અને સહયોગથી કરવામાં આવશે અને તે સામગ્રીને સંપૂર્ણપણે નષ્ટ કરી દેવામાં આવશે.