અમદાવાદ/નવી દિલ્હીઃ ઉત્તર ભારતમાં તાપમાનનો પારો ધીમે ધીમે ચઢી રહ્યો છે. બપોરે લોકોને આકરી ગરમીનો અનુભવ થઈ રહ્યો છે. રાજસ્થાનથી લઈ હરિયાણા અને દિલ્લી-એનસીઆર સુધી ગરમીનો ગ્રાફ ઉંચે જઈ રહ્યો છે, જ્યારે પહાડી રાજ્યોમાં હળવા વરસાદથી ઠંડીનો અનુભવ થઈ રહ્યો છે. 

ગુજરાતમાં કેવું રહેશે હવામાન

ગુજરાતમાં ગરમ અને ભેજવાળા પવનો ફૂંકાશે. દરિયા કિનારાના વિસ્તારોમાં  ગરમીનું પ્રમાણ વધશે. ઉત્તર ગુજરાત, કચ્છમાં મહત્તમ તાપમાન વધશે, સૌરાષ્ટ્ર, કચ્છમાં પણ મહત્તમ તાપમાન વધુ રહેશે. ગુજરાતમાં ગરમીનો પારો ઊંચકાયો હતો. કંડલા પોર્ટ પર સૌથી વધુ 40.7 ડિગ્રી તાપમાન નોંધાયું હતું. અમદાવાદમાં 38.4, ડીસામાં 39.2 ડિગ્રી, વડોદરામાં 39.2 ડિગ્રી, સુરતમાં 39.4 ડિગ્રી, સુરેન્દ્રનગર અને રાજકોટમાં 39 ડિગ્રી તાપમાન, નલિયામાં 38.2 ડિગ્રી, ભુજમાં 37.8 ડિગ્રી તાપમાન નોંધાયું હતું.ગુજરાતમાં અમદાવાદ અને સુરત જેવા શહેરોમાં તાપમાન 38 ડિગ્રીની આસપાસ રહેશે અને વાતાવરણ સૂકું રહેશે.

મુંબઈમાં લોકો બફારાથી પરેશાન રહેશે. તાપમાન 32-34 ડિગ્રી સેલ્સિયસની વચ્ચે રહેશે, જોકે દરિયાઈ પવનોને કારણે સામાન્ય રાહત મળી શકે છે.  દક્ષિણ ભારતના કેરળ, તમિલનાડુ અને કર્ણાટકમાં વાદળછાયું વાતાવરણ રહેશે અને કેટલાક સ્થળોએ હળવો વરસાદ પડી શકે છે, જેનાથી ગરમીથી રાહત મળશે.

રાજસ્થાનમાં ગરમીનો પ્રકોપ વધી રહ્યો છે. જેસલમેર, બાડમેર અને બીકાનેરમાં તાપમાન 40 ડિગ્રીની આસપાસ પહોંચી શકે છે. બપોરના સમયે ધૂળભરી આંધી (વંટોળ) આવવાની પણ શક્યતા છે, જેના કારણે વિઝિબિલિટી ઘટી શકે છે.

ઉત્તરાખંડમાં દેહરાદૂન, નૈનીતાલ અને આસપાસના વિસ્તારોમાં હવામાન ખુશનુમા રહેશે. હળવા વાદળો છવાયેલા રહેશે અને ક્યાંક ક્યાંક હળવો વરસાદ કે ઝાપટાં પડી શકે છે. પહાડી વિસ્તારોમાં ઠંડા પવન ફૂંકાશે. બીજી તરફ, હિમાચલ પ્રદેશમાં શિમલા, મનાલી અને કુલ્લુ ખીણમાં આજે વાદળછાયું વાતાવરણ રહેશે. ઉંચાઈવાળા વિસ્તારોમાં હળવો વરસાદ કે હિમવર્ષા થવાની સંભાવના છે. પ્રવાસીઓ માટે હવામાન આનંદદાયક રહેશે, પરંતુ ઠંડક જળવાઈ રહેશે.

પંજાબમાં હવામાન સૂકું અને ચોખ્ખું રહેશે. અમૃતસર, લુધિયાણા અને પટિયાલામાં દિવસનું તાપમાન 35-37 ડિગ્રી સેલ્સિયસની વચ્ચે રહેશે. ખેતરોમાં કામ કરતા લોકોએ બપોરના તડકાથી સાવધ રહેવાની જરૂર છે. પવનની ગતિ ધીમી રહેશે.

હરિયાણામાં ગરમી ઝડપથી વધી રહી છે. હિસાર, રોહતક અને ગુરુગ્રામ જેવા વિસ્તારોમાં તાપમાન 37-39 ડિગ્રી સેલ્સિયસ સુધી જઈ શકે છે. દક્ષિણ હરિયાણામાં લૂ  જેવી સ્થિતિ સર્જાવાની શરૂઆત થઈ ચૂકી છે, જેના કારણે દિવસના સમયે બહાર નીકળવું મુશ્કેલ બની શકે છે.