નવી દિલ્હી: ભારતીય રિઝર્વ બેંક (RBI) ની મોનિટરી પોલિસી કમિટી (MPC) એ સર્વાનુમતે પૉલિસી રેપો રેટને 5.25% પર 
યથાવત રાખવાનો નિર્ણય કર્યો છે. એટલે કે રેપો રેટ સાથે જોડાયેલા તમારા હોમ લોન કે ઓટો લોનની EMI નહીં વધે. બુધવારે આ નિર્ણયની જાહેરાત કરતા આરબીઆઈના ગવર્નર સંજય મલ્હોત્રાએ જણાવ્યું કે વૈશ્વિક અર્થવ્યવસ્થા અને પડકારો છતાં 3 થી 5 ઓગસ્ટ દરમિયાન યોજાયેલી મોનિટરી પૉલિસી મીટિંગ પછી રેપો રેટ 5.25 પર જ જાળવી રાખવાનો નિર્ણય લેવામાં આવ્યો છે. ગવર્નરે સંકેત આપ્યો છે કે મોંઘવારીનું અનુમાન આ વર્ષે કેન્દ્રીય બેંકના લક્ષ્યથી ઉપર જવાની સંભાવના છે.

આ વર્ષે મોંઘવારી કેવી રહેશે?

કેન્દ્રીય બેંકે આ વર્ષ માટે દેશમાં મોંઘવારીના અનુમાનને અગાઉની સરખામણીમાં થોડું ઓછું કર્યું છે. એટલે કે મોંઘવારી તો વધશે, પરંતુ એટલી બધી નહીં. ગવર્નર મલ્હોત્રાએ જણાવ્યું કે મોનિટરી પૉલિસી કમિટીએ નાણાકીય વર્ષ 2027 માટે મોંઘવારીના અનુમાનને અગાઉના 5.1% થી 10 બેસિસ પૉઇન્ટ ઘટાડીને 5% રાખ્યું છે.

સપ્ટેમ્બર 2026 ત્રિમાસિક: 4.7% (અગાઉનું અનુમાન 5.1% હતું)

ડિસેમ્બર 2026 ત્રિમાસિક: 5.9% (અગાઉનું અનુમાન પણ 5.9% હતું)

માર્ચ 2027 ત્રિમાસિક: 5.5% (અગાઉનું અનુમાન 5.4% હતું)

જૂન 2027 ત્રિમાસિક: 5.3%

કેવો રહેશે દેશનો GDP ગ્રોથ?

RBI ના ગવર્નર સંજય મલ્હોત્રાએ જણાવ્યું કે આ વર્ષે દેશની GDP આશરે 6.7 ટકાના દરે વધશે. જૂન MPC માં કેન્દ્રીય બેંકે વૈશ્વિક આર્થિક પડકારોને ધ્યાનમાં રાખીને રિયલ GDP ગ્રોથનું અનુમાન 6.9 થી ઘટાડીને 6.6 ટકા કર્યું હતું. તેમાં 10 બેસિસ પૉઇન્ટનો વધારો કરવામાં આવ્યો છે.

જૂન 2026 ત્રિમાસિક: 7% (અગાઉનું અનુમાન 6.6% હતું)

સપ્ટેમ્બર 2026 ત્રિમાસિક: 6.4% (અગાઉનું અનુમાન 6.3% હતું)

ડિસેમ્બર 2026 ત્રિમાસિક: 6.5% (અગાઉનું અનુમાન 6.5% હતું)

માર્ચ 2027 ત્રિમાસિક: 6.8% (અગાઉનું અનુમાન 6.8% હતું)