ગાંધીનગરઃ નાગરિક ઉડ્ડયન ક્ષેત્ર આત્મનિર્ભર ભારત તરફ ડગ માંડી રહ્યું હોય તેમ લાગે છે. એવિએશન ક્ષેત્રે ગુજરાતે ગગનચુંબી ફલાંગ લગાવી છે. જે મુજબ હવે વિદેશ નહીં, ગિફ્ટ સિટીથી લિઝ પર એરક્રાફ્ટ મળશે. ગાંધીનગરમાં ઈન્ડિયા એરક્રાફ્ટ લિઝિંગ એન્ડ ફાઈનાન્સીંગ સમિટ 2.0ના ઉદ્ઘાટન પ્રસંગે બોલતાં મુખ્ય પ્રધાન ભૂપેન્દ્ર પટેલે જણાવ્યું કે, શમાં એરક્રાફ્ટ લિઝિંગ ઈન્ડસ્ટ્રીઝ માટે ગિફ્ટ સિટીનું ઈન્ટરનેશનલ ફાઈનાન્સીયલ સર્વીસીસ સેન્ટર્સ ઓથોરીટી મુખ્ય ભૂમિકા નિભાવી રહ્યું છે.
તેમણે આ પ્રસંગે કહ્યું કે, વડા પ્રધાન નરેન્દ્ર મોદીની વિઝનરી લીડરશીપમાં નિર્માણ થયેલું ગિફ્ટ સિટી દેશના ફિનટેક હબ તરીકે ખ્યાતિ પામ્યું છે. ગિફ્ટ સિટીના IFSCAની એરક્રાફ્ટ લિઝિંગ એન્ડ ફાઈનાન્સીંગ સેક્ટરની ભૂમિકા વધુ વ્યાપક બનાવીને વૈશ્વિક શ્રેષ્ઠ પદ્ધતિઓને સ્થાનિક સ્તરે અમલમાં લાવી એવિએશન ફાઈનાન્સીંગ ઈકો સિસ્ટમને સુદ્રઢ કરવાનો ઉદેશ્ય આ સમિટ પાર પાડશે. એરક્રાફ્ટ લિઝિંગ ઈન્ડસ્ટ્રીઝને ઈઝ ઓફ ડુઈંગ બિઝનેસની સરળતા આપવા IFSCAના માધ્યમથી યુનિફાઈડ રેગ્યુલેટરની વ્યવસ્થા કરવામાં આવી હોવાનો ઉલ્લેખ પણ આ તકે કર્યો હતો.
એવિએશન ઈન્ડસ્ટ્રીઝ અને એરક્રાફ્ટ લિઝિંગ એન્ડ ફાઈનાન્સીંગ સેક્ટરમાં પણ ગુજરાત નેતૃત્વ કરશે તેવી નેમ વ્યક્ત કરતાં મુખ્ય પ્રધાને કહ્યું કે, ગિફ્ટ સિટીમાં સંચાલિત IFSCA દ્વારા અત્યાર સુધીમાં 370થી વધુ એસેટ્સ લિઝ પર આપવામાં આવી છે. તેમણે આ સમિટમાં સહભાગી થઈ રહેલા ઈન્ડસ્ટ્રી લિડર્સને આહવાન કર્યુ હતુ કે, ગિફ્ટ સિટી IFSCA સાથેનો તેમનો સહયોગ 2047ના વિકસિત ભારતના નિર્માણના વડા પ્રધાન નરેન્દ્ર મોદીના સંકલ્પને સાકાર કરવામાં ગતિ આપશે.
કેન્દ્રીય નાગરિક ઉડ્ડયન પ્રધાન, રામમોહન નાયડુએ ગિફ્ટ સિટીને વડા પ્રધાન નરેન્દ્ર મોદીનું ‘બ્રેઈનચાઈલ્ડ’ અને ભારત માટે વૈશ્વિક નાણાકીય બજારોનું પ્રવેશદ્વાર ગણાવતા જણાવ્યું હતું કે, ગુજરાત સરકારના સહયોગથી ગિફ્ટ સિટી આજે એશિયાના સૌથી ગતિશીલ નાણાકીય કેન્દ્ર અને વૈશ્વિક નાણાકીય બજારો માટે ભારતનું પ્રવેશદ્વાર બન્યું છે. તેમણે ગિફ્ટ સિટીની સરખામણી ડબ્લિન, સિંગાપોર અને દુબઈ જેવા આંતરરાષ્ટ્રીય કેન્દ્રો સાથે કરતા જણાવ્યું હતું કે, ગિફ્ટ સિટીમાં એરક્રાફ્ટ લીઝિંગ અને ફાઇનાન્સિંગ માટે એક સક્ષમ ઇકોસિસ્ટમ તૈયાર થઈ છે, જે એવિએશન ક્ષેત્રે ભારતને આત્મનિર્ભર બનાવવામાં મહત્વની ભૂમિકા ભજવશે.
તેમણે ઉમેર્યું હતું કે, આગામી દાયકામાં ભારતીય એવિએશન સેક્ટરમાં લીઝિંગ માટે ૫૦ બિલિયન ડોલરની વિશાળ તકો રહેલી છે અને ભારત હવે ગ્લોબલ ફાઇનાન્સના માત્ર ‘ગ્રાહક’ મટીને ‘આર્કિટેક્ટ’ બનવાની દિશામાં ડગ માંડી રહ્યું છે. ભારત વર્ષ ૨૦૩૫ સુધીમાં આશરે ૨,૨૫૦ એરક્રાફ્ટના કાફલા સાથે વિશ્વનું ત્રીજું સૌથી મોટું સિવિલ એવિએશન માર્કેટ બનવા માટે સજ્જ છે.
રામમોહન નાયડુએ માત્ર મોટા વિમાનો જ નહીં, પરંતુ પ્રાદેશિક કનેક્ટિવિટી માટે ૪૦ થી ૧૦૦ સીટર વિમાનો, હેલિકોપ્ટર અને સી-પ્લેન લીઝિંગ પર પણ ભાર મૂક્યો હતો. તેમણે જાહેરાત કરી હતી કે, લક્ષદ્વીપમાં ટૂંક સમયમાં સી-પ્લેન ઓપરેશન્સ શરૂ કરવામાં આવશે. સરકાર હવે ‘ફ્રેક્શનલ ઓનરશિપ’ અને એરક્રાફ્ટને ‘ઇન્ફ્રાસ્ટ્રક્ચર એસેટ’ તરીકે ગણવા જેવી નીતિઓ પર પણ ગંભીરતાથી કામ કરી રહી છે.
કેન્દ્રીય નાગરિક ઉડ્ડયન મંત્રાલયના સચિવ સમીર કુમાર સિંહાએ જણાવ્યું હતું કે, આ સમિટ ભારતને એવિએશન સેક્ટરમાં 'આત્મનિર્ભર' બનાવવાની દિશામાં એક નિર્ણાયક પગલું સાબિત થશે. હાલમાં ભારતીય એરલાઇન્સના ૮૦ ટકાથી વધુ એરક્રાફ્ટ આયર્લેન્ડ, સિંગાપોર અને દુબઈ જેવા વિદેશી અધિકારક્ષેત્રોમાંથી લીઝ પર લેવામાં આવે છે. સરકારનો ઉદ્દેશ્ય હવે ભારતને માત્ર માર્કેટ તરીકે નહીં પણ 'ફાઇનાન્સિંગ જ્યુરિસ્ડિક્શન' તરીકે સ્થાપિત કરવાનો છે.
IFSCAના ચેરમેને જણાવ્યું હતું કે, વડાપ્ર ધાન નરેન્દ્ર મોદીના વિઝનરી નેતૃત્વ હેઠળ ભારત આજે વિશ્વનું ત્રીજું સૌથી મોટું ડોમેસ્ટિક એવિએશન માર્કેટ બન્યું છે. મુખ્ય પ્રધાન ભૂપેન્દ્ર પટેલના સહયોગથી ગિફ્ટ સિટીમાં થયેલા મેટ્રો કનેક્ટિવિટી અને અત્યાધુનિક ઇન્ફ્રાસ્ટ્રક્ચરના વિકાસની પ્રશંસા કરતા તેમણે કહ્યું હતું કે, વર્ષ ૨૦૨૦માં જ્યાં એક પણ લીઝિંગ યુનિટ નહોતું, ત્યાં આજે ગિફ્ટ સિટીમાં ૪૦થી વધુ એરક્રાફ્ટ લિઝર્સ કાર્યરત છે અને ૨૦૦થી વધુ વિમાનો તથા ૮૪ એન્જિનના લીઝિંગ વ્યવહારો સફળતાપૂર્વક થયા છે.
