પશ્ચિમ એશિયામાં સર્જાયેલી અશાંતિ અને યુદ્ધ જેવી ગંભીર પરિસ્થિતિને ધ્યાનમાં રાખીને કેન્દ્રીય માધ્યમિક શિક્ષણ બોર્ડ (CBSE) એ એક અત્યંત મહત્વપૂર્ણ નિર્ણય લીધો છે. ખાડી દેશોમાં વસતા હજારો ભારતીય વિદ્યાર્થીઓની સલામતીને પ્રાથમિકતા આપીને બોર્ડ દ્વારા પરીક્ષાઓ અંગે નવો પરિપત્ર જાહેર કરવામાં આવ્યો છે. આ નિર્ણયની સીધી અસર બહેરીન, ઈરાન, કુવૈત, ઓમાન, કતાર, સાઉદી અરેબિયા અને સંયુક્ત આરબ અમીરાત (UAE) માં કાર્યરત CBSE શાળાઓ પર પડશે.
કયા દેશોમાં લેવાયો નિર્ણય?
CBSE દ્વારા 5 માર્ચ 2026 ના રોજ જારી કરવામાં આવેલા સત્તાવાર સર્ક્યુલરમાં જણાવવામાં આવ્યું છે કે, મિડલ ઈસ્ટના સાત મુખ્ય દેશોમાં સુરક્ષાની સ્થિતિની સમીક્ષા કર્યા બાદ પરીક્ષા સ્થગિત કરવાનો નિર્ણય લેવાયો છે. સતત બદલાતી પરિસ્થિતિ અને વિદ્યાર્થીઓ તેમજ પરીક્ષા સ્ટાફની અવરજવરમાં પડતી મુશ્કેલીઓને જોતા બોર્ડે આ કડક વલણ અપનાવ્યું છે. ઉલ્લેખનીય છે કે આ દેશોમાં મોટી સંખ્યામાં ભારતીય પરિવારો વસે છે અને તેમના બાળકો ત્યાંની CBSE સંલગ્ન શાળાઓમાં અભ્યાસ કરે છે.
બોર્ડના આદેશ મુજબ, ધોરણ 10ની તમામ પરીક્ષાઓ જે 7 માર્ચથી 11 માર્ચ 2026 વચ્ચે યોજાવાની હતી, તેને હવે સંપૂર્ણપણે રદ કરી દેવામાં આવી છે. આ ઉપરાંત અગાઉ સ્થગિત કરાયેલી 2, 5 અને 6 માર્ચની પરીક્ષાઓ પણ હવે લેવામાં આવશે નહીં. આ વિદ્યાર્થીઓના પરિણામ અંગે બોર્ડે સ્પષ્ટતા કરી છે કે આંતરિક મૂલ્યાંકન (Internal Assessment), પ્રી-બોર્ડ પરીક્ષા અને શૈક્ષણિક દેખાવના આધારે માર્કસ આપવાની પદ્ધતિ અંગે વિચારણા ચાલી રહી છે, જેની સત્તાવાર જાહેરાત ટૂંક સમયમાં કરવામાં આવશે.
ધોરણ 12ના વિદ્યાર્થીઓ માટે પણ બોર્ડે મહત્વના સમાચાર આપ્યા છે. 7 માર્ચ 2026 ના રોજ લેવાનારી પરીક્ષા હાલ પૂરતી પાછી ઠેલવામાં આવી છે. બોર્ડ આગામી સમયમાં પરિસ્થિતિની ગંભીરતા તપાસશે અને ત્યારબાદ નવી તારીખો જાહેર કરશે. ધોરણ 12ના વિદ્યાર્થીઓને સલાહ આપવામાં આવી છે કે તેઓ અફવાઓથી દૂર રહે અને માત્ર શાળા કે બોર્ડની સત્તાવાર વેબસાઈટ પરથી મળતી માહિતી પર જ ભરોસો રાખે. શિક્ષણ ક્ષેત્રે લેવાયેલો આ નિર્ણય વાલીઓ અને વિદ્યાર્થીઓ માટે રાહતની સાથે ચિંતાનો વિષય પણ બન્યો છે.
