મુંબઈઃ બોલીવુડના દિગ્ગજ ગુજરાતી ડિરેક્ટર મેહુલ કુમાર 9 કેસમાં દોષિત જાહેર થયા હતા. ગુજરાતી નિર્માતા જયંતીલાલ ગડાએ કેસ કર્યો હતો.
શું છે મામલો
19 વર્ષ સુધી ચાલેલી લાંબી કાનૂની લડત બાદ, ફિલ્મ નિર્માતા મેહુલ કુમારને નેગોશિયેબલ ઇન્સ્ટ્રુમેન્ટ્સ એક્ટ હેઠળ ચેક બાઉન્સના 9 કેસોમાં દોષિત ઠેરવવામાં આવ્યા હતા. બોમ્બેની મઝગાંવ કોર્ટના જ્યુડિશિયલ મેજિસ્ટ્રેટ ફર્સ્ટ ક્લાસે ફાઇનાન્સર જયંતીલાલ ગડા દ્વારા દાખલ કરવામાં આવેલા કેસોમાં દોષિત ઠેરવ્યા હતા.
શું લગાવ્યો હતો આરોપ
જયંતીલાલ ગડાનો આરોપ હતો કે તેમણે તિરંગા અને ક્રાંતિવીર જેવી ફિલ્મો માટે જાણીતા મેહુલ કુમાર ઉર્ફે મોહમ્મદ ઇબ્રાહિમ બ્લોચને અનેક ફિલ્મ પ્રોજેક્ટ્સ માટે ફાઇનાન્સ પૂરું પાડ્યું હતું, પરંતુ વારંવારની ખાતરીઓ, કરારો અને વળતરની ચુકવણી માટે અનેક હપ્તાના ચેક આપવા છતાં પણ નાણાં ચૂકવવામાં આવ્યા નહોતા.
જયંતીલાલ ગડાના જણાવ્યા અનુસાર તેમની કંપનીએ 1990ના દાયકાના અંત ભાગથી મેહુલ કુમારના અનેક ફિલ્મ પ્રોજેક્ટ્સ જેવા કે કોહરામ અને કિતને દૂર કિતને પાસ માટે ફાઇનાન્સ કર્યું હતું. આ નાણાં વળતરની ચૂકવણી, નફામાં ભાગીદારી અને વિવિધ હકોમાંથી સતત મળનારી આવકની ભાગીદારીના વાયદાઓ પણ આપવામાં આવ્યા હતા.
જો કે, વર્ષો સુધી ચેક બાઉન્સ થવા અને સેટલમેન્ટ નિષ્ફળ ગયા પછી, જયંતીલાલ ગડાએ વિવિધ અદાલતોમાં ચેક બાઉન્સના કેસ, છેતરપિંડીની ફરિયાદો અને રિકવરીની પ્રક્રિયાઓ સહિત અનેક કાનૂની કાર્યવાહી શરૂ કરી હતી.
કોર્ટના ચુકાદા બાદ જયંતીલાલ ગડાએ વધુ કડક સજા અને નાણાંની વસૂલાત માટે આગળના કાનૂની પગલાં લેવામાં આવશે તેમ જણાવ્યું હતું.
