કેન્દ્રીય ગૃહ પ્રધાન અમિત શાહે (Amit Shah) શનિવારે પુણેમાં રાષ્ટ્રીય સુરક્ષા સલાહકાર (NSA) અજિત ડોભાલ (Ajit Doval) ના વખાણ કરતા જણાવ્યું હતું કે તેમણે ભારતની વિદેશ નીતિને મજબૂત બનાવવામાં અને રાષ્ટ્રીય સુરક્ષાના નિર્ણયોમાં નિર્ણાયક ભૂમિકા ભજવી છે. પુણેમાં અજિત ડોભાલને પ્રતિષ્ઠિત 'લોકમાન્ય ટિળક રાષ્ટ્રીય પુરસ્કાર ૨૦૨૬' અર્પણ કર્યા બાદ એક ભવ્ય કાર્યક્રમને સંબોધતા ગૃહ પ્રધાને આ મહત્વપૂર્ણ નિવેદન આપ્યું હતું.

પીએમ મોદીના દરેક સુરક્ષા નિર્ણય પાછળ ડોભાલની સલાહ:

અમિત શાહે પોતાના સંબોધનમાં જણાવ્યું હતું કે, વર્ષ ૨૦૧૪ માં સત્તા સંભાળ્યા પછી વડા પ્રધાન નરેન્દ્ર મોદીએ સૌથી પહેલું કામ અજિત ડોભાલને દેશના રાષ્ટ્રીય સુરક્ષા સલાહકાર તરીકે નિયુક્ત કરવાનું કર્યું હતું. પીએમ મોદી દ્વારા રાષ્ટ્રીય સુરક્ષા અને હિતોને ધ્યાનમાં રાખીને લેવામાં આવેલા દરેક મોટા નિર્ણયની પૃષ્ઠભૂમિમાં અજિત ડોભાલની મહત્વપૂર્ણ 'ભૂમિકા અને સચોટ સલાહ' રહી છે. ગુપ્તચર કામગીરીઓ અત્યંત ગોપનીય હોવાને કારણે ડોભાલના મોટા ભાગના સાહસિક કાર્યો ક્યારેયજાહેર કરવામાં આવતા નથી, પરંતુ દેશની રક્ષામાં તેનું યોગદાન અદભુત છે.

સશસ્ત્ર દળોની ક્ષમતાઓમાં મૂળભૂત પરિવર્તન:

ગૃહ પ્રધાને ઉમેર્યું હતું કે અજિત ડોભાલે અનેક વ્યૂહાત્મક વિચારોને સફળતાપૂર્વક જમીન પર ઉતારવામાં મદદ કરી છે. ભારતના સશસ્ત્ર દળોને આધુનિક બનાવવા, ટેકનોલોજીને વધુ મજબૂત કરવા, ક્ષમતા વધારવા અને દેશની સંરક્ષણ તૈયારીઓને સુધારવામાં તેમની ભૂમિકા મુખ્ય રહી છે. છેલ્લા ૧૨ વર્ષોમાં મોદી સરકાર દ્વારા ભારતીય સેનાની રક્ષણાત્મક અને આક્રમક ક્ષમતાઓમાં જે મૂળભૂત પરિવર્તનો લાવવામાં આવ્યા છે, તેમાં અજિત ડોભાલનું યોગદાન સૌથી મોટું છે. આ સાથે તેમણે ભારપૂર્વક કહ્યું કે ભારત લોકમાન્ય ટિળક દ્વારા કલ્પના કરાયેલ સાંસ્કૃતિક રાષ્ટ્રવાદના સાચા માર્ગ પર આગળ વધી રહ્યું છે.