અમદાવાદઃ અમદાવાદ શહેરમાં ટ્રાફિકજામ સાથે પાર્કિંગની સમસ્યા પણ વિકટ બનતી જાય છે. આના ઉકેલ તરીકે અમદાવાદ મહાનગરપાલિકાએ આધુનિક રોટરી પાર્કિગ સુવિધા વિકસાવવાનો નિર્ણય લીધો છે. હાલમાં અતિ વ્યસ્ત એવા રતનપોળ જંકશન પર તેનું નિર્માણકાર્ય ચાલી રહ્યું છે.
આ પહેલ અમદાવાદ મ્યુનિસિપલ કોર્પોરેશન (મનપા)ના સેન્ટ્રલ ઝોન એન્જિનિયરિંગ વિભાગ દ્વારા હાથ ધરવામાં આવી છે. આ વિસ્તારમાં વેપારીઓ અને ગ્રાહકો મોટા પ્રમાણમાં આવે છે અને તેમને પાર્કિંગની સુવિધા મળી રહે તે માટે આ પ્રોજેક્ટ હાથ ધરવામાં આવી રહ્યો હોવાનું સૂત્રોએ જણાવ્યું હતું.
રોટરી પાર્કિંગ સિસ્ટમની રચના શહેરી વિસ્તારોની મર્યાદિત જગ્યામાં વધુ કાર પાર્ક કરવાની સુવિધા ઊભી કરવાનો હોય છે. આ સુવિધાની મુખ્ય વિશેષતા એ છે કે તે એવી જગ્યામાં એકસાથે લગભગ ૧૨ કાર સમાવી શકે છે જ્યાં સામાન્ય રીતે માત્ર બે જ કાર સમાઈ શકતી હોય. આનો અર્થ એ છે કે સમાન વિસ્તારમાં પરંપરાગત પાર્કિંગની તુલનામાં અહીં પાર્કિંગ ક્ષમતામાં લગભગ છ ગણો વધારો થાય છે.
સ્થાનિક વહીવટી તંત્રના જણાવ્યા અનુસાર, ઓટોમેટેડ-શૈલીની પાર્કિંગ વ્યવસ્થા ઉપલબ્ધ જમીનનો શ્રેષ્ઠ ઉપયોગ કરવાની સાથે પાર્કિંગને વધુ સુલભ, સુરક્ષિત અને વ્યવસ્થિત બનાવવામાં મદદરૂપ થશે.
પાર્કિંગની જગ્યાઓની ઉપલબ્ધતા અને વ્યવસ્થાપનમાં સુધારો કરીને, આ સુવિધા રિલીફ રોડ અને રતનપોલ આસપાસ ટ્રાફિકની સમસ્યા ઘટાડવાના પ્રયાસોમાં પણ યોગદાન આપે તેવી અપેક્ષા છે. પ્રમાણમાં ઓછી જગ્યામાં વધુ વાહનો સમાવી શકતી હોવાથી, આ સિસ્ટમ વાહનચાલકો માટે રસ્તાની બાજુએ પાર્કિંગ શોધવાની જરૂરિયાત ઘટાડી શકે છે.
રિલિફ રોડ અને રતનપોળ ખૂબ જ વ્યસ્ત એરિયા છે અને અહીં આ સુવિધા ટ્રાફિકજામમાં પણ રાહત આપશે તેમ માનવામાં આવે છે. આ સાથે માર્કેટમાં ખરીદી માટે આવતા ગ્રાહકોએ પાર્કિંગ માટે આમતેમ રખડવું નહીં પડે, તેમ સૂત્રો જણાવે છે.
આ પ્રોજેક્ટ પૂર્ણ થયા બાદ, રતનપોળ ખાતેની રોટરી પાર્કિંગ સુવિધા વેપારીઓ, ખરીદી કરવા આવતા લોકો અને અન્ય મુલાકાતીઓ માટે પાર્કિંગનો વધુ સુવ્યવસ્થિત વિકલ્પ પૂરો પાડશે અને સાથે જ આસપાસના રિલીફ રોડ વિસ્તારમાં ટ્રાફિક બહેતર બનાવવામાં પણ મદદરૂપ થશે.
