નવી દિલ્હીઃ સુપ્રીમ કોર્ટે EWS (આર્થિક રીતે નબળા વર્ગ) માટેની આવક મર્યાદા અને ખાનગી મેડિકલ કોલેજોની ફી અંગેની અરજીને ફગાવી દીધી છે. સુપ્રીમ કોર્ટે આ અંગે એક મહત્વની ટિપ્પણી કરી છે. કોર્ટે જણાવ્યું છે કે ખાનગી કોલેજોને સરકારી કોલેજો જેવી જ ફી રાખવા માટે મજબૂર કરી શકાય નહીં. સરકારી સંસ્થાઓને સરકાર તરફથી ગ્રાન્ટ (અનુદાન) મળે છે, જ્યારે ખાનગી સંસ્થાઓ પોતાની ફીની આવકથી ચાલે છે. માત્ર એટલા માટે કે ખાનગી કોલેજોની ફી વધારે છે, તેમને સરકારી કોલેજો જેટલી જ ફી વસૂલવાનો આદેશ આપી શકાય નહીં.

જો ખાનગી મેડિકલ કોલેજોને પૂરતી ફી લેતા રોકવામાં આવશે, તો તબીબી શિક્ષણ (મેડિકલ એજ્યુકેશન) માં તેમનું યોગદાન પ્રભાવિત થશે. દેશને વધુ ડોક્ટરોની જરૂર છે અને ખાનગી મેડિકલ કોલેજો આમાં મહત્વની ભૂમિકા ભજવે છે.

અરજદારની આ હતી માંગ

સુપ્રીમ કોર્ટે આર્થિક રીતે નબળા વર્ગ (EWS)ની ₹8 લાખની વાર્ષિક આવક મર્યાદા અને પ્રાઈવેટ મેડિકલ કોલેજોની ઊંચી ફી વચ્ચેના વિરોધાભાસ અંગે દાખલ કરવામાં આવેલી અરજીને ફગાવી દીધી છે. આ મામલો જસ્ટિસ બી.વી. નાગરત્ના અને જસ્ટિસ જોયમાલ્યા બાગચીની બેંચ સમક્ષ સુનાવણી માટે આવ્યો હતો. રાજસ્થાનના હર્ષવર્ધન સિંહે પોતાની અરજીમાં જણાવ્યું હતું કે, EWS માટે નક્કી કરવામાં આવેલી ₹8 લાખની વાર્ષિક આવક મર્યાદાનો કોઈ વ્યવહારિક અર્થ રહેતો નથી, કારણ કે પ્રાઈવેટ મેડિકલ કોલેજોની ફી વર્ષે લગભગ ₹18.9 લાખથી ₹25 લાખ સુધીની હોય છે. આવી સ્થિતિમાં, EWS કેટેગરીમાં આવતા ઘણા વિદ્યાર્થીઓ પણ મેડિકલ શિક્ષણનો ખર્ચ ઉઠાવી શકતા નથી. સુનાવણી દરમિયાન જસ્ટિસ નાગરત્નાએ જણાવ્યું હતું કે, પ્રાઈવેટ સેલ્ફ-ફાઇનાન્સ (સ્વનિર્ભર) સંસ્થાઓની સરખામણી સરકારી કોલેજો સાથે કરી શકાય નહીં.

વિદ્યાર્થીઓ ફી ન ભરી શકે તો સ્કોલરશિપ સહિત અન્ય વિકલ્પો ઉપલબ્ધ 

જસ્ટિસ નાગરત્નાએ જણાવ્યું કે, જો કોઈ વિદ્યાર્થી ફીનો ખર્ચ ન ઉઠાવી શકે, તો તેના માટે સ્કોલરશિપ (છાત્રવૃત્તિ), સબવેન્શન (નાણાકીય સહાય) અથવા અન્ય આર્થિક મદદના વિકલ્પો ઉપલબ્ધ છે. રાજસ્થાન હાઈકોર્ટે અગાઉથી જ પ્રાઈવેટ મેડિકલ કોલેજોના ફીના માળખાને યોગ્ય અને કાયદેસર માન્યું હતું. હાઈકોર્ટે કહ્યું હતું કે, આ ફી રાજ્યની ફી રેગ્યુલેટરી કમિટી (ફી નિયામક સમિતિ) દ્વારા સુપ્રીમ કોર્ટની માર્ગદર્શિકા મુજબ નક્કી કરવામાં આવી છે.

સુપ્રીમ કોર્ટે જણાવ્યું કે, અમને હાઈકોર્ટના આ આદેશમાં દખલ કરવાનું કોઈ કારણ દેખાતું નથી. આ સાથે જ કોર્ટે અરજી ફગાવી દીધી છે. જોકે, અદાલતે એ પણ સ્પષ્ટ કર્યું છે કે આ બાબત સાથે જોડાયેલો કોઈ મોટો કાનૂની પ્રશ્ન ભવિષ્યમાં ઉઠાવી શકાય છે અને તે વિકલ્પ હજુ ખુલ્લો રાખવામાં આવ્યો છે.