તેહરાન: ઈરાનના ઈસ્લામિક રિવોલ્યુશનરી ગાર્ડ કોર્પ્સ (IRGC) એ હોર્મુઝની સામુદ્રધુની (સ્ટ્રેટ ઓફ હોર્મુઝ) ને અસ્થાયી રૂપે બંધ કરવાની જાહેરાત કરી દીધી છે. ઈરાને અમેરિકી હસ્તક્ષેપનો આરોપ લગાવતા આ પગલું ભર્યું છે.

IRGC એ એક જહાજ પર ચેતવણીરૂપ ગોળીબાર કર્યો હતો, જે પરવાનગી વગર આ રૂટ પરથી પસાર થવાનો પ્રયાસ કરી રહ્યું હતું. ત્યારબાદ હોર્મુઝને અસ્થાયી ધોરણે બંધ કરી દેવામાં આવ્યું.

અમેરિકાએ હુમલા શરૂ કર્યા

બીજી તરફ, અમેરિકી સેનાએ જણાવ્યું કે હોર્મુઝની સામુદ્રધુનીમાંથી પસાર થઈ રહેલા એક વ્યાપારી જહાજ પર થયેલા હુમલા બાદ અમેરિકાએ રવિવારે વહેલી સવારે ઈરાન પર હુમલા શરૂ કરી દીધા છે.

મીડિયા રિપોર્ટ અનુસાર બંદર અબ્બાસ અને સિરિકમાં વિસ્ફોટો થયા હોવાની માહિતી મળી છે, જ્યારે અન્ય એક ન્યૂઝ એજન્સીના જણાવ્યા અનુસાર કેશમ ટાપુ પર પણ બ્લાસ્ટના અવાજો સંભળાયા હતા.

મોજતબા લીધી પ્રતિજ્ઞા

ઈરાનના સુપ્રીમ લીડર આયતુલ્લાહ મોજતબા ખામેનેઈ એ પોતાના પિતા અલી ખામેનેઈની હત્યાનો બદલો લેવાના સોગંદ લીધા છે. તેમણે જણાવ્યું કે બદલો લેવો એ આપણા રાષ્ટ્રની ઈચ્છા છે.

આ ઘટના અમેરિકા અને ઈરાન વચ્ચે ચાલી રહેલા તણાવની વચ્ચે બની છે. હોર્મુઝની સામુદ્રધુની (સ્ટ્રેટ ઓફ હોર્મુઝ) દુનિયાના તેલ નિકાસ માટેનો એક મહત્વપૂર્ણ માર્ગ છે, જ્યાંથી વૈશ્વિક તેલ પુરવઠાનો મોટો હિસ્સો પસાર થાય છે. તેને બંધ કરવાથી આંતરરાષ્ટ્રીય તેલ બજાર અને શિપિંગ (દરિયાઈ પરિવહન) પર ઊંડી અસર પડી શકે છે.

ઈરાન અને અમેરિકા વચ્ચે તાજેતરમાં થયેલા કરાર (MoU) છતાં પણ તણાવ યથાવત છે. ઈરાન અમેરિકી હસ્તક્ષેપ અને ઈઝરાયેલની કાર્યવાહીને (ખાસ કરીને ગાઝા અને લેબનોનમાં) કરારનું ઉલ્લંઘન ગણાવી રહ્યું છે.

ઈરાનમાં વિસ્ફોટ

મીડિયા રિપોર્ટ અનુસાર, રવિવારે વહેલી સવારે દક્ષિણ ઈરાનના બુશેહર અને અસલુયેહ શહેરોમાં વિસ્ફોટો થયા હોવાના સમાચાર મળ્યા છે. બંદર અબ્બાસ અને સિરિકમાં પણ વિસ્ફોટોની માહિતી સામે આવી છે, કેશમ ટાપુ પર પણ ધડાકાના અવાજો સંભળાયા હતા.

ઈરાનનો પરમાણુ ઉર્જા પ્લાન્ટ બુશેહર શહેરની સરહદ (બહારના વિસ્તાર) પર આવેલો છે. આ અહેવાલો એવા સમયે આવ્યા છે જ્યારે અમેરિકાનું કહેવું છે કે તેણે ઈરાનને ત્યારે નિશાન બનાવ્યું જ્યારે ઈસ્લામિક રિવોલ્યુશનરી ગાર્ડ કોર્પ્સ (IRGC) ના દળોએ હોર્મુઝની સામુદ્રધુનીમાંથી પસાર થઈ રહેલા સાયપ્રસના ધ્વજવાળા એક કન્ટેનર જહાજ પર હુમલો કર્યો હતો.