મિડલ ઈસ્ટમાં ચાલી રહેલા સૈન્ય સંઘર્ષે હવે ભયાનક વળાંક લીધો છે. ઈરાને વ્યૂહાત્મક રીતે અત્યંત મહત્વપૂર્ણ ગણાતી 'સ્ટ્રેટ ઓફ હોર્મુઝ' (હોર્મુઝની ખાડી) મુદ્દે અમેરિકા અને ઈઝરાયલને ગંભીર પરિણામોની ચીમકી આપી છે. ખાસ કરીને અમેરિકી રાષ્ટ્રપતિ ડોનાલ્ડ ટ્રમ્પને સીધો પડકાર ફેંકતા ઈરાને સ્પષ્ટ કર્યું છે કે શત્રુ દેશોના જહાજો માટે આ દરિયાઈ માર્ગ હવે સુરક્ષિત રહેશે નહીં. આ ધમકીને પગલે વૈશ્વિક સ્તરે ઉર્જા સંકટ વધુ ઘેરું બનવાની આશંકા સેવાઈ રહી છે.
ઈરાનના રિવોલ્યુશનરી ગાર્ડ્સના પ્રવક્તાએ આક્રમક નિવેદન આપતા જણાવ્યું છે કે, જો અમેરિકામાં હિંમત હોય તો તે પોતાના યુદ્ધ જહાજોની મદદથી તેલના ટેન્કરોને આ ખાડીમાંથી સુરક્ષિત બહાર કાઢીને બતાવે. ઈરાનનો દાવો છે કે તેમણે આ માર્ગ સંપૂર્ણ બંધ નથી કર્યો, પરંતુ અમેરિકા અને ઈઝરાયલ સાથે જોડાયેલા કોઈપણ જહાજને અહીંથી પસાર થવાની મંજૂરી આપવામાં આવશે નહીં. હાલમાં સેંકડો વેપારી જહાજો આ વિસ્તારમાં અટવાયા હોવાના અહેવાલ છે.
હોર્મુઝની ખાડી દુનિયા માટે તેલ અને ગેસ સપ્લાયની 'લાઈફલાઈન' સમાન છે. વિશ્વના કુલ કાચા તેલના પુરવઠાનો લગભગ 20% હિસ્સો આ સાંકડા માર્ગેથી પસાર થાય છે. ઈરાનની આ કાર્યવાહીને કારણે આંતરરાષ્ટ્રીય બજારમાં કાચા તેલના ભાવમાં પ્રતિ બેરલ 10 ડોલરનો ઉછાળો જોવા મળ્યો છે. જો આ ગતિરોધ લાંબો સમય ચાલશે તો એશિયા અને યુરોપના દેશોમાં ઈંધણની ભારે અછત સર્જાઈ શકે છે, જેની સીધી અસર સામાન્ય જનતાના ખિસ્સા પર પડશે.
ઈરાનના આ પડકાર સામે અમેરિકા પણ સજ્જ થઈ રહ્યું છે. અમેરિકી નાણા મંત્રી સ્કોટ બેસેન્ટે જણાવ્યું છે કે તેઓ રાજદ્વારી અને સૈન્ય એમ બંને રીતે આ સમસ્યાનો ઉકેલ લાવવા પ્રયત્નશીલ છે. પેન્ટાગન હવે હોર્મુઝની ખાડીમાં વધારાના યુદ્ધ જહાજો તૈનાત કરવાની યોજના બનાવી રહ્યું છે. ઈરાને પોતાની સરહદ પર ઘાતક મિસાઈલો અને ડ્રોન તૈનાત કરી રાખ્યા છે, જે કોઈપણ સમયે મોટા જહાજો પર 'સ્વર્મ એટેક' કરવાની ક્ષમતા ધરાવે છે, જેના કારણે આ વિસ્તાર હવે વિસ્ફોટક સ્થિતિમાં છે.
