બન્ને કૅપ્ટન વચ્ચે `નો હૅન્ડશેક': દીપ્તિએ ઓવરમાં ત્રણ વિકેટ લઈને ખેલ ખતમ કર્યો
બર્મિંગમઃ ભારતની મહિલા ટી-20 ટીમે અહીં રવિવારે કટ્ટર હરીફ પાકિસ્તાનને 64 રનથી હરાવીને એને વર્લ્ડ કપના ઇતિહાસમાં વધુ એક નાલેશી તરફ મોકલી હતી. ટી-20 વિશ્વ કપ (T20 WC)માં ભારત હવે પાકિસ્તાન કરતાં 7-2થી આગળ છે. બૅટિંગમાં સ્મૃતિ મંધાના (68 રન, 44 બૉલ, બે સિક્સર, નવ ફોર) અને બોલિંગમાં દીપ્તિ શર્મા (4-0-10-5)નો દમદાર પર્ફોર્મન્સ હતો. દીપ્તિએ વિક્રમજનક બોલિંગમાં પહેલાં બે વિકેટ લીધી હતી અને મૅચની આખરી બનેલી 17મી ઓવરમાં પાંચ બૉલમાં આખરી ત્રણ વિકેટ લઈ લીધી હતી.
બન્ને કૅપ્ટન વચ્ચે ધાર્યા મુજબ `નો હૅન્ડશેક'ની નીતિ ચાલુ રહી હતી. જોકે હરમનપ્રીતે હરીફ સુકાની ફાતિમા સના સાથે ટૉસ વખતે હાથ મિલાવવાનું ટાળ્યું એમ કહીએ તો પણ ખોટું નથી.
Who pissed her off😭 pic.twitter.com/2GQTptsLjX
— ille (@mekokyapata) June 14, 2026
શ્રી ચરનીની ત્રણ વિકેટ
પાકિસ્તાન 171 રનના લક્ષ્યાંક સામે 106 રનમાં ઑલઆઉટ થઈ ગઈ હતી. બીજી સ્પિનર શ્રી ચરનીએ ત્રણ અને શેફાલી વર્માએ એક વિકેટ મેળવી હતી. વિકેટકીપર ઓપનર મુનીબા અલીના 41 રન ટીમમાં હાઇએસ્ટ હતા. પાકિસ્તાન વર્લ્ડ કપમાં 10 વર્ષથી ભારત સામે નથી જીત્યું એ જોતાં આ મૅચમાં પણ ભારત જીતવા ફેવરિટ હતું.
ભારતે 171 રનનો ટાર્ગેટ આપ્યા બાદ પાકિસ્તાન (Pakistan)ની 10 ઓવરમાં 72 રનના સ્કોર સુધીમાં ત્રણ વિકેટ લઈ લીધી એને પગલે ફાતિમા સનાની ટીમ પ્રેશરમાં આવી ગઈ હતી. ભારતને પાકિસ્તાની ખેલાડીઓને વધુ માનસિક દબાણમાં લાવીને આ મૅચ જીતવાની સારી તક હતી અને એવું જ બન્યું હતું.
Winning Start ✅
— Star Sports (@StarSportsIndia) June 14, 2026
Absolute Domination ✅
After winning the ICC Women's ODI World Cup, #TeamIndia begin their quest to now conquer the ICC Women's T20 World Cup with a comprehensive win over arch-rivals Pakistan! ❤️
#T20WorldCup | #INDvsPAK [#TeamIndiaWomen, #DeeptiSharma,… pic.twitter.com/NsiQxG0N9L
સ્મૃતિનો ભારતીય વિક્રમ
એ પહેલાં, ભારતે બૅટિંગ પસંદ કરીને છ વિકેટે 170 રન કર્યા હતા. સ્મૃતિ મંધાના ભારત વતી ટી-20માં સૌથી વધુ સિક્સર ફટકારવાનો હરમનપ્રીતનો રેકૉર્ડ તોડી નાખ્યો છે. હરમનની 86 સામે હવે મંધાનાની 87 સિક્સર છે. ભારતની ઇનિંગ્સમાં હરમનપ્રીત કૌર (36 રન, 35 બૉલ, ચાર ફોર) અને વિકેટકીપર રિચા ઘોષ (34 રન, 17 બૉલ, એક સિક્સર, પાંચ ફોર)ના પણ મહત્વના યોગદાન હતા. વન-ડે વર્લ્ડ કપની સુપરસ્ટાર સ્પિન ઑલરાઉન્ડર દીપ્તિ શર્મા 12 રન બનાવીને અણનમ રહી હતી. સાદિયા અને કૅપ્ટન ફાતિમા સનાએ બે-બે વિકેટ લીધી હતી.
ઉલ્લેખનીય છે કે આ મૅચ પહેલાં ઇંગ્લૅન્ડનો શ્રીલંકા સામે, સ્કૉટલૅન્ડનો આયરલૅન્ડ સામે, ઑસ્ટ્રેલિયાનો સાઉથ આફ્રિકા સામે, વેસ્ટ ઇન્ડિઝનો ન્યૂ ઝીલૅન્ડ સામે અને બાંગ્લાદેશનો નેધરલૅન્ડ્સ સામે વિજય થયો હતો.
