દર્શન ભાવસાર

માલદાર કેવી રીતે થવાય?

* ઉધાર માલ લઈ- રોકડે વેંચી- રકમ ગપચાવી જવાની...

કાંણો મામો કેવો હોય?

* બારમા ખેલાડી જેવો...

લગ્નમાં ફટાણા તો છૂટાછેડા વખતે શું ગવાય?

* અપલખ્ખણ, અવગુણ, અપમાન અને અપયશના ગાન...

બાયોલોજી- સોશિયોલોજીની જેમ પ્રેમોલોજી ભણાવાય તો?

* ક્લાસના બદલે હોલ રાખવો પડે... સો ટકા હાજરી ગેરેન્ટેડ ...

શેની ગડ ના વળે?

* ભાંજગડની....

આંગણું વાંકું હોય તો?

* વાંકી નાચનારીને લાવજે તો એને બધું સીધું લાગશે ...

સળગતા પ્રશ્નોની ચર્ચા ક્યાં થાય?

* એરકન્ડિશન્ડ ઓફિસમાં...કોલ્ડ ડ્રિન્કસ સાથે...

બદામ ખાવાથી શું યાદ રહે?

* ફરીથી (મફ્ત) બદામ ખાવાનું...

યાદશક્તિ કેમ ટૂંકી હોય?

* લાંબી ના હોય એટલે.

કજિયાળી સાસુ અને વઢકણી વહુ હોય તો સસરાજી કેવા હોય?

* શાંત ગુસ્સાવાળા ... 

ભગવાન પ્રાર્થના ના સાંભળે તો?

* નસીબ તમારા... 

લાંબા જોડે ટૂંકો જાય તો.?

* જવા દો... 

 સમુદ્રમંથન થાય તો તળાવ - ખાબોચિયામાં શું?

* ખોબલે ખોબલે ચિંતન... 

કૂવામાં ના હોય તો હવાડાનું શું થાય?

* શૂન્યમાંથી શૂન્ય બાદ કરો એના જેવું ...

વાંકદેખા ક્યાં દેખાય?

* આ રહ્યા ... તમારી પાછળ!