મહાયુતિમાં શું ચાલી રહ્યું છે?સૂત્રોએ માહિતી આપી હતી કે ભાજપના મોવડીમંડળે ‘ઓપરેશન ટાઈગર’ અને ‘ઓપરેશન તુતારી’ પર બ્રેક લગાવી દીધી છે

(અમારા પ્રતિનિધિ તરફથી)
મુંબઈ: સૂત્રોએ માહિતી આપી હતી કે ભાજપે નાયબ મુખ્ય પ્રધાન એકનાથ શિંદે દ્વારા હાથ ધરવામાં આવનારા ‘ઓપરેશન ટાઈગર’ અને ‘ઓપરેશન તુતારી’ પર હાલ પુરતી બ્રેક લગાવી દીધી છે. એવી ચર્ચા થઈ રહી હતી કે શિવસેના (યુબીટી) અને શરદ પવારની એનસીપી (એસપી)ના છ-છ સાંસદો શિંદેના સંપર્કમાં હતા અને શિંદે આ સાંસદોને પોતાના પક્ષમાં ખેંચવા અને કેન્દ્રમાં વધુ બે પ્રધાન પદ મેળવવા માટે તૈયાર હતા. જોકે, ભાજપના મોવડીમંડળે આ આખા ઓપરેશનને અત્યારે લાલ ઝંડી દેખાડી હોવાનું કહેવાઈ રહ્યું છે. 

ગયા મહિને 17 માર્ચે રાજ્ય વિધાનસભાનું બજેટ સત્ર ચાલી રહ્યું હતું ત્યારે નાયબ મુખ્ય પ્રધાન એકનાથ શિંદે રાજધાની દિલ્હીની મુલાકાતે ગયા હતા. આ મુલાકાત દરમિયાન તેઓ વડા પ્રધાન નરેન્દ્ર મોદીને મળ્યા હતા. સોશિયલ મીડિયા પર તેમની મુલાકાતના ફોટા વાયરલ થતાં જ, ‘ઓપરેશન ટાઇગર’ અને ‘ઓપરેશન તુતારી’ ગલ્લીથી લઈને દિલ્હી સુધી ચર્ચાનો વિષય બન્યા હતા. એવી વાતો શરૂ થઈ ગઈ કે ઠાકરે અને શરદ પવારના પક્ષના છ-છ સાંસદોને શિંદે જૂથ દ્વારા પોતાની પાર્ટીમાં લઈ લેવામાં આવશે. જોકે, ઠાકરે જૂથના સાંસદ સંજય રાઉતે દાવો કર્યો હતો કે અમારા એક પણ સાંસદને તોડી શકાશે નહીં. બીજી તરફ, કેટલાક એનસીપી (એસપી)ના નેતાઓએ છ સાંસદોને તોડવામાં આવશે તેવા દાવાને પણ ફગાવી દીધો હતો.

શિંદે જૂથની ચોક્કસ રણનીતિ શું છે?
ઓપરેશન ટાઇગર અને ઓપરેશન તુતારી પાછળ નાયબ મુખ્ય પ્રધાન એકનાથ શિંદેની મોટી રણનીતિ હતી. શિંદે જૂથ કેન્દ્રમાં વધુ બે પ્રધાન પદાં ઇચ્છે છે, અને આ માટે શિંદેના પુત્ર શ્રીકાંત શિંદે અને સાંસદ શ્રીરંગ બારણેના નામ સમાચારમાં હતા. તેથી, શિંદે જૂથે આ બંનેને પ્રધાનપદ અપાવવા માટે ઠાકરે અને પવારના છ-છ સાંસદોને તોડવાની તૈયારી કરી હતી. વડા પ્રધાન નરેન્દ્ર મોદીના નેતૃત્વ હેઠળની રાષ્ટ્રીય લોકશાહી ગઠબંધન સરકારમાં, ભાજપ પાસે સૌથી વધુ 240 સાંસદો છે. તેમને ચંદ્રાબાબુ નાયડુની તેલુગુ દેશમ પાર્ટીના 16 સાંસદો અને નીતિશ કુમારની રાષ્ટ્રીય જનતા દળના 12 સાંસદોનું સમર્થન છે. આ ઉપરાંત, શિંદે જૂથના સાત સાંસદો પણ કેન્દ્ર સરકારને ટેકો આપે છે. આ દરમિયાન, જો શિવસેના ઠાકરે જૂથ અને શરદ પવાર જૂથના છ-છ એમ 12 સાંસદો શિંદે જૂથમાં જોડાયા હોત, તો તેમના સાંસદોની સંખ્યા 19 સુધી પહોંચી ગઈ હોત. જોકે, ભાજપે ‘ઓપરેશન ટાઇગર’ અને ‘ઓપરેશન તુતારી’ને પહેલાથી જ લાલ ઝંડી આપી દીધી છે. વિશ્ર્વસનીય સૂત્રોએ જણાવ્યું હતું કે કેન્દ્રીય પ્રધાન અમિત શાહ તેમની અગાઉની દિલ્હી મુલાકાત દરમિયાન એકનાથ શિંદેને મળ્યા ન હતા તેના પરથી કેટલાક સંકેત આપવામાં આવ્યા હતા. 

ભાજપની લાલ ઝંડી ખરેખર શેના માટે છે?
સૂત્રોના જણાવ્યા અનુસાર, જો નાયબ મુખ્ય પ્રધાન એકનાથ શિંદે ઓપરેશન ટાઇગર અને ઓપરેશન તુતારી હેઠળ વિપક્ષી સાંસદોને તોડવા જઈ રહ્યા છે, તો પણ ભાજપ તેમના પર નિયંત્રણ ધરાવે છે. કેન્દ્રમાં પૂરતી તાકાત હોવાથી, વર્તમાન પરિસ્થિતિમાં ભાજપને બીજી પાર્ટીને વિભાજીત કરવાની જરૂર જણાતી નથી. સંયુક્ત શિવસેના અને રાષ્ટ્રવાદી કોંગ્રેસ પાર્ટી વચ્ચે ભાગલા પડ્યા પછી, બંને પક્ષોના નેતાઓએ ભાજપની ટીકા કરી હતી અને તેથી જ એવું કહેવામાં આવી રહ્યું છે કે પક્ષના નેતાઓ શિંદેની રણનીતિ સાથે સહમત નથી. ભાજપના આંતરિક સૂત્રોના મતે, જો ઠાકરે અને શરદ પવાર જૂથના સાંસદો શિવસેનામાં જોડાય છે, તો દિલ્હી સહિત મહારાષ્ટ્રમાં શિંદેનું રાજકીય વજન વધુ વધશે. તે જ આધારે, તેઓ રાજ્યમાં ભાજપના નેતાઓ પર દબાણ યુક્તિઓનો ઉપયોગ કરી શકે છે. શિંદેએ ભૂતકાળમાં પણ ભાજપના નેતાઓ પર દબાણ યુક્તિઓનો ઉપયોગ કરવા માટે પોતાની રાજકીય શક્તિનો ઉપયોગ કરવાનો પ્રયાસ કર્યો હતો. તેમણે રાજ્ય પ્રધાનમંડળમાં મહત્વપૂર્ણ પદો માટે રાજકીય દબાણની રમત રમી હતી. આ વાત સમજીને, દિલ્હીમાં પક્ષના નેતાઓએ શિંદેના ઓપરેશન ટાઇગર અને ઓપરેશન તુતારી પર બ્રેક લગાવી હોવાનું કહેવાય છે.

ભાજપનો વાસ્તવિક ડર શું છે? 
ભાજપના પક્ષના નેતાઓ ઉદ્ધવ ઠાકરે અને શરદ પવાર સાથે મોટી રાજકીય દુશ્મનાવટ લેવાની કોઈ ઇચ્છા ધરાવતા નથી. સૂત્રોએ જણાવ્યું છે કે કેન્દ્રમાં ભાજપના પક્ષના નેતાઓએ સ્પષ્ટ કરી દીધું છે કે જો શરદ પવારના જૂથના સાંસદો રાષ્ટ્રીય લોકશાહી જોડાણ (એનડીએ)માં જોડાવા માગતા હોય, તો તેમણે સુનેત્રા પવારની એનસીપીમાં જોડાવું જોઈએ અને પછી જ કેન્દ્ર સરકારને ટેકો આપવો જોઈએ. રાજકીય વિશ્લેષકોના મતે, હાલમાં ભાજપને કેન્દ્રમાં પોતાની તાકાત વધારવાની જરૂર નથી. તેથી વધુ એક વખત પક્ષ તોડવા કરતાં ભાજપે કદાચ પોતાનું રાજકીય અસ્તિત્વ જાળવી રાખવું અને સાથી પક્ષોને નિયંત્રણમાં રાખવાનું વધુ મહત્વનું માન્યું હશે. એક અંદાજ એવો પણ છે કે ભાજપે નાયબ મુખ્ય પ્રધાન શિંદેના ઓપરેશન ટાઇગર અને ઓપરેશન તુતારી પર બ્રેક લગાવી દીધી છે. આ દરમિયાન, જો ભાજપે શિંદે જૂથના પ્રચાર પર બ્રેક લગાવી દીધી હોવા છતાં પણ શું તેમને કેન્દ્રમાં વધુ બે મંત્રી પદ આપવામાં આવશે? એ જોવું મહત્વપૂર્ણ રહેશે.