નવી દિલ્હી: વડાપ્રધાન નરેન્દ્ર મોદીએ આજે આસામના મોરાન ખાતે પૂર્વોત્તર ભારતના પ્રથમ 'ઇમરજન્સી લેન્ડિંગ ફેસિલિટી' (ELF) પર હવામાંથી સીધું ઉતરાણ કરીને એક નવો ઇતિહાસ રચ્યો છે. વાયુસેનાના શક્તિશાળી C-130J સુપર હર્ક્યુલસ વિમાનમાં સવાર થઈને વડાપ્રધાને નેશનલ હાઈવે-37 પર ઉતરાણ કર્યું હતું. આ સાથે જ આસામમાં તેમની એક દિવસીય મુલાકાતનો પ્રારંભ થયો છે, જે રાજ્યની સુરક્ષા અને વિકાસની દૃષ્ટિએ અત્યંત મહત્વપૂર્ણ માનવામાં આવે છે.
અંદાજે 100 કરોડના ખર્ચે તૈયાર કરાયેલ મોરાન બાયપાસ પરનો આ 4.2 કિમી લાંબો રનવે માત્ર સૈન્ય જ નહીં, પણ નાગરિક હેતુઓ માટે પણ આશીર્વાદરૂપ સાબિત થશે. વડાપ્રધાને જણાવ્યું હતું કે, આ સુવિધા મુશ્કેલ પરિસ્થિતિઓમાં બચાવ અને રાહત કામગીરીને વેગ આપશે. આ ELF 40 ટન સુધીના ફાઈટર જેટ અને 74 ટન સુધીના ટ્રાન્સપોર્ટ એરક્રાફ્ટને હેન્ડલ કરવા સક્ષમ છે. ઉતરાણ બાદ PM મોદીએ તેજસ, સુખોઈ અને રાફેલ જેવા ફાઈટર જેટ્સનું શાનદાર એર શો પણ નિહાળ્યું હતું.
આ મુલાકાત દરમિયાન PM મોદી ગુવાહાટી અને ઉત્તર ગુવાહાટીને જોડતા બ્રહ્મપુત્રા નદી પરના બહુપ્રતિક્ષિત બ્રિજનું લોકાર્પણ કરશે. આ બ્રિજથી ટ્રાફિકની સમસ્યા હળવી થશે અને મુસાફરીના સમયમાં મોટો ઘટાડો થશે. આ ઉપરાંત, શિક્ષણ ક્ષેત્રે મહત્વનું કદમ ઉઠાવતા તેઓ બોંગોરા ખાતે ઇન્ડિયન ઇન્સ્ટિટ્યૂટ ઓફ મેનેજમેન્ટ (IIM) ગુવાહાટીના કામચલાઉ કેમ્પસનું પણ ઉદ્ઘાટન કરશે, જે રાજ્યના યુવાનો માટે પ્રગતિના નવા દ્વાર ખોલશે.
પર્યાવરણની જાળવણી અને કાર્બન ઉત્સર્જન ઘટાડવાના ઉદ્દેશ્ય સાથે, વડાપ્રધાન ગુવાહાટી શહેર માટે વધારાની 100 ઈલેક્ટ્રિક બસોને લીલી ઝંડી બતાવશે. આ પહેલથી શહેરમાં હવાની ગુણવત્તા સુધરશે અને જાહેર પરિવહન વ્યવસ્થા વધુ મજબૂત બનશે. પોતાના પ્રવાસના અંતે તેઓ ગુવાહાટીમાં ભાજપના કાર્યકરોને સંબોધિત કરશે, જેમાં રાજ્યના ભવિષ્ય અને વિકાસના લક્ષ્યો પર ચર્ચા કરવામાં આવશે.
