અમદાવાદઃ શહેરમાં સવારથી જ મેઘરાજા મન મૂકીને વરસી રહ્યા છે. અમદાવાદ મ્યુનિસિપલ કોર્પોરેશનના સેન્ટ્રલ કંટ્રોલ રૂમના સત્તાવાર આંકડા અનુસાર, સવારે 6:00 થી 9:30 વાગ્યા સુધીના માત્ર સાડા ત્રણ કલાકમાં શહેરમાં સરેરાશ 66.04 મિમી (આશરે 2.6 ઈંચ) વરસાદ ખાબક્યો હતો. ભારે વરસાદના પગલે શહેરના નીચાણવાળા વિસ્તારો અને મુખ્ય માર્ગો પર પાણી ભરાઈ જતાં સવારના સમયે નોકરી-ધંધે નીકળેલા વાહનચાલકો તથા રાહદારીઓને ભારે હાલાકીનો સામનો કરવો પડ્યો હતો. ધોધમાર વરસાદના કારણે જનજીવ અસ્તવ્યસ્ત થઈ ગયું હતું.
ક્યાં કેટલો વરસાદ
દક્ષિણ-પશ્ચિમ ઝોન: સૌથી વધુ સરેરાશ 76 મિમીથી વધુ વરસાદ દક્ષિણ-પશ્ચિમ ઝોનમાં નોંધાયો હતો. જેમાં સરખેજ અર્બન હેલ્થ સેન્ટર ખાતે 126.50 મિમી (આશરે 5 ઈંચ) અને જોધપુર-બોપલ આસપાસના વિસ્તારોમાં 104.50 મિમી વરસાદ વરસ્યો છે. આ ઉપરાંત સાણંદ રોડ/સરખેજ વિસ્તારમાં 92 મિમી તેમજ બોપલમાં 66 મિમી વરસાદ નોંધાયો છે.
પશ્ચિમ ઝોન: પશ્ચિમ ઝોનમાં સરેરાશ 79.86 મિમી (3 ઈંચથી વધુ) વરસાદ ખાબક્યો છે. જેમાં નવરંગપુરામાં સૌથી વધુ 103 મિમી (4 ઈંચ), વાસણામાં 98 મિમી, ઉસ્માનપુરામાં 71.50 મિમી, રાણીપમાં 74.50 મિમી અને ટાગોર કંટ્રોલ ખાતે 86 મિમી વરસાદ નોંધાયો હતો
ઉત્તર-પશ્ચિમ ઝોન: બોડકદેવમાં 71.50 મિમી, ચાંદલોડિયામાં 79 મિમી, થલતેજમાં 67 મિમી અને મેમનગરમાં 84 મિમી વરસાદ વરસ્યો હતો.
પૂર્વ અને દક્ષિણ ઝોન: લાંભામાં 84.50 મિમી, મણિનગરમાં 64.50 મિમી, વિરાટનગરમાં 60.50 મિમી અને ચકુડિયામાં 61 મિમી વરસાદ નોંધાયો હતો.
વાસણા બેરેજના 14 દરવાજા ખોલાયા
ઉપરવાસ તેમજ શહેરમાં પડેલા ભારે વરસાદને કારણે સાબરમતી નદીની સપાટી જાળવી રાખવા માટે તંત્ર દ્વારા તાત્કાલિક પગલાં લેવામાં આવ્યા છે. વાસણા બેરેજ ખાતે પાણીની સપાટી 131 ફૂટે પહોંચી છે. સંત સરોવરમાંથી પાણીની આવક વચ્ચે નદીમાં 21,990 ક્યુસેક પાણી છોડવામાં આવી રહ્યું છે. પરિસ્થિતિને નિયંત્રણમાં રાખવા માટે વાસણા બેરેજના કુલ 14 દરવાજા ખોલી દેવાયા છે, જેમાં દરવાજા નંબર 25 થી 29 3 ફૂટ અને દરવાજા નંબર 16 થી 24 2 ફૂટ સુધી ખોલવામાં આવ્યા છે.
અમદાવાદ શહેરમાં ભારે વરસાદને પગલે શાળાઓને સૂચના આપવામાં આવી છે. પોતાની વિવેકબુદ્ધિથી જરૂર લાગ્યે શાળામાં રજા જાહેર કરવા સૂચના આપવામાં આવી છે. DEO દ્વારા શહેરની તમામ શાળાઓને સૂચના અપાઈ છે. નીચાણવાળા વિસ્તારમાં પાણી ભરાય તો રજા જાહેર કરવા પણ સૂચના અપાઈ છે. વિદ્યાર્થીઓની સલામતીને પ્રાધાન્ય આપવા શાળા સંચાલકોને સૂચના અપાઈ છે.
