અંબાજીઃ જગવિખ્યાત અને આસ્થાનું પ્રતિક એવું અંબાજી યાત્રાધામ હવે માત્ર ધાર્મિક જ નહીં, પરંતુ સાંસ્કૃતિક અને ભૌગોલિક ઓળખની દ્રષ્ટિએ પણ વૈશ્વિક નકશા પર વધુ મજબૂત બન્યું છે. લાખો શ્રદ્ધાળુઓની આસ્થા સાથે જોડાયેલા અંબાજી મંદિરના પરંપરાગત અને સ્વાદિષ્ટ મોહનથાળ પ્રસાદને જીઆઇ રજિસ્ટ્રી દ્વારા સત્તાવાર રીતે જીઆઇ ટેગ એનાયત કરવામાં આવ્યો છે. જેનું સર્ટિફ઼િકેટ પહેલા નોરતે આપવામાં આવશે. આ વિશેષ સિદ્ધિના કારણે હવે અંબાજીના મોહનથાળને રાષ્ટ્રીય સ્તરે એક વિશિષ્ટ કાયદાકીય સંરક્ષણ પ્રાપ્ત થયું છે, જે ગુજરાત માટે ગર્વની બાબત છે.

ઐતિહાસિક સિદ્ઘિ
આ ઐતિહાસિક સિદ્ધિ પાછળ શ્રી આરાસુરી અંબાજી માતા દેવસ્થાન ટ્રસ્ટ દ્વારા કરવામાં આવેલી સક્રિય અને પદ્ધતિસરની રજૂઆતો મુખ્ય આધાર રહી છે. આ ટ્રસ્ટ દ્વારા કરવામાં આવેલી અરજીને ગંભીરતાથી લઇને જીઆઈ રજિસ્ટ્રી દ્વારા 'અંબાજી મોહનથાળ'ને ખાધ પદાર્થોની ક્લાસ-30 શ્રેણી હેઠળ સત્તાવાર જીઆઇ ટેગ પ્રદાન કરવામાં આવ્યો છે. સત્તાવાર દસ્તાવેજો અનુસાર આ મહત્વપૂર્ણ સર્ટિફિકેટ ગત પહેલી ઓક્ટોબર, 2026ના રોજ જારી કરવામાં આવ્યું છે, જેનાથી ભક્તોમાં ખુશીની લહેર છે.

આ જીઆઇ ટેગ મળવાની સાથે જ અંબાજીનો મોહનથાળ દેશના અત્યંત સુપ્રસિદ્ધ અને વિશિષ્ટ મંદિર પ્રસાદોની હરોળમાં સામેલ સ્થાન પામી ગયો છે. અગાઉ દક્ષિણ ભારતના પ્રખ્યાત તિરુપતિ લાડુ અને પલાની પંચામૃતમ જેવા મર્યાદિત અને પવિત્ર પ્રસાદોને જ આ પ્રકારની વિશિષ્ટ ઓળખ મળી હતી, જેમાં હવે ઉત્તર ગુજરાતના અંબાજીના મોહનથાળનું નામ પણ જોડાઇ ગયું છે. 

આંતરરાષ્ટ્રીય સ્તરે ઓળખ મળી
આ પ્રસાદની ગુણવત્તા, શુદ્ધતા અને તેની સદીઓ જૂની પરંપરાગત ઓળખ હવે આંતરરાષ્ટ્રીય અને રાષ્ટ્રીય સ્તરે અકબંધ રહેશે.  સિદ્ધિના આ ગૌરવવંતા અવસરે પવિત્ર નવરાત્રી પર્વના પ્રથમ નોરતે એટલે કે તા. 11 ઓક્ટોબરે અંબાજી દેવસ્થાન પરિસરમાં એક ભવ્ય અને વિશેષ સમારોહનું આયોજન કરવામાં આવ્યું છે. આ અંગેની તૈયારીઓને પણ આખરી ઓપ આપવામાં આવી રહ્યો છે.  આ કાર્યક્રમમાં કંટ્રોલર જનરલ ઓફ પેટન્ટ્સ, ડિઝાઇન્સ એન્ડ ટ્રેડમાર્ક્સ તથા જ્યોગ્રાફિકલ ઇન્ડિકેશન્સના રજિસ્ટ્રાર પ્રોફેસર ડૉ. ઉન્નત પી. પંડિત વિશેષ ઉપસ્થિત રહેશે. તેઓ પોતાના હસ્તે શ્રી આરાસુરી અંબાજી માતા દેવસ્થાન ટ્રસ્ટને સત્તાવાર જીઆઈ સર્ટિફિકેટ અર્પણ કરશે