Tue Nov 17 2026

Logo

બ્રેકિંગ ન્યૂઝ: 11 Oct 2026 દેશ-વિદેશના તમામ લેટેસ્ટ અને બ્રેકિંગ સમાચારો માટે અહીં અપડેટ રહો

2026-10-11 07:55:00
Author: Mumbai Samachar Team
બ્રેકિંગ ન્યૂઝ: 11 Oct 2026 દેશ-વિદેશના તમામ લેટેસ્ટ અને બ્રેકિંગ સમાચારો માટે અહીં અપડેટ રહો

દેશ-વિદેશના તમામ લેટેસ્ટ અને બ્રેકિંગ સમાચારો માટે અહીં અપડેટ રહો. રાજકારણ, વેપાર, રમતગમત, મનોરંજન અને ટેકનોલોજી સહિતના તમામ ક્ષેત્રની ઝડપી અને સચોટ માહિતી માટે અહીં અપડેટ રહો.

Live Updates

2026-10-11 22:36:37

સાઉથ આફ્રિકા સામે ઑસ્ટ્રેલિયાની 106 રનની સરસાઈ

ડરબનમાં પ્રથમ ટેસ્ટના ત્રીજા દિવસે ઑસ્ટ્રેલિયાએ સાઉથ આફ્રિકાને 284 રન પર આઉટ કરીને 106 રનની સરસાઈ લીધી હતી અને બીજા દાવમાં વિના વિકેટે 33 રન બનાવ્યા હતા. યજમાન ટીમના નવ બૅટ્સમેનના ડબલ ડિજિટમાં રન હતા, પણ એમાંથી એકેયને કાંગારુઓએ હાફ સેન્ચુરી નહોતી થવા દીધી. પૅટ કમિન્સે સૌથી વધુ ત્રણ વિકેટ તેમ જ સ્ટાર્ક, હૅઝલવૂડ તથા લાયને બે-બે વિકેટ મેળવી હતી. પ્રથમ દાવમાં ઑસ્ટ્રેલિયાના 390 રન હતા.

2026-10-11 21:53:09

કિરણ બેદીની પ્રવક્તા અને સહભાગીઓને અપીલ, કહ્યું વિરોધ સાથે લોકો પ્રત્યે આદર જાળવવાની પણ જવાબદારી

દેશમાં ટીવી ડિબેટ અને અન્ય જાહેર ચર્ચામાં સામેલ લોકોને પૂર્વ આઇપીએસ અધિકારી કિરણ બેદીએ અપીલ સ્વરૂપે માર્મિક ટકોર કરી છે.  તેમણે જણાવ્યું હતું કે જાહેર ચર્ચામાં સામેલ તમામ પ્રવક્તાઓ અને સહભાગીઓને વિરોધ કરવાનો અને વાજબી ફરિયાદો રજૂ કરવાનો અધિકાર છે. તેની સાથે સાથે લોકો પ્રત્યે આદર જાળવવાની પણ જવાબદારી છે. ભલે આપણે એ લોકો સાથે સહમત ના હોઇએ.

2026-10-11 21:52:45

નમન ધીરે બ્રેકથ્રુ અપાવ્યું, ડેન્જરસ હેટમાયરને કર્યો ક્લીન બોલ્ડ

ભારતે 224 રનનો પડકારરૂપ લક્ષ્યાંક આપ્યા બાદ વેસ્ટ ઇન્ડિઝે સાતમા રને સૌથી ડેન્જરસ બૅટ્સમૅન શાઇ હોપ (પાંચ રન)ને અર્શદીપ સિંહે ક્લીન બોલ્ડ કર્યો ત્યાર બાદ હેટમાયર અને ઓપનર કમિલ પૂરનની જોડીએ ભારતીય બોલર્સને લડત આપી હતી. જોકે 67મા રને સ્પિન-સ્ટાર નમન ધીરે હેટમાયરને ક્લીન બોલ્ડ કરીને સનસનાટી મચાવી દીધી હતી. હેટમાયરે 26 બૉલમાં બે છગ્ગા અને છ ચોગ્ગાની મદદથી 43 રન બનાવ્યા હતા. રૉવમૅન પૉવેલ (પાંચ રન)ની વિકેટ અક્ષર પટેલે મેળવીને પ્રવાસી ટીમને વધુ મુસીબતમાં મૂકી દીધી હતી. 10મી ઓવરમાં 3/82ના સ્કોર વખતે કમિલ પૂરન બાવીસ રને રમી રહ્યો હતો.

2026-10-11 21:03:52

રશિયા અને યુક્રેન વચ્ચે ઉર્જા ક્ષેત્રે યુદ્ધવિરામ, ડોનાલ્ડ ટ્રમ્પનો દાવો

રશિયા અને યુક્રેન વચ્ચે ચાલી રહેલા યુદ્ધ વચ્ચે અમેરિકાના રાષ્ટ્રપતિ ડોનાલ્ડ ટ્રમ્પનું મોટું નિવેદન પ્રકાશમાં આવ્યું  છે. ટ્રમ્પે'ટ્રુથ સોશિયલ' પર દાવો કર્યો છે કે  રશિયા અને યુક્રેન વચ્ચે ચાલી રહેલા યુદ્ધમાં ઉર્જા ક્ષેત્રે યુદ્ધવિરામનો તાત્કાલિક અમલ શરૂ થઈ ગયો છે. આ અંગે બંને પક્ષો આ માટે સંમત થયા છે.

2026-10-11 20:11:53

શરૂઆતના ધમાકા પછી ભારતીય ટીમ મુસીબતમાં, પચીસ રનમાં ચાર વિકેટ પડી

ત્રીજી ટી-20માં વેસ્ટ ઇન્ડિઝે પ્રથમ બૅટિંગ આપ્યા બાદ ભારતીય બૅટ્સમેનો (ખાસ કરીને અભિષેક અને કિશન)એ આક્રમક શરૂઆત સાથે ઇન્દોરનું સ્ટેડિયમ ગજાવી નાખ્યું હતું, પણ પછી ટપોટપ વિકેટ પડતાં ટીમ મુશ્કેલીમાં આવી ગઈ હતી. સૅમસન (ત્રણ રન)ની પ્રથમ વિકેટ બાદ બીજી વિકેટ છેક 115 રનના સ્કોર પર પડી હતી. કિશન (37 રન) ત્યારે આઉટ થયો હતો. કૅપ્ટન શ્રેયસ (એક રન) ક્રીઝ પર આવ્યા બાદ તરત જ આઉટ થયો ત્યાર પછી અભિષેક (69 રન, 30 બૉલ, પાંચ છગ્ગા, છ ચોગ્ગા) પણ પૅવિલિયનમાં પાછો આવી ગયો હતો. તે ડ્રેસિંગ-રૂમમાં માંડ ઠરીઠામ થયો ત્યાં તો નમન ધીર (10 રન) પણ તેની પાસે પાછો આવી ગયો હતો. 13મી ઓવરમાં ભારતનો સ્કોર પાંચ વિકેટે 153 રન હતો. ત્રણમાંથી બે વિકેટ રૉસ્ટન ચેઝે લીધી હતી.

2026-10-11 19:49:49

રાહુલ ગાંધીએ સોમવારે સુપ્રીમ કોર્ટ સુધી કૂચ કરવાની જાહેરાત કરી...

દેશમાં સતત SIR અને સીઇસીના રાજીનામાની માંગણી સાથે કોંગ્રેસ સહિતના પક્ષો વિરોધ પ્રદર્શન કરી રહ્યા છે. ત્યારે લોકસભામાં વિપક્ષના નેતા રાહુલ ગાંધીએ  વિપક્ષી પક્ષો, યુવાનો અને નાગરિક સમાજના સંગઠનો સાથે મળીને સુપ્રીમ કોર્ટ સુધી કૂચ કરવાની જાહેરાત કરી છે.  રાહુલ ગાંધીએ આક્ષેપ લગાવ્યો છે કે  દિલ્હીમાં શાંતિપૂર્ણ રીતે વિરોધ કરી રહેલા યુવાનો પર પોલીસે અને ભાજપના કાર્યકરોએ હુમલો કર્યો હતો.

2026-10-11 19:42:57

અભિષેકની 18 બૉલમાં હાફ સેન્ચુરી, સાત ઓવરમાં એક વિકેટે 98 રન

ઇન્દોરમાં વેસ્ટ ઇન્ડિઝ સામે ભારતે ત્રીજી ટી-20માં બૅટિંગ મળ્યા પછી આક્રમક શરૂઆત કરી જેમાં ઓપનર અભિષેક શર્મા (59 નૉટઆઉટ, બાવીસ બૉલ, ચાર છગ્ગા, છ ચોગ્ગા)એ કૅરિબિયન બોલર્સની ખબર લઈ નાખી હતી. સૅમસન (ત્રણ રન) સસ્તામાં આઉટ થઈ ગયો ત્યાર પછી અભિષેક-કિશન વચ્ચે 80 રનની અતૂટ ભાગીદારી થઈ હતી. અભિષેકની સાથે કિશન (29 નૉટઆઉટ, 14 બૉલ, છ ચોગ્ગા) પણ અગે્રસિવ મિજાજમાં રમી રહ્યો હતો. સાતમી ઓવરને અંતે ભારતનો સ્કોર એક વિકેટે 98 રન હતો.

2026-10-11 19:19:10

હવે સૅમસન સસ્તામાં આઉટ, અભિષેક સાથે કિશન જોડાયો

વેસ્ટ ઇન્ડિઝ સામેની ત્રીજી ટી-20માં બૅટિંગ મળ્યા બાદ ભારતે ફક્ત સાતમા રન પર સંજુ સૅમસન (ત્રણ રન)ની વિકેટ ગુમાવી દીધી હતી. અગાઉની બન્ને મૅચમાં અભિષેક શર્મા સસ્તામાં (20 અને 21 રનમાં) આઉટ થયો ત્યાર બાદ સૅમસને દાવની શરૂઆતમાં જ વિકેટ ગુમાવી દીધી. સૅમસને રાંચીની બીજી મૅચમાં 82 રન બનાવ્યા હતા, પણ શાઇ હોપે અણનમ 102 રન બનાવીને કૅરિબિયન ટીમને વિજય અપાવ્યો હતો. સૅમસને શમાર જોસેફના કલાકે 150 કિલોમીટરની ઝડપે ફેંકાયેલા બૉલમાં શૉર્ટ મિડ વિકેટ પર કમિલ પૂરનને કૅચ આપી દીધો હતો. ત્રણ ઓવરને અંતે ભારતનો સ્કોર એક વિકેટે 29 રન હતો. અભિષેક 21 રન પર અને કિશન એક રન પર રમી રહ્યો હતો.

2026-10-11 19:07:15

દિલ્હી પોલીસની સ્પષ્ટતા સીજેપીને કોઇ મંજૂરી નહોતી આપી, પોલીસે દીપકેના દાદીના નિધનના સમાચાર મળતા જ  મદદ કરી હતી

દિલ્હીમાં કરવામાં આવેલા વિરોધ પ્રદર્શનને લઇને પોલીસે આજે સ્પષ્ટતા કરી છે. તેમજ કહ્યું છે કે સીજેપીને કોઇ પણ વિરોધ પ્રદર્શન માટે મંજૂરી આપવામાં આવી નહોતી. તેમજ દિલ્હી પોલીસના ડીસીપી નેહા યાદવે જણાવ્યું હતું કે સીજેપીના સ્થાપક અભિજીત દીપકેના દાદીના નિધન સમાચાર મળતા જ પોલીસે તેમને મદદ કરી હતી. તેમજ આ અંગેનો એક વિડીયો પણ જાહેર કર્યો છે.

2026-10-11 18:47:28

વેસ્ટ ઇન્ડિઝે ભારતને બૅટિંગ આપી, ટીમમાં બે ફેરફાર...

ઇન્દોરમાં વેસ્ટ ઇન્ડિઝે પાંચ ટી-20વાળી સિરીઝની ત્રીજી મૅચમાં ટૉસ જીતીને ફીલ્ડિંગ પસંદ કરી છે. ભારતીય ટીમમાં બે ફેરફાર કરવામાં આવ્યા છે. પ્રિન્સ યાદવને કુલદીપ યાદવના સ્થાને અને નીતીશ રેડ્ડીને શિવમ દુબેના સ્થાને પ્લેઇંગ-ઇલેવનમાં સમાવવામાં આવ્યો છે. સિરીઝમાં બન્ને ટીમ 1-1ની બરાબરીમાં છે.

2026-10-11 18:33:45

નવી દિલ્હીથી ચેન્નાઈ જતી ઈન્ડિગોની એક ફ્લાઈટમાં ધુમાડો નીકળતા હૈદરાબાદમાં ઇમરજન્સી લેન્ડિંગ

નવી દિલ્હીથી ચેન્નાઈ જતી ઈન્ડિગોની એક ફ્લાઈટમાં રવિવારે  ધુમાડો નીકળતા જોવા મળતા તેનું હૈદરાબાદમાં ઇમરજન્સી લેન્ડિંગ કરાવવામાં આવ્યું હતું. આ અંગે  તપાસમાં જાણવા મળ્યું કે આ ધુમાડો ઓવરહેડ બિન માં મુકાયેલા મુસાફરના અંગત ઈલેક્ટ્રોનિક ઉપકરણમાંથી નીકળી રહ્યો હતો.

2026-10-11 17:54:03

પૂર્વ આફ્રિકાના દેશ જીબૂતીમાં હોડી પલટી જતાં 109 લોકોના મોત, રેસ્ક્યૂ ઓપરેશન ચાલુ

પૂર્વ આફ્રિકા દેશ જીબૂતી નજીક એક હોડી પલટી જવાથી 15  બાળકો સહિત 109 લોકોના મોતના અહેવાલ પ્રકાશમાં આવ્યા છે. અહેવાલો અનુસાર આ ઘટના ત્યારે બની જ્યારે તેઓ હોડી દ્વારા લોકો જીબૂતીથી યમન જઈ રહ્યા હતા.

2026-10-11 16:25:09

ગુજરાતમાં આજથી નવરાત્રીનો પ્રારંભ, રાજકોટમાં લવ જેહાદના પોસ્ટર ટોક ઓફ ધ ટાઉન

ગુજરાતના આજથી નવરાત્રી પર્વની શરૂઆત થઇ છે. રાજ્યના 22 હજારથી વધી સ્થળો ગરબા યોજાવાના છે. જેની માટે પોલીસે ચુસ્ત બંદોબસ્ત પણ ગોઠવ્યો છે. જેમાં રાજકોટ શહેરમાં 48 સ્થળોએ  ગરબાનું આયોજન કરવામાં આવ્યું છે. ત્યારે રાજકોટના લાગેલા લવ જેહાદના પોસ્ટરનો મુદ્દો  ટોક ઓફ ધ ટાઉન બન્યો છે. આ સ્થળે ગરબા આયોજનની બહાર લવ જેહાદથી સાવધાનના પોસ્ટર લગાવવામાં આવ્યા છે. આ બેનરોમાં હિંદુ યુવતીઓને લવ જેહાદથી બચવા મેસેજ આપવામાં આવ્યા છે.

2026-10-11 15:55:12

ભારતીય વાયુસેનાના પ્રમુખનો અમેરિકાના  F-35 ફાઈટર જેટ અંગે કટાક્ષ, કહ્યું અમને નજીક પણ આવતા દેતા નથી

ભારતીય વાયુસેનાના વડા એર ચીફ માર્શલ એ.પી. સિંહે શનિવારે અમેરિકાના પાંચમી પેઢીના F-35 ફાઈટર જેટ અંગે કટાક્ષ કર્યો હતો. તેમણે અમેરિકાની બેવડી નીતિ અંગે જણાવ્યું કે એક તરફ અમેરિકા આ વિમાન ભારતને વેચવાની વાત કરી રહ્યું છે જ્યારે બીજી તરફ અમેરિકાના અધિકારીઓ ભારતીય સેના અધિકારીઓને વિમાન પાસે સુધી જવા દેતા. આ ટિપ્પણી તેમણે અમેરિકાના પ્રશાંત વાયુસેનાના એર કોર્સ કમાન્ડર જનરલ કેવિન સ્નાઈડરની હાજરીમાં કરી હતી.

2026-10-11 15:14:35

પાકિસ્તાને 13 અને 14 ઑક્ટોબરના રોજ અમુક વિસ્તારોમાં એર સ્પેસ બંધ રાખવા નોટમ જાહેર કર્યું, અનેક તર્કવિતર્કો

પાકિસ્તાને 13 અને 14 ઑક્ટોબર 202ના રોજ અમુક વિસ્તારોમાં એર સ્પેસ બંધ રાખવા માટે નોટમ જાહેર કર્યું છે. જેમાં  સિંધ, કરાચી અને અરબી સમુદ્ર તરફના વિસ્તારોના એર સ્પેશના ઉપયોગ પર પ્રતિબંધ લાદવામાં આવ્યો છે. જેના પગલે અનેક પ્રકારના તર્કવિતર્કો કરવામાં આવી રહ્યા છે.

2026-10-11 11:00:04

ગાંધીનગર મનપાની 44 બેઠકો માટે મતદાન શરૂ

ગાંધીનગરઃ ગાંધીનગર મહાનગરપાલિકની ચૂંટણીમાં 11 વોર્ડની કુલ 44 બેઠકો માટે આજે સવારે 7:00 વાગ્યા મતદાન શરૂ થયું છે. સાંજે સાંજે 6:00 વાગ્યા સુધી મતદાન પ્રક્રિયા ચાલશે. ગાંધીનગર મનપાની આ ચૂંટણીમાં 1,32,457 પુરુષ અને 1,27,314 મહિલા મતદારો સહિત કુલ કુલ 2,59,780 મતદારો મતદાન કરવાના છે. આ મતદારો મતદાન કરીને કુલ 130 ઉમેદવારોનું રાજકીય ભવિષ્ય નક્કી કરશે.

2026-10-11 10:46:48

નેપાળમાં ફરી આવ્યું ભયાનક પૂર, બુઢી ગંડકી નદીનું જળસ્તર અચાનક વધ્યું

નેપાળે તાજેતરમાં જ ભયાનક પૂરનો સામનો કર્યો હતો અને હવે NDRRMAએ બુઢી ગંડકી નદીના જળસ્તરમાં અચાનક વધારો થયાની જાણકારી આપી છે, જેનાથી ફરી એકવાર પૂરનું જોખમ ઊભું થયું છે. અગાઉની ઘટનામાંથી બોધ લઈને, લોકોને અત્યારથી જ સુરક્ષિત સ્થળોએ ખસેડવામાં આવી રહ્યા છે. સોશિયલ મીડિયા આ ભયાનક પૂરના વીડિયો વાયરલ થઈ રહ્યાં છે.

2026-10-11 07:56:20

સાઉદી અરબના રિયાધ આંતરરાષ્ટ્રીય એરપોર્ટ પર મોટો હુમલો, 12 લોકોના મોત

સાઉદી અરબના રિયાધ આંતરરાષ્ટ્રીય એરપોર્ટ પર ફરી એકવાર હુતી વિદ્રોહીઓ દ્વારા હુમલો કરવામાં આવ્યો હોવાનું પ્રકાશમાં આવ્યું છે. આ હુમલામાં કુલ 12 લોકોના મોત થયાં છે, જ્યારે 300થી પણ વધારે લોકો ઘાયલ થયાં હોવાનું મીડિયા રિપોર્ટ્સ દ્વારા જાણવા મળ્યું છે. હુમલો થયાં બાદ આ આંતરરાષ્ટ્રીય એરપોર્ટ પરથી તમામ ઉડાનોને રદ્દ કરી દેવામાં આવી હતી.