કોલકાતા: તૃણમૂલ કોંગ્રેસ (TMC) માં ચાલી રહેલા આંતરિક વિખવાદ અને બળવા વચ્ચે પાર્ટીના સાંસદ અભિષેક બેનર્જીએ સંગઠનને નબળું પાડવાનો આરોપ લગાવનારા બળવાખોર નેતાઓને ખુલ્લી ચેતવણી આપી છે. અભિષેક બેનર્જીએ પડકાર ફેંકતા કહ્યું છે કે જો આ બળવાખોર સભ્યો ફરીથી મમતા બેનર્જીના નેતૃત્વમાં પાર્ટીમાં પાછા ફરશે, તો તેઓ એક કલાકની અંદર જ પોતાના પદ પરથી રાજીનામું આપવા માટે તૈયાર છે. તેમણે સ્પષ્ટ કર્યું કે જે લોકો પાર્ટી છોડીને તેમને ગાળો આપી રહ્યા છે કે આરોપો લગાવી રહ્યા છે, તેઓ પહેલા 'દીદી' પાસે પાછા ફરે, અને જો તેઓ એમ કરશે તો તેઓ 24 કલાકની અંદર રાજીનામું આપી દેશે.
બળવાખોર નેતાઓ પર પ્રહાર કરતા અભિષેક બેનર્જીએ ગંભીર આરોપ લગાવ્યો હતો કે આ નેતાઓ હવે ક્યારેય પાર્ટીમાં પાછા નહીં ફરે કારણ કે તેઓએ ભારતીય જનતા પાર્ટી (BJP) સાથે સમજૂતી કરી લીધી છે. તેમણે દાવો કર્યો હતો કે આ નેતાઓએ પાર્ટી છોડવા, બળવાખોર જૂથ અથવા ભાજપમાં જોડાવા અને અભિષેક બેનર્જીને દોષી ઠેરવી તેમની ટીકા કરવા માટે અગાઉથી જ ડીલ કરી લીધી છે. અભિષેકનું કહેવું છે કે આ બળવા પાછળનું સાચું કારણ ભાજપ સાથેનું તેમનું છૂપું ગઠબંધન છે, નહિ કે પાર્ટીનું આંતરિક સંકટ.
અભિષેક બેનર્જીની આ ટિપ્પણી એવા સમયે આવી છે જ્યારે ટીએમસીના ઘણા બળવાખોર ધારાસભ્યો અને સાંસદો મમતા બેનર્જીનો સાથ છોડીને એનસીપી અને ટીએમસીના ઋતબ્રતા જૂથમાં જોડાઈ ગયા છે. કાકોલી ઘોષ દસ્તીદાર, યુસુફ પઠાણ, રચના બેનર્જી, શતાબ્દી રોય અને દેવ અધિકારી સહિત લગભગ 19 થી 20 સાંસદોનું એક મોટું બળવાખોર જૂથ ત્રિપુરા સ્થિત NCPમાં ભળી ગયું છે અને ભાજપને પોતાનું સમર્થન જાહેર કર્યું છે. આ ઉપરાંત સુખેન્દુ શેખર રોય, સુષ્મિતા દેવ અને પ્રકાશ ચિક બરાઈક જેવા વરિષ્ઠ નેતાઓએ પણ રાજ્યસભા અને પાર્ટીમાંથી રાજીનામું આપીને ભાજપનો ખેસ ધારણ કરી લીધો છે.
વરિષ્ઠ નેતાઓના રાજીનામા અને બળવાખોર જૂથોમાં જોડાવાનો સિલસિલો યથાવત છે. તાજેતરમાં જ મદન મિત્રાએ TMCમાંથી રાજીનામું આપીને બળવાખોર જૂથનો સાથ પકડ્યો છે, જોકે તેમણે ધારાસભ્ય પદેથી રાજીનામું આપ્યું નથી. તેમણે અભિષેક બેનર્જીની નેતૃત્વ શૈલીને "હિટલરશાહી" ગણાવીને આરોપ લગાવ્યો છે કે પાર્ટી એક જ વ્યક્તિના નિયંત્રણ હેઠળ સતત નબળી પડી રહી છે.
