બોલીવૂડના મહાનાયક અમિતાભ બચ્ચન અને દિગ્ગજ ગીતકાર આનંદ બક્ષીની દમદાર જોડીએ ભારતીય ફિલ્મને અનેક અવિસ્મરણીય ગીતો આપ્યા છે. પરંતુ ફિલ્મ ઈન્ડસ્ટ્રીમાં એક એવો રસપ્રદ કિસ્સો પણ છે જ્યારે આનંદ બક્ષીએ 1999માં રીલિઝ થયેલી અમિતાભ બચ્ચન અને નાના પાટેકર અભિનિત ફિલ્મ 'કોહરામ'નું એક અત્યંત લોકપ્રિય અને ધાર્મિક ગીત લખવાની સ્પષ્ટ ના પાડી દીધી હતી. ચાલો તમને આખી સ્ટોરી વિસ્તારથી જણાવીએ અને કયુ છે એ ગીત એ પણ જાણીએ...

1999 માં રીલિઝ થયેલી ડિરેક્ટર મેહુલ કુમારની ફિલ્મ 'કોહરામ'માં શિખ ધર્મના પવિત્ર મંત્ર અને ભક્તિ પર આધારિત એક ગીત 'બાબા નાનક દુખિયાં દે નાથ...' સામેલ કરવામાં આવ્યું હતું. આ ગીતમાં બિગ બી શિખ સરદારના ગેટઅપમાં જોવા મળ્યા હતા. મેહુલ કુમારે જ્યારે આ ગીત લખવા માટે પ્રખ્યાત ગીતકાર આનંદ બક્ષીનો સંપર્ક કર્યો, ત્યારે શરૂઆતમાં આનંદ બક્ષીજીએ તેને લખવાની મનાઈ કરી દીધી હતી.

આનંદ બક્ષી પોતે એક શિખ સમુદાયમાંથી આવતા હતા અને તેઓ શીખ ધર્મ, ગુરુ નાનક દેવજી અને ધાર્મિક માન્યતાઓ પ્રત્યે ખૂબ જ ઊંડી શ્રદ્ધા અને ભક્તિભાવ ધરાવતા હતા. તેમનું માનવું હતું કે કોઈ પણ ધાર્મિક બાબત કે ગુરુ પરંપરા સાથે જોડાયેલા શબ્દોને કોઈ ફિલ્મ કે કોમર્શિયલ મનોરંજન માટે હળવાશથી ન વાપરવા જોઈએ. તેઓ ડરતા હતા કે જો ગીતના શબ્દોમાં કે ભાવમાં કોઈ ભૂલ રહી જશે તો ધાર્મિક લાગણીઓ દુભાઈ શકે છે.

ડિરેક્ટર મેહુલ કુમારે આનંદ બક્ષીને આખી ફિલ્મની સિચ્યુએશન અને સીન સમજાવ્યો. તેમણે ખાતરી આપી કે આ ગીત ફિલ્મમાં અત્યંત આદર, શ્રદ્ધા અને સન્માન સાથે શૂટ કરવામાં આવશે અને તેમાં ગુરુ નાનક દેવજીનો મહિમા જ દર્શાવવામાં આવશે. ફિલ્મમેકરની આ ખાતરી અને વિનંતી બાદ આનંદ બક્ષી ગીત લખવા તૈયાર થયા હતા.

જ્યારે ગીત તૈયાર થયું અને ગાયક સુખવિંદર સિંહે તેને અવાજ આપ્યો, ત્યારે આ ગીતે લોકોના દિલ જીતી લીધા હતા. આજે પણ આ ગીત શિખ શ્રદ્ધાળુઓ અને સંગીતપ્રેમીઓમાં અત્યંત લોકપ્રિય છે.