મહારાષ્ટ્રના પાલઘર જિલ્લામાં ચૂંટણી પંચ દ્વારા ચાલી રહેલી એસઆઇઆર (SIR) ની મહત્વપૂર્ણ કામગીરીમાં ગંભીર બેદરકારી દાખવવા બદલ એક મોટા અધિકારી સામે કડક કાર્યવાહી કરવામાં આવી છે. પરવાનગી વિના ફરજ પરથી ગેરહાજર રહેવા બદલ પાલઘર વહીવટીતંત્રે એક સહાયક મતદાર નોંધણી અધિકારીને તાત્કાલિક અસરથી સસ્પેન્ડ કરી દીધા છે.
શું છે સમગ્ર મામલો?
પ્રાપ્ત માહિતી અનુસાર, વસઈ પંચાયત સમિતિના જૂથ શિક્ષણ અધિકારી ગોપાલ ચૌધરી ની ૧૩૨-નાલાસોપારા મતવિસ્તાર માટે ચૂંટણી પંચની એસઆઇઆર કામગીરી અર્થે સહાયક મતદાર નોંધણી અધિકારી તરીકે નિમણૂક કરવામાં આવી હતી. પરંતુ, નિમણૂક થયા બાદ ગોપાલ ચૌધરી સક્ષમ સત્તાધિકારીની આગોતરી જાણ કે મંજૂરી વિના ફરજ પરથી ગેરહાજર રહ્યા હતા અને તેમણે એસઆઇઆર કાર્યક્રમ સંબંધિત કોઈપણ પ્રકારની કામગીરી કરી ન હતી.
પાલઘર વહીવટીતંત્ર દ્વારા જારી કરાયેલી અખબારી યાદીમાં જણાવવામાં આવ્યું છે કે અધિકારીની આ પ્રકારની બેદરકારી, કામમાં વિલંબ અને ફરજ પ્રત્યેની નિષ્કાળજીને કારણે ચૂંટણી જેવી મહત્વપૂર્ણ રાષ્ટ્રીય કામગીરી પર પ્રતિકૂળ અસર પડી હતી.
લોક પ્રતિનિધિત્વ અધિનિયમ હેઠળ શિસ્તભંગના પગલાં:
આ સમગ્ર બાબતની ગંભીર નોંધ લેતા પાલઘરના જિલ્લા કલેક્ટર અને જિલ્લા ચૂંટણી અધિકારીએ લોક પ્રતિનિધિત્વ અધિનિયમ, ૧૯૫૦ ની કડક જોગવાઈઓ હેઠળ તાત્કાલિક શિસ્તભંગના પગલાં લેવાનો આદેશ આપ્યો હતો, જેના પગલે અધિકારીને સસ્પેન્ડ કરવામાં આવ્યા છે. ચૂંટણી કામગીરીમાં કોઈપણ પ્રકારની લાપરવાહી સહન કરવામાં આવશે નહીં તેવો સ્પષ્ટ સંદેશ આ કાર્યવાહીથી વહીવટીતંત્રે આપ્યો છે.
