નેપાળમાં બુઢી ગંડકી નદીમાં અચાનક ભારે પૂર આવ્યું છે. તેના કારણે ગોરખા જિલ્લામાં 35 મકાન અને 3 પુલ તણાઈ ગયા છે અને ઘણા ઘરોમાં પાણી ભરાઈ ગયા છે. નેપાળના ડિઝાસ્ટર મેનેજમેન્ટ વિભાગે નદીની આસપાસ રહેતા લોકોને ચેતવણી આપી છે. વિભાગે X પર જણાવ્યું કે ચુમનુબ્રી ગ્રામીણ નગરપાલિકાના વોર્ડ નંબર 6 તરફથી મોટું પૂર આવી રહ્યું છે. ઘણા વિસ્તારોમાં રસ્તાઓ તૂટી ગયા છે. લોકોને ત્રિશૂલી દોભાન સુધી નદીના કિનારે ન જવા અને ઊંચા સ્થળોએ રહેવા માટે કહેવામાં આવ્યું છે. પૂરના પાણી ઓસરી ન જાય ત્યાં સુધી સાવચેતી રાખવા અપીલ કરાઈ છે. આ દરમિયાન ડિઝાસ્ટર મેનેજમેન્ટની ટીમ લોકોના બચાવ કાર્યમાં લાગી ગઈ છે.
નેપાળ પોલીસના જણાવ્યા અનુસાર, ચુમનુબ્રી-6માં લોકપા અને ચુમલિંગ વચ્ચે પહાડ પરથી માટી અને પથ્થરો પડવાના કારણે નદીનો માર્ગ બંધ થઈ ગયો હતો. ત્યારબાદ આવેલા પૂરને કારણે ઘણા વિસ્તારોમાં નુકસાન થયું છે. ચુમનુબ્રી-3માં ન્યાકચેત અને સિર્દિબાસને જોડતો જૂનો સસ્પેન્શન બ્રિજ તણાઈ ગયો છે. ધાર્ચે-5માં માછાંખોલા અને કેરૌજાને જોડતો બીજો સસ્પેન્શન બ્રિજ પણ વહી ગયો છે. માછાંખોલાના નીચાણવાળા વિસ્તારમાં 5 થી 7 ઘરોમાં પાણી ઘૂસી ગયા છે. ધાર્ચે-3ના સલ્લેરીમાં 20 થી 22 ઘરો પર જોખમ તોળાઈ રહ્યું છે. આ ઉપરાંત આરુઘાટના વોર્ડ 2 અને 3ને જોડતો સોતીનો લોખંડનો પુલ પણ તણાઈ ગયો છે.
એક બીજી જબરજસ્ત પૂરની ચેતવણી
બીજી તરફ નેપાળના પૂર પૂર્વાનુમાન વિભાગે રવિવારે સવારે વધુ એક ભયાનક પૂરની ચેતવણી જારી કરી છે. નેપાળના રાષ્ટ્રીય આપત્તિ જોખમ ન્યૂનિકરણ અને વ્યવસ્થાપન સત્તામંડળે બુઢી ગંડકી નદીમાં ભારે પૂર આવવાની શક્યતા વ્યક્ત કરી છે. વિભાગે લોકોને નદીથી દૂર રહેવા અને ઊંચાણવાળા સ્થળોએ જવાની અપીલ કરી છે. નેપાળના નેશનલ ડિઝાસ્ટર રિસ્ક રિડક્શન એન્ડ મેનેજમેન્ટ ઓથોરિટીએ સોશિયલ મીડિયા પોસ્ટમાં લખ્યું છે કે, "બુઢી ગંડકી નદીમાં ચુમનુબ્રી ગ્રામીણ નગરપાલિકા-6 તરફથી મોટું પૂર આવી રહ્યું છે. તેથી, જ્યાં સુધી પૂર પસાર ન થઈ જાય ત્યાં સુધી ત્રિશૂલી દોભાન સુધી નદી કિનારે ન જવું. ઊંચા સ્થળોએ રહો."
ઓથોરિટીના જણાવ્યા અનુસાર, પાણીના ભારે પ્રવાહને કારણે નદીની જળસપાટીમાં અચાનક વધારો થઈ શકે છે. નદીની આસપાસ અને નીચાણવાળા વિસ્તારોમાં રહેતા લોકો માટે આ અત્યંત જોખમી સાબિત થઈ શકે છે. ઓથોરિટીએ લોકોને સમયસર વહેલી તકે સુરક્ષિત અને ઊંચાણવાળા સ્થળોએ જવા માટે અપીલ કરી છે. જોકે, વિભાગ દ્વારા પૂર આવવાનો કોઈ ચોક્કસ સમય જણાવવામાં નથી આવ્યો.
