(અમારા પ્રતિનિધિ તરફથી)
અમદાવાદ: ગુજરાતમાં મહાત્મા ગાંધી રાષ્ટ્રીય ગ્રામીણ રોજગાર ગેરંટી અધિનિયમ (મનરેગા) હેઠળ કામ કરતા લાખો શ્રમિકો છેલ્લા પાંચથી છ મહિનાથી વેતન ન મળવાને કારણે અત્યંત કફોડી સ્થિતિમાં મુકાયા હોવાના અહેવાલ છે. ખાસ કરીને સૌરાષ્ટ્રના ઉના અને ગીર ગઢડા જેવા વિસ્તારોમાં સ્થિતિ વધુ ગંભીર બની છે.
ઓલ ગુજરાત મનરેગા એમ્પ્લોઈઝ યુનિયન દ્વારા આક્ષેપ કરવામાં આવ્યો હતો કે આ માત્ર સામાન્ય વિલંબ નથી, પરંતુ સરકારના વહીવટીતંત્ર અને ફંડ મેનેજમેન્ટની નિષ્ફળતા છે. લાંબા સમયથી પગાર ન મળતા શ્રમિકોમાં ભારે રોષ જોવા મળી રહ્યો છે અને તેમણે આ મુદ્દે રાજ્યવ્યાપી આંદોલન કરવાની ચેતવણી આપી હતી.
મળતી વિગતો અનુસાર, આ યોજનામાં વેતન અટકતા શ્રમિક પરિવારોને મોટો આર્થિક ફટકો પડ્યો હતો. ભારત સરકારના ગ્રામીણ વિકાસ મંત્રાલયના આંકડા મુજબ, ગુજરાતમાં નોંધાયેલા 98.84 લાખ શ્રમિકોમાંથી 20.69 લાખ સક્રિય કામદારો છે.
નોંધનીય છે કે આ વિલંબની સૌથી વધુ અસર અનુસૂચિત જનજાતિના શ્રમિકો પર પડી રહી છે, કારણ કે તેઓ કુલ સક્રિય કામદારોના 45.7 ટકા હિસ્સો ધરાવે છે. વર્ષ 2025-26 દરમિયાન કેન્દ્ર સરકારે મનરેગા વેતન માટે અંદાજે રૂ. 827 કરોડ રિલીઝ કર્યા હોવા છતાં શ્રમિકો સુધી નાણાં ન પહોંચતા અનેક સવાલો ઊભા થયા છે.
શ્રમિક સંગઠનોના જણાવ્યા અનુસાર, જો પડતર વેતનની તાત્કાલિક ચુકવણી કરવામાં નહીં આવે અને ભવિષ્યમાં આવી સ્થિતિ ન સર્જાય તે માટે જવાબદારી નક્કી કરવામાં નહીં આવે, તો આગામી દિવસોમાં વિરોધ પ્રદર્શન તેજ કરવામાં આવશે. સૌરાષ્ટ્રના ગામડાઓમાં મજૂરો અત્યારે લોન લઈને અથવા જીવનજરૂરી વસ્તુઓમાં કાપ મૂકીને ગુજરાન ચલાવી રહ્યા છે.
યુનિયને સરકાર તાત્કાલિક હસ્તક્ષેપ કરીને વેતનની ચુકવણી કરે, અન્યથા આ મુદ્દો આગામી સમયમાં રાજકીય ગરમાવો પકડી શકે છે અને સરકાર માટે મુશ્કેલીઓ ઊભી કરી શકે તેવી ચેતવણી આપી હતી.
