નવી દિલ્હીઃ વિદેશ મંત્રાલયે ઓમાનના દરિયાકાંઠે વેપારી જહાજો પર તાજેતરમાં થયેલા હુમલાને લઈને ઈરાની રાજદ્વારીઓને (જેમાં ડેપ્યુટી ચીફ ઓફ મિશન મોહમ્મદ જવાદ હુસૈની પણ સામેલ છે) સમન્સ મોકલ્યું છે. આ હુમલામાં ભારતીય નાવિકનું મોત થયું છે.

ઈરાની દૂતાવાસ પાસે માંગવામાં આવ્યો જવાબ

આ રાજદ્વારી પગલું ઓમાનના દરિયાઈ વિસ્તારમાં હોર્મુઝની સામુદ્રધુની (સ્ટ્રેટ ઓફ હોર્મુઝ) માંથી પસાર થઈ રહેલા સંયુક્ત આરબ અમીરાત (UAE) ના ધ્વજ ધરાવતા બે ટેન્કરો પર થયેલા હુમલા બાદ લેવામાં આવ્યું છે. આ હુમલામાં ભારતીય ક્રૂ મેમ્બર (ચાલક દળના સભ્ય) નું મોત નીપજ્યું હતું, જ્યારે ભારતીય નાગરિકો સહિત અન્ય કેટલાક લોકો ઘાયલ થયા હતા. ભારતે ઈરાની દૂતાવાસ પાસે આ અંગે સ્પષ્ટતા માંગી છે અને હુમલા પર પોતાની ગંભીર ચિંતા વ્યક્ત કરી છે.

કોઈપણ નિવેદન આપ્યા વિના થયા રવાના 

ખાડી વિસ્તારમાં વધી રહેલા તણાવ અને વૈશ્વિક ઉર્જા પરિવહનના મુખ્ય માર્ગ સમાન હોર્મુઝની સામુદ્રધુનીમાં કોમર્શિયલ (વેપારી) જહાજોની અવરજવર પર મંડરાતા જોખમો વચ્ચે આ સમન્સ મોકલાયું હતું. આ મહત્વપૂર્ણ બેઠક બાદ ડેપ્યુટી ચીફ મોહમ્મદ જવાદ હુસૈની અને અન્ય ઈરાની રાજદ્વારીઓ કોઈપણ જાહેર નિવેદન આપ્યા વિના ત્યાંથી રવાના થઈ ગયા હતા. ખાડી વિસ્તારમાં વધી રહેલા તણાવ અને હોર્મુઝની સામુદ્રધુનીમાં વેપારી જહાજોની સુરક્ષાને લઈને વધતી ચિંતાઓ વચ્ચે આ રાજદ્વારી પ્રક્રિયા હાથ ધરવામાં આવી છે.

ઈરાનના હુમલા પર UAEએ શું કહ્યું?

UAEએ ઈરાનના આ હુમલાઓની આકરી નિંદા કરી છે. તેણે આ હુમલાને આંતરરાષ્ટ્રીય કાયદાનું ખુલ્લું ઉલ્લંઘન ગણાવ્યું છે. આ સાથે જ આ પ્રકારના હુમલાઓને પ્રાદેશિક સુરક્ષા માટે જોખમરૂપ ગણાવ્યા છે. UAEએ જણાવ્યું કે, 'અમારી પાસે આ તણાવને વધારનારી કાર્યવાહીનો જવાબ આપવાનો સંપૂર્ણ અધિકાર છે.'

મોમ્બાસા અને અલ બહિયા નામના બે ટેન્કરો પર થયો હતો હુમલો

અહેવાલ મુજબ, બે ટેન્કરો 'મોમ્બાસા' અને 'અલ બહિયા' પર તે સમયે હુમલો થયો જ્યારે તેઓ હોર્મુઝની સામુદ્રધુની (હોર્મુઝ સ્ટ્રેટ) ના દક્ષિણ માર્ગ પરથી પસાર થઈ રહ્યા હતા. સામાન્ય સમયમાં આ માર્ગ પરથી વિશ્વનો પાંચમો ભાગ (20 ટકા) જેટલો તેલનો જથ્થો પસાર થાય છે. આ હુમલામાં મોમ્બાસા પર સવાર એક ભારતીય ક્રૂ મેમ્બર (ચાલક દળના સભ્ય) નું મોત નીપજ્યું હતું અને અન્ય આઠ લોકો ઘાયલ થયા હતા, જેમાંથી ચારની હાલત ગંભીર છે.

ઘાયલોમાં છ ભારતીય અને બે યુક્રેનિયન નાગરિકો સામેલ છે. બીજી તરફ, UAEના સંરક્ષણ મંત્રાલયે એક નિવેદનમાં જણાવ્યું છે કે હુમલા બાદ બંને ટેન્કરોમાં આગ લાગી ગઈ હતી, જેના કારણે તેમને ભૌતિક નુકસાન પણ થયું છે. બાદમાં આગ પર કાબૂ મેળવી લેવાયો હતો.