અમદાવાદ/નવી દિલ્હી: બે વેસ્ટર્ન ડિસ્ટર્બન્સ સક્રિય થવાના કારણે દેશભરમાં ફરીથી વાવાઝોડા સાથે કમોસમી વરસાદનો રાઉન્ડ આવશે. હવામાન વિભાગે પશ્ચિમ હિમાલય, ઉત્તર ભારત, પૂર્વોત્તર રાજ્યો અને દક્ષિણ ભારતના અનેક વિસ્તારોમાં વરસાદ, ગાજવીજ અને ભારે પવન ફૂંકાવાની આગાહી કરી છે. હવામાન વિભાગે મહારાષ્ટ્ર અને ગુજરાતના કેટલાક વિસ્તારોમાં ભારે પવન સાથે વરસાદની આગાહી કરી છે.
ગુજરાતમાં કેવું રહેશે હવામાન
હવામાન વિભાગ મુજબ, વેસ્ટર્ન ડિસ્ટર્બન્સના કારણે આવતીકાલથી હવામાનમાં નોંધપાત્ર ફેરફાર થશે. હવામાન વિભાગે 29 અને 30 માર્ચે બનાસકાંઠા, સાબરકાંઠા, અરવલ્લી, દાહોદ, મહીસાગર અને કચ્છ જિલ્લામાં ગાજવીજ તથા ભારે પવન સાથે કમોસમી વરસાદની આગાહી કરી છે. આ દરમિયાન ગાજવીજ સાથે 30-40 કિમીની ઝડપે પવન ફૂંકાવાની અને હળવો વરસાદ પડવાની શક્યતા છે. માછીમારોને ત્રણ દિવસ દરિયો ન ખેડવાની સૂચના આપવામાં આવી છે. આગામી 24 કલાક સુધી મહત્તમ તાપમાનમાં કોઈ મોટો ફેરફાર નહીં થાય, જે પછી તાપમાનનો પારે 3 ડિગ્રી સુધી ઘટવાની શક્યતા છે. લઘુત્તમ તાપમાન આગામી સાત દિવસ સુધી યથાવત્ રહે તેવી સંભાવના છે.
— IMD Ahmedbad (@IMDAHMEDABAD) March 26, 2026
દેશના અન્ય રાજ્યોમાં કેવું રહેશે હવામાન
દિલ્હી-એનસીઆરમાં આજે વાદળછાયું વાતાવરણ રહેશે. ભારે પવન ફૂંકાવાની સાથે હળવો વરસાદ પડી શકે છે. 29 માર્ચથી વાતાવરણમમાં પલટો આવશે. ગાજવીજ સાથે વરસાદની શક્યતા છે. આ દરમિયાન 30 થી 50 કિમી પ્રતિ કલાકની ઝડપે પવન ફૂંકાશે.
હવામાન વિભાગ મુજબ, વેસ્ટર્ન ડિસ્ટર્બન્સના પ્રભાવથી 27 થી 31 માર્ચ જમ્મુ કાશ્મીર, હિમાચલ પ્રદેશ અને ઉત્તરાખંડમાં વરસાદ અને ઊંચાણવાળા વિસ્તારમાં બરફવર્ષા તઈ શકે છે. પંજાબ, હરિયાણા, પશ્ચિમ ઉત્તર પ્રદેશ અને રાજસ્થાનમાં પણ ગાજવીજ સાથે હળવાથી મધ્યમ વરસાદ અને 30 થી 50 કિમી પ્રતિ કલાકની ઝડપે પવન ફૂંકાવાનું એલર્ટ જાહેર કરવામાં આવ્યું છે.
અરૂણાચલ પ્રદેશ, આસામ, મેઘાલય, નાગાલેન્ડ, મણિપુર, મિઝોરમ અને ત્રિપુરામાં 28 થી 30 માર્ચ દરમિયાન ભારે વરસાદ પડી શકે છે. કેટલાક વિસ્તારમાં વરસાદની સાથે કરા પડવાની પણ ચેતવણી આપવામાં આવી છે. આ દરમિયાન 50 થી 70 કિમીની ઝડપે પવન ફૂંકાશે. હવામાન વિભાગે બિહાર, ઝારખંડ અને પશ્ચિમ બંગાળમાં પણ ગાજવીજ સાથે વરસાદની સંભાવના વ્યક્ત કરી છે.
હવામાન વિભાગના કહેવા પ્રમાણે, મધ્ય ભારતમાં આગામી સાત દિવસ સુધી ગાજવીજ સાથે વરસાદ પડશે. 27 થી 31 માર્ચ દરમિયાન છત્તીસગઢ અને વિદર્ભમાં ગાજવીજ સાથે હળવાથી મધ્યમ વરસાદની આગાહી છે. આ દરમિયાન 30 થી 50 કિલોમીટર પ્રતિ કલાકની ઝડપે પવન ફૂંકાશે. તમિલનાજુ, કેરળ, કર્ણાટક, તેલંગાણા અને આંધ્રપ્રદેશમાં 27 થી 30 માર્ચ સુધી અલગ અલગ સ્થાનો પર વરસાદ અને વીજળી પડવાની શક્યતા છે. કેરળ અને ગોવામાં ગરમી અને ભેજનો અનુભવ થશે.
