ગાંધીનગરઃ રાજ્યમાં વધુ એક પરીક્ષા મુલતવી રાખવામાં આવી હતી. આ અંગે ગુજરાત ગૌણ સેવા પસંદગી મંડળ દ્વારા સોશિયલ મીડિયા એક્સ પર પોસ્ટ કરીને માહિતી આપવામાં આવી હતી. જે મુજબ, ગુજરાત ગૌણ સેવા પસંદગી મંડળ મંડળની જાહેરાત ક્રમાંક 303/202526, અધિક મદદનીશ ઇજનેર (સિવિલ), વર્ગ-૩ની પરીક્ષા તા.૨૧/૦૬/૨૦૨૬ના રોજ સવારના સેકશનમાં યોજાવાની હતી તેને વિશ્વ યોગ દિનના કારણે મુલતવી રાખવામાં આવી હતી. નવી તારીખની જાણ હવે પછી કરવામાં આવશે.
મંડળની જાહેરાત ક્રમાંક 303/202526, અધિક મદદનીશ ઇજનેર (સીવીલ), વર્ગ-૩ની પરીક્ષા તા.૨૧/૦૬/૨૦૨૬ના રોજ સવારના સેકશનમાં આયોજીત થનાર હતી જે વિશ્વ યોગ દિનના કારણે મુલતવી રાખવામાં આવે છે. નવી તારીખની જાણ હવે પછી કરવામા આવશે.જેની ઉમેદવારોએ નોંધ લેવી.
— ગુજરાત ગૌણ સેવા પસંદગી મંડળ (@GsssbOfficial) June 6, 2026
થોડા દિવસ પહેલા જીપીએસસી દ્વારા રાજ્ય સરકારના વિવિધ વિભાગો અને બોર્ડ-કોર્પોરેશનમાં વર્ગ-1 અને વર્ગ-2 ની જગ્યાઓ માટે 250થી વધારે નવી ભરતીની જાહેરાત બહાર પાડવામાં આવી હતી. આ ભરતી પ્રક્રિયા હેઠળ સામાન્ય વહીવટ વિભાગ, માર્ગ અને મકાન વિભાગ, ઉદ્યોગ અને ખાણ વિભાગ, ગુજરાત મેરીટાઇમ બોર્ડ તેમજ વિવિધ મહાનગરપાલિકાઓમાં ખાલી પડેલી જગ્યાઓ ભરવામાં આવશે.
આ જાહેરાતમાં સૌથી મોટી અને નોંધપાત્ર ભરતી માર્ગ અને મકાન વિભાગમાં 'મદદનીશ ઇજનેર (સિવિલ), વર્ગ-2' માટેની હતી, જેમાં સૌથી વધુ કુલ 200 જગ્યાઓ પર સીધી નિમણૂક કરવામાં આવશે. સરકારી ક્ષેત્રે એન્જિનિયરિંગમાં કારકિર્દી બનાવવા માંગતા યુવાનો માટે આ એક મોટી તક સાબિત થશે.
આ ઉપરાંત, આ જાહેરનામામાં અન્ય ઘણી મહત્વની વહીવટી અને ટેકનિકલ જગ્યાઓનો પણ સમાવેશ કરવામાં આવ્યો હતો. જેમાં સામાન્ય વહીવટ વિભાગમાં સંશોધન અધિકારી (વર્ગ-2) ની 20 જગ્યાઓ, ગુજરાત મેરીટાઇમ બોર્ડમાં મદદનીશ ઇજનેર (યાંત્રિક અને બાંધકામ) ની 35 જગ્યાઓ અને વિવિધ મહાનગરપાલિકાઓમાં એસ્ટેટ, આઈ.સી.ટી., લીગલ અને વહીવટી અધિકારીઓની જગ્યાઓનો સમાવેશ થતો હતો.
ઉપરાંત જિલ્લા શિક્ષણાધિકારી (વર્ગ-1), ભૂસ્તરશાસ્ત્રી, નાયબ પશુપાલન નિયામક અને ઔદ્યોગિક સલામતી અધિકારી જેવી વિશિષ્ટ અને ઉચ્ચ કક્ષાની પોસ્ટ માટે પણ અરજીઓ મંગાવવામાં આવી હતી. ઉમેદવારો આ વિવિધ જગ્યાઓ માટેની શૈક્ષણિક લાયકાત અને અરજી કરવાની અંતિમ તારીખ વગેરે વિગતો GPSC ની વેબસાઇટ પરથી જાણી શકશે.
