લંડનઃ બ્રિટિશ પોલીસે પશ્ચિમ ઇંગ્લેન્ડમાં યુએસ એરફોર્સ દ્વારા સંચાલિત આરએએફ ફેરફોર્ડ મિલિટ્રી બેઝની બહાર આતંકવાદી હુમલાની યોજના ઘડવા અને વિસ્ફોટકો સંબંધિત ગુનાઓ આચરવાની શંકાના આધારે પાંચ લોકોની ધરપકડ કરી હતી.
આ મામલે ત્રણ શંકાસ્પદ વાહનોની તપાસ કરવામાં આવી રહી છે. આતંકવાદ-વિરોધી અધિકારીઓ તપાસનું નેતૃત્વ કરી રહ્યા છે. લંડનથી લગભગ ૧૬૦ કિલોમીટર પશ્ચિમમાં સ્થિત આરએએફ ફેરફોર્ડ ૧૯૫૦ના દાયકાના કરાર હેઠળ યુએસ એરફોર્સ દ્વારા ઉપયોગમાં લેવાતા બ્રિટનના અનેક એરબેઝ પૈકીનું એક છે.
આ એરબેઝ યુએસ એરફોર્સની ૫૦૧મી કોમ્બેટ સપોર્ટ વિંગનું હેડક્વાર્ટર છે અને યુએસ એરફોર્સ ગ્લોબલ સ્ટ્રાઇક કમાન્ડ માટે ફોરવર્ડ ઓપરેટિંગ લોકેશન પણ છે. હાઉસ ઓફ કોમન્સ લાઇબ્રેરી અનુસાર બ્રિટનમાં વિવિધ સ્થળોએ લગભગ ૧૧,૦૦૦ અમેરિકન સૈનિકો તહેનાત છે.
તેનો લાંબો રનવે ભારે બોમ્બર વિમાનો માટે યોગ્ય છે. આ એરબેઝનો ગલ્ફ વોર, ૨૦૦૩ના ઇરાક યુદ્ધ અને આ વર્ષે ઈરાન વિરુદ્ધ યુએસ-ઇઝરાયલ યુદ્ધ સહિત અનેક યુદ્ધમાં ઉપયોગ થયો છે.
