કાઠમંડુ: નેપાળમાં ફરી એક વાર હવામાન પલટાયું છે. જેમાં બુધવારે અનેક વિસ્તારોમાં ભારે વરસાદ બાદ પશ્ચિમી જિલ્લાઓની નાની નદીઓમાં પાણીનું સ્તર વધવા અને અચાનક પૂર આવવાની શક્યતા અંગે ચેતવણી જાહેર કરવામાં આવી છે. તેમજ શુક્રવાર સુધી વરસાદ, વાવાઝોડા અને વીજળી પડવાની શક્યતા છે. 

નાની નદીઓમાં જળસ્તર વધી શકે 

આ અંગે નેપાળના જળવિજ્ઞાન અને હવામાન વિભાગના અહેવાલ મુજબ અર્ઘાખાંચી જિલ્લાના સિમાલપાની જળ માપન કેન્દ્ર પર ત્રણ કલાકમાં 84.4  મિમી વરસાદ નોંધાયો હતો. વિભાગે ચેતવણી આપી છે કે આ વિસ્તાર અને તેની આસપાસની નાની નદીઓમાં જળસ્તર વધી શકે છે. 

ત્રણ કલાકના સમયગાળામાં મધ્યમથી ભારે વરસાદ નોંધાયો

હવામાન વિભાગે જણાવ્યું હતું કે બાંકે અને બારદિયા જિલ્લાના વિવિધ સ્થળોએ ત્રણ કલાકના સમયગાળા દરમિયાન મધ્યમથી ભારે વરસાદ નોંધાયો હતો, જેના કારણે જળસ્તરમાં વધારો થવાની અને નાની નદીઓના પ્રવાહમાં અચાનક ઉછાળો આવવાની ચિંતા ઊભી થઈ છે. એક અલગ ચેતવણીમાં, વિભાગે જણાવ્યું હતું કે દારચુલા, બૈતાડી, બઝાંગ, ડોટી, દાદેલધુરા, બાંકે, બારદિયા, કૈલાલી અને કંચનપુરની નાની નદીઓ તેમજ આસપાસના વિસ્તારોમાં અચાનક પૂર આવવાનું મધ્યમ જોખમ રહેલું છે.

બાગમતી, ગંડકી અને કર્નાલીના પહાડી વિસ્તારોમાં પણ ભારે વરસાદની શક્યતા

દેશના અન્ય ઘણા ભાગોમાં પણ ભારે વરસાદ પડ્યો છે. નેપાળના રાષ્ટ્રીય પ્રસારણકર્તા 'રેડિયો નેપાળ'એ હવામાનશાસ્ત્રીઓને ટાંકીને ચિતવન, પાલ્પા અને કૈલાલીમાં ભારે વરસાદની માહિતી આપી છે. જ્યારે નવલપુર, તનાહુન, ગોરખા, અર્ઘાખાંચી અને રૂપનદેહીમાં વાવાઝોડા અને વીજળી પડવાની ઘટનાઓ નોંધાઈ છે. લુમ્બિની અને સુદુરપશ્ચિમ પ્રાંતોના કેટલાક વિસ્તારો તેમજ બાગમતી, ગંડકી અને કર્નાલીના પહાડી વિસ્તારોમાં પણ ભારે વરસાદની શક્યતા છે.